ខេត្តមណ្ឌលគិរី ៖ អំឡុងសប្តាហ៍ទី៤នៃខែមីនានេះ ទូទាំងប្រទេសកម្ពុជាស្ទើរតែមានភ្លៀងកក់ខែគ្រប់បណ្តាខេត្ត-ក្រុង ដែលធ្វើឱ្យខេត្តខ្លះកំពុងប្រឈមខ្វះទឹកប្រើប្រាស់នោះ អាចមានទឹកផ្គត់ផ្គង់បន្តវិញ តែក៏មានពលរដ្ឋមួយចំនួនបានទទួលរងប៉ះពាល់ ហើយខ្លះក៏រងគ្រោះដល់អាយុជីវិតផងដែរ ។ ជាក់ស្តែង នៅខេត្តមណ្ឌលគិរីក្នុងខែមីនានេះ មានភ្លៀងធ្លាក់ចំនួន៣លើក បានធ្វើឱ្យប្រជាកសិករសប្បាយចិត្ត ក្នុងការប្រកបរបរកសិកម្ម ដែលត្រូវការទឹកជាចាំបាច់បំផុតសម្រាប់បង្កបង្កើនផល ។
លោក ស្វាយ សំអ៊ាង អភិបាលខេត្តមណ្ឌលគិរី មានប្រសាសន៍ដែរថា «គិតត្រឹមថ្ងៃទី២៦ មីនា មក មានប្រជាពលរដ្ឋចំនួន៨គ្រួសារ បានរងផលប៉ះពាល់ដោយសារខ្យល់កន្ត្រាក់ និងធ្វើោ្យខូចខាតផ្ទះសំបែងខ្លះៗតែមិនធ្ងន់ធ្ងរនោះទេ»។ លោកអភិបាលខេត្តបន្តថា «ការប៉ះពាល់កន្លងមកនេះ មិនមានបង្កឲ្យមានការគ្រោះថ្នាក់ដល់អាយុជីវិតប្រជាពលរដ្ឋទេ ។ ក្នុងនាមអាជ្ញាធរខេត្ត ក៏បានអំពាវនាវដល់ប្រពលរដ្ឋដែលរស់នៅគ្រប់មូលដ្ឋានក្នុងខេត្ត ត្រូវមានការប្រុងប្រយ័ត្នខ្ពស់ ចៀសវាងគ្រោះថ្នាក់នានាដល់អាយុជីវិតមនុស្ស ។
ការផ្សព្វផ្សាយនូវសេចក្តីអំពាវនាវរបស់សម្តេចក្រឡាហោម ស ខេង សូមឱ្យបង្កើនការប្រុងប្រយត្ន័ខ្ពស់ថែមទៀត នូវប្រការផ្សេងៗដូចជា អគ្គិភ័យឆាបឆេះផ្ទះសម្បែង ផ្គររន្ទះ ខ្យល់ព្យុះ និងខ្យល់កន្ត្រាក់ ដែលអាចបង្កឱ្យមានហានិភ័យខូចខាតទ្រព្យសម្បត្តិ និងចៀសឱ្យផុតពីការគ្រោះថ្នាក់ដល់អាយុជីវិត ។
យោងលើការចេញផ្សាយរបស់ក្រសួងធនធានទឹកនិងឧតុនិយមបានឲ្យដឹងថា ចាប់ពីថ្ងៃទី២៦ មីនា រហូតដល់ថ្ងៃទី២ មេសា ២០១៩ អាកាសធាតុនឹងមានការប្រែប្រួល ដោយនៅថ្ងៃទី២៦ ដល់ថ្ងៃទី២៩ មីនា ឥទ្ធិពលនៃការប្រសព្វគ្នា រវាងសម្ពាធទាប(ទិសខាងលិច នឹងពាយ័ទ្យ) និងសម្ពាធខ្ពស់នៃតំបន់ខ្ពង់រាបចុះខ្សោយ ធ្វើឲ្យកម្រិតទឹកភ្លៀងកក់ខែ ក៏ធ្លាក់ចុះផងដែរ ។ ទន្ទឹមនេះ កម្ពៅនឹងកើនឡើងវិញ ដែលកម្រិតសីតុណ្ហភាពអតិបរមា មានពី៣៤ទៅ៣៧អង្សា ។
របាយការណ៍ដដែលបន្តថា ចាប់ពីថ្ងៃទី៣០ មីនា ដល់ថ្ងៃទី០២ មេសា ឥទ្ឋិពលនៃការប្រសព្វគ្នារវាងសម្ពាធទាប នឹងសម្ពាធខ្ពស់បន្តកើតឡើងវិញសារជាថ្មីម្តងទៀត ដែលបណ្តាលឲ្យមានភ្លៀងកើតឡើងវិញជាបន្តបន្ទាប់ ដែលនាំមកនូវផ្គររន្ទះ និងខ្យល់កន្ត្រាក់ទៀតផង ។
ចែករំលែកព័តមាននេះ