រាជធានីភ្នំពេញ ៖ ដើម្បីពង្រឹងសមត្ថភាពបណ្តាញផ្លូវនៅកម្ពុជា ប្រមុខដឹកនាំកម្ពុជាមានគម្រោងសម្រាប់ការសាងសង់ផ្លូវល្បឿនលឿន (Express Way) ចំនួន ៦ ខ្សែ ដើម្បីតភ្ជាប់តំបន់ប៉ូលសេដ្ឋកិច្ចសំខាន់ៗរបស់ប្រទេសកម្ពុជាទៅកាន់បណ្តាប្រទេសជិតខាង…
រាជធានីភ្នំពេញ ៖ ដើម្បីពង្រឹងសមត្ថភាពបណ្តាញផ្លូវនៅកម្ពុជា ប្រមុខដឹកនាំកម្ពុជាមានគម្រោងសម្រាប់ការសាងសង់ផ្លូវល្បឿនលឿន (Express Way) ចំនួន ៦ ខ្សែ ដើម្បីតភ្ជាប់តំបន់ប៉ូលសេដ្ឋកិច្ចសំខាន់ៗរបស់ប្រទេសកម្ពុជាទៅកាន់បណ្តាប្រទេសជិតខាង ដោយមើលឃើញថាមានតែផ្លូវល្បឿនលឿន ទើបអាចបម្រើសេវាកម្មដឹកជញ្ជូនល្អជាងផ្លូវធម្មតា និងត្រូវបានគេចាត់ទុកជាមូលដ្ឋានសម្រាប់វិស័យឧស្សាហកម្មទំនើបៗ និងសកម្មភាពដឹកជញ្ជូនធន់ធ្ងន់ផងដែរ។
រាជរដ្ឋាភិបាលកម្ពុជា ក្នុងគម្រោងតភ្ជាប់បណ្តាញផ្លូវនៅកម្ពុជាជាមួយបណ្តាប្រទេសជិតខាង គឺមានផែនការសាងសង់ផ្លូវល្បឿនលឿន (Express way Development Plan) យ៉ាហោចណាស់ ៧ ខ្សែ—ដែលក្នុងនោះ (ខ្សែទី១) – ផ្លូវល្បឿនលឿនភ្នំពេញ-ព្រះសីហនុ ដែលមានប្រវែងជាង ១៩០ គីឡូម៉ែត្រនឹងត្រូវបានបើកការដ្ឋានសាងសង់កាលពីថ្ងៃទី ២២ ខែមីនា ឆ្នាំ ២០១៩ ជាមួយនឹងចំណាយសាងសង់ប្រមាណជាង ២ ពាន់លានដុល្លារ, (ខ្សែទី២) – ផ្លូវល្បឿនលឿនភ្នំពេញ-បាវិត ដែលគ្រោងនឹងសាងសង់លើចំងាយផ្លូវប្រមាណជាង ១៣៥ គីឡូម៉ែត្រ,
(ខ្សែទី៣) – ផ្លូវល្បឿនលឿនភ្នំពេញ-ប៉ោយប៉ែត្រ មានចំងាយគ្រោងសាងសង់ប្រមាណជាង ៣៥៥ គីឡូម៉ែត្រ, (ខ្សែទី៤) – ផ្លូវល្បឿនលឿនភ្នំពេញ-ស្រីសុផុន ចម្ងាយ ៤០០ គីឡូម៉ែត្រ, (ខ្សែទី៥)- ផ្លូវល្បឿនលឿនភ្នំពេញ-ព្រំដែនឡាវ មានប្រវែង ៣៥៥ គីឡូម៉ែត្រ, (ខ្សែទី៦) – ផ្លូវល្បឿនលឿនសៀមរាប-ព្រំដែនវៀតណាម ប្រវែងប្រមាណ ៣៩០ គីឡូម៉ែត្រ និង (ខ្សែទី៧) ផ្លូវល្បឿនលឿនក្រុងកែប-កោះកុង ប្រវែងប្រមាណ ២២០ គីឡូម៉ែត្រ ។ សរុបទៅគម្រោងផ្លូវល្បឿនលឿនទាំងអស់គឺរំពឹងថានឹងចាប់ផ្តើមប្រតិបត្តិការចាប់ពីឆ្នាំ ២០២០ ដល់ឆ្នាំ ២០៣០ ។
