ខេត្តកំពង់ឆ្នាំង ៖ ជនរងគ្រោះម្នាក់ដែលកំពុងសម្រាកព្យាបាលរបួស នៅមន្ទីរពេទ្យខេត្តបង្អែកកំពង់ឆ្នាំង បានសុំអំពាវនាវឱ្យសមត្ថកិច្ចគ្រប់ជាន់ថ្នាក់ជួយរកយុត្តិធម៌ ដោយគាត់បានចោទប្រកាន់ទៅលើមេប៉ុស្តិ៍ឃុំជៀប ស្រុកទឹកផុស កូនប្រុសរួមនិងបក្សពួកបានព្រួតវាយកាប់ និងចាក់ទៅលើខ្លួនបណ្ដាលឱ្យរងរបួសជាទម្ងន់ ។
នៅក្នុងមន្ទីរពេទ្យបង្អែក នារសៀលថ្ងៃទី២៦ មីនា នេះ ជនរងគ្រោះមានឈ្មោះស៊ិន វុទ្ធី អាយុ២៣ឆ្នាំ មានទីលំនៅក្នុងភូមិគោកពេញ ឃុំជៀប ស្រុកទឹកផុស បានរៀបរាប់ពីដំណើររឿងថា កាលពីវេលាម៉ោង ១១ និង១០យប់ថ្ងៃទី២៣ មីនា ស្ថិតក្នុងភូមិមានពិធីបុណ្យបច្ច័យបួន ដោយមានការសម្ដែងល្ខោន និងរាំវង់ធុងបាស់ផងដែរ ។ នៅពេលកើតហេតុ ស្រាប់តែមានក្មេង២ក្រុមបានឈ្លោះប្រកែកគ្នា ពេលនោះខ្លួនបានទៅសួរនាំ ហើយក៏មានការប្រកែកគ្នាបន្តិចបន្តួច ហើយក៏ត្រូវលោក ជៀម វិចិត្រ ដែលជាមេប៉ុស្តិ៍រដ្ឋបាលឃុំជៀប បានយកកាំភ្លើងអាកាមកវាយខ្លួនពីក្រោយខ្នងមួយស្វាយកាំភ្លើង បណ្ដាលឱ្យដួលលើដី ។
បន្ទាប់មកកូនប្រុស រួមបក្សពួករបស់លោកមេប៉ុស្តិ៍ បានមកព្រួតវាយលើខ្លួនបន្ថែមទៀត ។ ជាមួយគ្នា នោះខ្លួនបានព្យាយាមរត់ ហើយក៏ត្រូវកូនប្រុសលោកមេប៉ុស្ដិ៍កាប់ក្បាល និងចាក់ត្រូវចង្កេះ បណ្ដាលឲ្យរងរបួសជាទម្ងន់ទៀត ។ ក្រោយពេលកើតហេតុ គាត់បានព្យាយាមរត់ចេញពីកន្លែងកើតហេតុ ហើយត្រូវបានប្រជាពលរដ្ឋជួយអូសចេញពីក្រុមអ្នកវាយកាប់ចាក់ទាំងនោះ និងដឹកខ្លួនមកកាន់មណ្ឌលសុខភាពឃុំជៀប និងបន្តមកសង្គ្រោះនៅមន្ទីរពេទ្យបង្អែកខេត្តកំពង់ឆ្នាំងទាំងយប់ ។
ពេលនេះ ខ្លួនសូមសំណូមពរដល់អាជ្ញាធរសមត្ថកិច្ចពាក់ព័ន្ធ សូមមេត្តាជួយរកយុត្តិធម៌ជូនខ្លួនផង ។ ជុំវិញបញ្ហានេះ លោកមេប៉ុស្តិ៍ឃុំជៀប យើងមិនអាចជួបការសម្ភាសន៍បានទេ ។ ជាមួយគ្នានេះដែរ លោក ខែម វិបុល អធិការនគរបាលស្រុកទឹកផុស បានឱ្យដឹងដែរថា លោកកំពុងតែពិនិត្យសំណុំរឿងនេះនៅឡើយ ។
ទោះបីជាយ៉ាងណាក្តី លោកបានបញ្ជាក់ដែរថា លោកមេប៉ុស្តិ៍ឃុំជៀប និងកូនបានបដិសេធថា មិនបានប្រព្រឹត្តអំពើរឿងនេះទេ ហើយលោកមេប៉ុស្តិ៍បញ្ជាក់ថា ជនដៃដល់គឺជាអ្នកផ្សេង ដែលកំពុងតែស្រាវជ្រាវតាមចាប់ខ្លួនផងដែរ ។ លោកបញ្ជាក់ថា នៅពេលចាប់ខ្លួនជនដៃដល់ពិតប្រាកដបាននោះ នឹងយកមក
តទល់គ្នាជាមួយជនរងគ្រោះ ។
ចែករំលែកព័តមាននេះ