រាជធានីភ្នំពេញ ៖ ស្ត្រីម្នាក់រួមរស់ជាមួយប្តីបាន៨ឆ្នាំត្រូវប្តីប្រើអំពើហិង្សាជាច្រើនដង និងបំផ្លាញទ្រព្យសម្បត្តិជាញឹកញយជាច្រើនដង រហូតរស់នៅជាមួយគ្នាលែងកើតបានសុំបែកផ្លូវគ្នាត្រូវបុរសជាប្តីតាមវាយ បណ្តាលអោយរងរបួសបាក់ក្តោងច្រមុះរងរបួសធ្ងន់បង្កអោយមានការភ្ញាក់ផ្អើល កាលពីវេលាម៉ោង៥ល្ងាច ថ្ងៃទី២៥ ខែមីនា ឆ្នាំ២០១៩ នៅភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ ។
នារីរងគ្រោះឈ្មោះ ឈុន លីមុន្នីរដ្ឋា អាយុ៣០ឆ្នាំ មុខរបរលក់ស៊ុបគ្រឿងក្នុង រស់នៅបន្ទប់ជួលភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ ។ ចំណែកបុរសជាប្តីឈ្មោះ កែវ បូរ៉ាស៊ី ភេទប្រុស អាយុ៣៦ឆ្នាំ មុខរបរបើករថយន្តស្នាក់នៅភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យ ។
តាមសំដីនារីរងគ្រោះបានរៀបរាប់ប្រាប់ថា រូបនាងជាកូនកំព្រាបានស្រលាញ់គ្នាជាមួយប្តីបានប្រមាណ៨ឆ្នាំមកហើយតែពុំបានរៀបអាពាហ៍ពិពាហ៍នោះឡើយដោយរស់ជាមួយគ្នាតែម្ដងរហូតបង្កើតកូនបាន២នាក់ ប្រុសទាំងពីរ ដោយកូនបងអាយុ៥ឆ្នាំ និងកូនប្អូនអាយុ២ឆ្នាំ ។ លុះពេលរស់នៅជាមួយគ្នាជាបន្តបន្ទាប់ប្តីរបស់នាងតែងតែប្រើអំពើហិង្សាជាញឹកញយផងដែរ តែងតែបំផ្លាញទ្រព្យសម្បត្តិសឹងរាប់ម៉ឺនដុល្លារផងដែរ បន្ទាប់មកនាងអស់ចិត្ត ហើយសុំបែកផ្លូវគ្នាបានចំនួន១០ថ្ងៃនឹងបានរើដូរផ្ទះជួលបាន២ថ្ងៃផងដែរ ។
នាងបានបញ្ជាក់ទៀតថា សុំបែកផ្លូវគ្នាដោយបានបែងចែកកូនគ្នាម្នាក់មួយ តែក្រោយមកខាងប្តីរបស់នាងបានយកកូនទាំងពីរទៅចិញ្ចឹមតែម្តងដោយចោទប្រកាន់ថា នាងមិនមានសមត្ថភាពចិញ្ចឹមកូននោះឡើយ តែនាងមិនមែនដូចប្តីនាងចោទប្រកាន់នោះឡើយ ។
ប្រភពព័ត៌មានបានបញ្ជាក់ប្រាប់ថា នៅមុនពេលកើតហេតុនាងទើបផ្លាស់ផ្ទះថ្មីមិនអោយបុរសជាប្តីដឹងនោះឡើយ តែទោះជាយ៉ាងណាប្តីតាមរកផ្ទះជួលថ្មីឃើញទាល់តែបានហើយបានវាយដោយទាត់មួយជើងចំភ្នែក និងបាក់ក្តោងច្រមុះឈាមហូររហូត ហើយជនបង្កជាប្តីខាងលើ គេចខ្លួនបាត់ស្រមោល ។
ក្រោយពេលកើតហេតុជនរងគ្រោះបានមកដាក់ពាក្យបណ្ដឹង ដើម្បីអោយសមត្ថកិច្ចឃាត់បុរសខាងលើមកផ្តន្ទាទោសតាមច្បាប់ ៕
ចែករំលែកព័តមាននេះ