ខេត្តកណ្តាល ៖ ស្ត្រីជាជនសង្សយ័ម្នាក់ត្រូវបាននគរបាលឃាត់ខ្លួន ខណៈជនសង្ស័យបានទៅផ្ទះជនរងគ្រោះដើម្បីទារក្រដាសជំពាក់លុយពីមុនដែលខ្លួនសងរួច តែជនរងគ្រោះមិនឱ្យ ថែមទាំងត្រូវជនរងគ្រោះទារលុយដែលខ្លួនទើបខ្ចីថ្មីៗទៀត ដោយសារជនរងគ្រោះនិយាយទារលុយដដែលៗ ធ្វើឱ្យជនសង្ស័យខឹងទប់ចិត្តមិនបានក៏ស្ទុះទៅច្រានផ្ទប់ជញ្ជាំង និងចាប់បោចសក់បោកទៅលើឥដ្ឋ បណ្តាលឱ្យជនរងគ្រោះសន្លប់…
ខេត្តកណ្តាល ៖ ស្ត្រីជាជនសង្សយ័ម្នាក់ត្រូវបាននគរបាលឃាត់ខ្លួន ខណៈជនសង្ស័យបានទៅផ្ទះជនរងគ្រោះដើម្បីទារក្រដាសជំពាក់លុយពីមុនដែលខ្លួនសងរួច តែជនរងគ្រោះមិនឱ្យ ថែមទាំងត្រូវជនរងគ្រោះទារលុយដែលខ្លួនទើបខ្ចីថ្មីៗទៀត ដោយសារជនរងគ្រោះនិយាយទារលុយដដែលៗ ធ្វើឱ្យជនសង្ស័យខឹងទប់ចិត្តមិនបានក៏ស្ទុះទៅច្រានផ្ទប់ជញ្ជាំង និងចាប់បោចសក់បោកទៅលើឥដ្ឋ បណ្តាលឱ្យជនរងគ្រោះសន្លប់ បន្ទាប់មកជនសង្ស័យបានលួចយកទ្រព្យសម្បត្តិរបស់ជនរងគ្រោះតែម្តង។
ហេតុការណ៍នេះខាងលើនេះបង្កឱ្យមានការភ្ញាក់ផ្អើលបានកើតឡើងកាលពីវេលាម៉ោង៩និង៣០នាទីព្រឹកថ្ងៃទី២៦ ខែមិនា ឆ្នាំ២០១៩ ចំណុចផ្ទះជនរងគ្រោះ ស្ថិតក្នុងភូមិជ្រោយមេត្រីក្រោម ឃុំឬស្សីជ្រោយ ស្រុកមុខកំពូល ខេត្តកណ្ដាល ។
ជនរងគ្រោះឈ្មោះកៃ គឹមឡាង ភេទស្រី អាយុ៥៣ឆ្នាំ មុខរបររកស៊ីចងការប្រាក់ រស់នៅភូមិឃុំកើតហេតុខាងលើ ។ ចំណែកជនសង្ស័យឈ្មោះមុិច ទីណា ភេទស្រី អាយុ៣០ឆ្នាំ មុខរបរកម្មកររោងចក្រ មានទីលំនៅក្នុងភូមិឃុំកើតហេតុខាងលើ។
រីឯទ្រព្យសម្បត្តិរបស់ជនរងគ្រោះដែលបាត់បង់រួមមានប្រាក់៤.០០០ដុល្លារ ខ្សែក១ខ្សែ ចិញ្ចៀន១វង់ និងប្រាក់១លានរៀល។
តាមប្រភពពីនគរបាលបានអោយដឹងថា មុនពេលកើតហេតុ កាលពីវេលាម៉ោង៨និង៣០នាទីព្រឹកថ្ងៃទី២៦ មីនា ស្ត្រីជាជនសង្ស័យបានដើរចេញពីផ្ទះមកទិញជីស្លឹកខ្ទឹមនៅផ្ទះយាយធំ ក្រោយពីទិញរួច ជនសង្ស័យបានដើរចូលមកក្នុងផ្ទះយាឡាង(ជនរងគ្រោះ)ដើម្បីសួរនាំពីរឿងក្រដាសដែលជំពាក់លុយថា «ក្រដាសជំពាក់លុយពីមុនដែលខ្ញុំសងប្រាក់រួច ម៉េចមិនឲ្យខ្ញុំ?» ជនរងគ្រោះក៏ឆ្លើយថា «អញអត់ឲ្យទេ ម៉េចខ្លាចអញទារលុយទៀតមែន?» ជនសង្ស័យឆ្លើយថា «អ៊ុំឯងច្រើនតែវង្វេង» ប៉ុន្តែជនរងគ្រោះនៅតែមិនឲ្យក្រដាស់ជំពាក់ប្រាក់នោះទៅជនសង្ស័យទេ ហើយជនសង្ស័យក៏មានការអន់ចិត្តបានដើរមកផ្ទះខ្លួនវិញយកជីខ្ទឹមទុក។