នេះបើតាមរបាយការណ៍របស់ក្រសួងសាធារណការដែលលើកឡើងថាគម្រោងផែនការសាងសង់ផ្លូវល្បឿនលឿនទាំងអស់នេះ គឺអាចនឹងត្រូវសាងសង់ពេល ផលិតផលក្នុងស្រុកសរុបក្នុងមនុស្សម្នាក់នៅក្នុងប្រទេសកម្ពុជា (GDP per capita) មានចំនួន ១,០០០ ដុល្លារ តែជាក់ស្តែង ផលិតផលក្នុងស្រុកសរុបក្នុងមនុស្សម្នាក់នៅក្នុងប្រទេសកម្ពុជាត្រូវបានរកឃើញថាមានចំនួនជាង ១១៣៥ ដុល្លារក្នុងឆ្នាំ ២០១៧ កន្លងទៅ ។
ប្រមុខរាជរដ្ឋាភិបាល បានឲ្យដឹងថា បំណងសាងសង់ផ្លូវល្បឿនលឿនពីភ្នំពេញ ទៅកាន់ព្រំដែនប្រទេសវៀតណាម និងថៃនេះ ក៏ដូចជាឡាវ គឺដើម្បីបង្កើនការនាំចេញរបស់កម្ពុជា ជាមួយប្រទេសជិតខាងបន្ថែមទៀត តាមរយៈការបង្កើនសេវាដឹកជញ្ជូនក្នុងតំបន់នេះ។
សូមរម្លឹកថា សម្តេចតេជោ ហ៊ុន សែន នាយករដ្ឋមន្ត្រីកម្ពុជាកាលពីថ្ងៃទី ២២ ខែមីនា ឆ្នាំ ២០១៩ នាឱកាសបើកការដ្ឋានសាងសង់ផ្លូវល្បឿនលឿនពីរាជធានីភ្នំពេញ-ព្រះសីហនុ បានប្រកាសថារាជរដ្ឋាភិបាលកម្ពុជា នឹងសាងសង់ផ្លូវល្បឿនលឿនភ្នំពេញ-បាវិត នាពេលខ្លីខាងមុខនេះ ខណៈផ្លូវមួយនេះបាននឹងកំពុងសិក្សាដោយអ្នកជំនាញអង្គការ JICA រួចហើយ។
សម្តេចតេជោ មានប្រសាសន៍នាពេលនោះថា « ថ្ងៃនេះយើងបើកត្រឹមតែភ្នំពេញទៅក្រុងព្រះសីហនុ ក៏ប៉ុន្តែយើងមានតម្រូវការបន្តែមទៀតអំពីផ្លូវល្បឿនលឿន ដូចជាការតភ្ជាប់ទៅកាន់វៀតណាម។ យើងត្រូវតភ្ជាប់ទៅជាមួយវៀតណាមបន្ថែមទៀត ពីភ្នំពេញទៅបាវិត។ យើងត្រូវមានផ្លូវ Highways Asean ជាមួយភ្នំពេញនឹងក្រុងហូជីមិញ ហើយតភ្ជាប់ភ្នំពេញជាមួយក្រុងបាងកក»។
ការសាងសង់បណ្តាញផ្លូវល្បឿនលឿន (Expressway) ជាកត្តាដ៏ធំជាងគេសម្រាប់ពង្រឹងសមត្ថភាពបណ្តាញផ្លូវនៅកម្ពុជាព្រោះ ផ្លូវល្បឿនលឿន អាចបម្រើសេវាកម្មដឹកជញ្ជូនល្អជាងផ្លូវធម្មតា និងត្រូវបានគេចាត់ទុកជាមូលដ្ឋានសម្រាប់វិស័យឧស្សាហកម្មទំនើបៗ និងសកម្មភាពដឹកជញ្ជូនធន់ធ្ងន់ផងដែរ។ ផ្លូវល្បឿនលឿន គឺជាផ្លូវសម្រាប់យានយន្តធ្វើចរាចរណ៍ មានបរិក្ខារបែងចែកទ្រូងផ្លូវជាពីរចំណែកខុសទិសគ្នាឬចែកជាគន្លងផ្លូវ គ្មានកន្លែងផ្លូវប្រសព្វលើផ្ទៃរាបមួយ ឬត្រូវមានផ្លូវប្រសព្វតិចបំផុតក្នុងករណីចាំបាច់ និងបំពាក់គ្រប់គ្រាន់នូវបរិក្ខារផ្លូវថ្នល់ ដើម្បីធានាលំហូរចរាចរណ៍ សុវត្ថិភាព និងដើម្បីបន្ថយពេលវេលាធ្វើដំណើរ និងមានកន្លែងកំណត់សម្រាប់ឲ្យយានយន្តចេញនិងចូលផ្លូវល្បឿនលឿន។
