នរកទាំងអស់មានតែនៅក្នុងបុគ្គលដែលល្ងិតល្ងង់ បុគ្គលដែលជ្រប់ងប់លិចលង់ក្នុងកាមគុណទាំងឡាយ និងបុគ្គលជាមិច្ឆាទិដ្ឋិប៉ុណ្ណោះ។ ឯបណ្ឌិតថ្វីបើលោកនៅមានរាគៈក៏ពិតមែន ប៉ុន្តែលោកលែងធ្លាក់នរកទៀតហើយ ព្រោះចិត្តរបស់លោកបានធ្លាក់ចុះក្នុងផ្នត់នៃធម៌រួចហើយ ។
រឿងប្រេតនរកដែលមាននៅក្នុងចិត្តសន្តាននោះព្រះដ៏មានបុណ្យទ្រង់ឱ្យពិចារណានូវភាសិតដូចតទៅ ម្នាលភិក្ខុទាំងឡាយ មិនមាននរកឯណាដែលមានកម្ដៅខ្លាំងក្លាជាងនរកគឺ រូប សំឡេង ក្លិន រស សម្ផស្សទាំងឡាយដែលគេមិនត្រូវការ មិនស្រឡាញ់ មិនចូលចិត្តនោះទេ។ របស់អស់ទាំងនេះហើយគឺជាកន្លែងមានកម្ដៅយ៉ាងខ្លាំងសម្បើមនៃបុគ្គលអវិជ្ជា ។
ម្នាលភិក្ខុទាំងឡាយ នៅមានទៀត នរកដែលខ្លាំងក្លាជាងនេះគួរឲ្យខ្លាចជាងនេះ គឺបុគ្គលណាដែលមិនដឹងតាមសេចក្ដីពិត មិនដឹងនូវអរិយសច្ចៈ៤ គេរមែងត្រេកអរក្នុងសង្ខារទាំងឡាយ កាលណាគេមានសេចក្ដីត្រេកអរក្នុងសង្ខារទាំងឡាយ គេរមែងវិលកើត កាលគេមានការកើតក៏រមែងមានការចាស់ ការឈឺ ការស្លាប់ សេចក្ដីសោក ខ្សឹកខ្សួល ទុក្ខកាយ ទុក្ខចិត្ត សេចក្ដីថ្នាំងថ្នាក់ចិត្ត និងការចង្អៀតចង្អល់ចិត្ត គេរួចចាកសេចក្ដីទុក្ខទាំងអស់នេះពុំបានឡើយ ។
ម្នាលភិក្ខុទាំងឡាយនេះ ហើយជានរកដែលយើងថាក្ដៅណាស់គួរឲ្យខ្លាចជានរកក្នុងឋាននរកនោះ។
ចែករំលែកព័តមាននេះ