តាមប្រភពព័ត៌មាន CNN បានឱ្យដឹងថា កីឡាកររបស់ក្លិបអ្នកមានបារាំង Neymar Jr អាចនឹងត្រូវគេហាមមិនឱ្យចូលប្រកួត UEFA ក្រោយពីបង្ហោះសារជេរអាជ្ញាកណ្តាលនៅលើបណ្តាញសង្គម Instagram។ ការបង្ហោះនេះគឺធ្វើឡើងក្រោយពី PSG ចាញ់ការប្រកួត Champions League ដោយក្លិបបិសាចក្រហម Manchester United។

នៅក្នុងការប្រកួតជាមួយនឹង Man Utd កីឡាករ Neymar មិនបានចូលរួមប្រកួតទេ ហើយបានត្រឹមតែឈរមើលទាំងកំហឹង ពេលដែលអាជ្ញាកណ្តាលសម្រេចឱ្យខាង Manchester United ជាអ្នកស៊ុតប៉េណាល់ទី។

ក្រោយពីពិភាក្សាគ្នាជាមួយនឹងការមើលកាមេរ៉ាថតរូបភាពយឺតៗ លោកអាជ្ញាកណ្តាល Damir Skomina បានឱ្យខាង Man Utd ជាអ្នកស៊ុតបាល់ប៉េណាល់ទី ដែលធ្វើឱ្យខាង PSG ធ្លាក់ចេញពីការប្រកួត។

ដោយខឹងខ្លាំងពេក Neymar បានបង្ហោះសារលើ Instagram ថា៖«នេះគឺពិតជាអាម៉ាស់មុខមែនទែន ដោយពួកគេយកមនុស្សបួននាក់ ដែលគ្មានដឹងអ្វីសោះពីបាល់ទាត់ មកធ្វើជាអ្នកមើលកាមេរ៉ាថតរូបភាពយឺត។ នេះគឺពិតជាមិនអាចទៅរួចទាល់តែសោះ។ តើកីឡាករម្នាក់អាចអោបដៃទៅខាងក្រោយយ៉ាងម៉េចនឹងកើត ។ Go F**k youselves»។

Neymar អាចនឹងត្រូវគេហាមមិនឱ្យចូលប្រកួត Champions League ចំនួន៣ប្រកួត បើយោងតាមវិន័យរបស់ UEFA ៕