អ្នកនាំពាក្យក្រសួងសាធារណការ និងដឹកជញ្ជួន លោក វ៉ា ស៊ឹមសូរិយា បានឲ្យដឹងថា ផ្លូវល្បឿនលឿនពីរាជធានីភ្នំពេញ-ព្រះសីហនុ ដោយគ្រោងចំណាយថវិកាសរុប ៣៨០០លានដុល្លារ ដែលជាការចំណាយដ៏ធំធេងមួយ។ លោកបន្តថា កន្លងមកមានក្រុមហ៊ុនចិន និងបច្ចុប្បន្នទំនងជាមានក្រុមហ៊ុនចិនជាច្រើនទៀត កំពុងសិក្សាដើម្បីឈានទៅសាងសង់ផ្លូវល្បឿនលឿននេះ។
លោកវ៉ា ស៊ឹមសូរិយា មានប្រសាសន៍បញ្ជាក់ថា «ផ្លូវល្បឿនលឿនភ្នំពេញ បាវិត ដែលសិក្សាចំណាយអស់ច្រើនកន្លងមក ដោយសារផ្លូវនេះត្រូវធ្វើស្ពានប្រវែងជា ១០គីឡូម៉ែត្រ នៅតំបន់ស្រុកល្វាឯម ដោយសារផ្លូវនេះគ្រោងធ្វើនៅផ្នែកខាងឆ្វេងទន្លេមេគង្គ» ។ ផ្លូវល្បឿនលឿនមួយនេះ នឹងឆ្លងកាត់រាជធានីភ្នំពេញ ខេត្តកណ្តាល ខេត្តព្រៃវែង មុនតភ្ជាប់ទៅកាន់ក្រុងបាវិត ខេត្តស្វាយរៀង ។
សូមបញ្ជាក់ថា បណ្តាញផ្លូវជាតិ និងហេដ្ឋារចនាសម្ព័ន្ធកម្ពុជាជាច្រើនខ្សែត្រូវបានបំផ្លិចបំផ្លាញដោយសង្គ្រាមស៊ីវិលនិងមិនអាចធ្វើដំណើរបានជាច្រើនកន្លែង។ គម្រោងកសាងផ្លូវដែលខូចខាតទាំងនោះឡើងវិញ ត្រូវបានអនុវត្តចាប់តាំងពី ឆ្នាំ១៩៩០ រហូតមកដល់ដល់ដើមឆ្នាំ២០០០ ដោយជំនួយហិរញ្ញប្បទានពី ប្រទេសជប៉ុន សហរដ្ឋអាមេរិក អូស្ត្រាលី ធនាគារអភិ-វឌ្ឍអាស៊ី(ADB) ធនាគារពិភពលោក(World Bank) និងដៃគូអភិវឌ្ឍន៍ ជាច្រើនទៀត។ នេះបើតាមការឲ្យដឹងពីមន្ត្រីក្រសួងសាធារណការ និងដឹកជញ្ជួន។
លោកបន្តថា ជាលទ្ធផល ការ កសាងផ្លូវនិងជួសជុលឡើងវិញទទួលបានភាពជោគជ័យយ៉ាងឆាប់រហ័ស។ បច្ចុប្បន្ននេះកម្ពុជាបានពង្រឹងសមត្ថភាពនៃបណ្តាញផ្លូវដែលមានស្រាប់ ដើម្បីឲ្យស្របទៅតាមកំណើនសេដ្ឋកិច្ចដ៏ឆាប់រហ័សរបស់ខ្លួន ក៏ដូចជាជម្រុញកិច្ចសហប្រតិបត្តិការក្នុងតំបន់អាស៊ាន និងបណ្តាប្រទេសមហាអនុតំបន់ទន្លេមេគង្គ ៕
ចែករំលែកព័តមាននេះ