ខេត្តកណ្តាល ៖ ជនសង្ស័យម្នាក់ផឹកស្រវឹងហើយជិះម៉ូតូរោទិ៍មុខផ្ទះជនរងគ្រោះបង្កសំឡេងរំខាន ក៏ត្រូវជនរងគ្រោះហាមឃាត់ ធ្វើឱ្យជនសង្ស័យខឹងក៏យកកាំបិតកាប់ បណ្តាលអោយជនរងគ្រោះដាច់កដៃរងរបួសធ្ងន់។
ហេតុការណ៍នេះបានកើតឡើងកាលពីវេលាម៉ោង៧និង២០នាទីយប់ ថ្ងៃទី២៤ ខែមីនា ឆ្នាំ២០១៩ នៅចំណុចផ្ទះជនរងគ្រោះ ស្ថិតក្នុងភូមិទួលមាស ឃុំអរិយក្សត្រស្រុកល្វាម ខេត្តកណ្តាល ។
ជនរងគ្រោះឈ្មោះស៊ឹម ចាន់ថេត ភេទប្រុស អាយុ៣៦ឆ្នាំ មុខរបរកសិករ មានទីលំនៅសព្វថ្ងៃក្នុងភូមិទួលមាស ឃុំអរិយក្សត្រ ស្រុកល្វាឯម ខេត្តកណ្តាល បានរងរបួសដាច់កដៃឆ្វេង ។ ចំណែកជនសង្ស័យឈ្មោះ កា ឆវន្ត័ ភេទប្រុស អាយុ២៥ឆ្នាំ មុខរបរកម្មករសំណង់ ទីលំនៅភូមិទួលមាស ឃុំអរិយក្សត្រ ស្រុកល្វាឯម ខេត្តកណ្តាល បានរត់គេចខ្លួនបាត់។
តាមប្រភពពីសាក្សីបានអោយដឹងថា មុនពេលកើតហេតុ ជនជនសង្ស័យបានផឹកស្រាស្រវឹង ហើយជិះម៉ូតូរោទិ៍យ៉ាងខ្លាំងនៅមុខផ្ទះជនរងគ្រោះ ហើយជនរងគ្រោះបានប្រាប់ទៅជនសង្ស័យថា «ឯងកុំមករោទិ៍ម៉ូតូនៅមុខផ្ទះអាញ» ។ ពេលនោះជនសង្ស័យស្រវឹងស្រាឆេវឆាវ ខឹងជនរងគ្រោះថាឲ្យ ស្រាប់តែជនសង្ស័យជិះម៉ូតូទៅយកកាំបិត ហើយលបចូលទៅកាប់ជនរងគ្រោះដែលកំពុងឈរនៅគល់ស្វាយមុខផ្ទះដោយមិនដឹងខ្លួន បណ្តាលឲ្យដាច់កដៃខាងឆ្វេងតែម្តង។ បន្ទាប់ពីកើតហេតុ ជនរងគ្រោះត្រូវបានក្រុមគ្រួសារបញ្ជូនទៅព្យាបាលនៅគ្លីនិកឯកជនមួយកន្លែង ចំណែកជនសង្ស័យបានរត់គេចខ្លួនបាត់ ។
ពាក់ព័ន្ធនឹងករណីខាងលើនេះ កម្លាំងសមត្ថកិច្ចប៉ុស្តិ៍កំពុងបន្តស្រាវជ្រាវនិងស្វែងរកចាប់ជនសង្ស័យយកមកផ្តន្ទាទោសតាមច្បាប់៕
ចែករំលែកព័តមាននេះ