ប្រភពដដែលបានបន្តថា លុះដល់វេលាម៉ោង៩និង៣០នាទីថ្ងៃទី២៦ មីនា ជនសង្ស័យក៏បានដើរតែម្នាក់ឯងចូលទៅក្នុងផ្ទះជនរងគ្រោះម្តងទៀត និងជួបជនរងគ្រោះ ហើយជនសង្ស័យក៏ទារក្រដាសជំពាក់លុយពីមុនដែលខ្លួនបានសងរួច ដោយខ្លាចក្រែងជនរងគ្រោះទារទៀត ប៉ុន្តែជនរងគ្រោះនៅតែមិនឲ្យ បែរជាទារលុយដែលជនសង្ស័យទើបខ្ចីថ្មីៗទៅវិញ ។ ពេលនោះក៏មានការជជែកគ្នា ហើយជនរងគ្រោះក៏ដើរចូលទៅក្នុងបន្ទប់ ចំណែកជនសង្ស័យក៏ដើរតាមពីក្រោយ ។
ប្រភពដដែលបានបន្តទៀតថា ដោយសារខឹងជនរងគ្រោះនិយាយទារលុយដដែលៗ ទប់ចិត្តមិនបាន ស្រាប់តែជនសង្ស័យក៏ស្ទុះច្រានជនរងគ្រោះផ្ទប់ជញ្ចាំងថ្ម បណ្តាលឲ្យដួលទៅលើឥដ្ឋ ។ ភ្លាមនោះជនសង្ស័យបានចាប់សក់ក្បាលជនរងគ្រោះបោកទៅលើឥដ្ឋចំនួនពីរដងថែមទៀត បណ្តាលឲ្យជនរងគ្រោះសន្លប់ ជនសង្ស័យបានយកក្រមាពណ៌បៃតងលាយខៀវមកចងរឹត.កជនរងគ្រោះបន្ថែមទៀត ។
ដោយនឹកស្មានថាជនរងគ្រោះស្លាប់ ជនសង្ស័យបានដកយកកាបូបលុយស្ពាយពណ៌ខ្មៅពីជនរងគ្រោះ ហើយលូកយកលុយពីក្នុងកាបូបនោះដាក់ក្នុងថង់ខ្មៅ ហើយបោះកាបូបស្ពាយនោះចោល មូលហេតុដោយសារឆ្កែព្រុសពេក បន្ទាប់មកជនសង្ស័យក៏ដើរសរសៀៗតាមមុខផ្ទះគេចខ្លួនបាត់។
ក្រោយពេលកើតហេតុ ប្តីជនរងគ្រោះបានមកដល់ផ្ទះកើតហេតុ ឃើញប្រពន្ធដេកសន្លប់នៅលើឥដ្ឋក្នុងបន្ទប់ ដោយមានក្រមាចងរឹតកថែមទៀត ពេលនោះប្តីជនរងគ្រោះក៏ស្រាយក្រមាចេញ ហើយជនរងគ្រោះក៏ដឹងខ្លួនវិញ ដោយនិយាយប្រាប់ថា ឈ្មោះទីណា ជាអ្នកវាយគាត់ ឮដូច្នេះប្តីរបស់ជនរងគ្រោះក៏ទូរស័ព្ទប្តឹងសមត្ថកិច្ចប៉ុស្តិ៍ បន្ទាប់មកសមត្ថកិច្ចប៉ុស្តិ៍បានមកដល់កន្លែងកើតហេតុ និងឃាត់ខ្លួនជនសង្ស័យឈ្មោះ មុិច ទីណា យកមកធ្វើការសាកសួរនៅប៉ុស្តិ៍ ហើយជនសង្ស័យបានឆ្លើយសារភាពថា ខ្លួនពិតជាបានវាយជនរង គ្រោះប្លន់យកប្រាក់ប្រាកដមែន ។
បច្ចុប្បន្ន ជនសង្ស័យត្រូវបានកម្លាំងជំនាញ និងប៉ុស្តិ៍កំពុងកសាងសំណុំរឿងបន្តចាត់ការតាមនីតិវិធី ៕
ចែករំលែកព័តមាននេះ