ខេត្តរតនគីរី ៖ ខ្យល់កន្ត្រាក់បណ្ដាលអោយខូចខាតផ្ទះប្រជាពលរដ្ឋចំនួន១០ខ្នង ក្នុងនោះផ្ទះចំនួន៤ខ្នងបានរលំបាករាបដល់ដី ដែលហេតុការណ៍នេះបានកើតឡើងកាលពីវេលាម៉ោង៩និង៣០យប់ថ្ងៃទី២៣ ខែមីនា ឆ្នាំ២០១៩ នៅឃុំត្រពាំងក្រហម ស្ថិតក្នុងស្រុកកូនមុំ ។…
ខេត្តរតនគីរី ៖ ខ្យល់កន្ត្រាក់បណ្ដាលអោយខូចខាតផ្ទះប្រជាពលរដ្ឋចំនួន១០ខ្នង ក្នុងនោះផ្ទះចំនួន៤ខ្នងបានរលំបាករាបដល់ដី ដែលហេតុការណ៍នេះបានកើតឡើងកាលពីវេលាម៉ោង៩និង៣០យប់ថ្ងៃទី២៣ ខែមីនា ឆ្នាំ២០១៩ នៅឃុំត្រពាំងក្រហម ស្ថិតក្នុងស្រុកកូនមុំ ។
ទាក់ទិននឹងហេតុការណ៍ខាងលើនេះ តាមរបាយការណ៍របស់សមត្ថកិច្ចមូលដ្ឋានបានអោយដឹងថា ទូទាំងទីរួមស្រុកកូនមុំមានភ្លៀងធ្លាក់យ៉ាងខ្លាំងនៅរដូវប្រាំងឆ្នាំនេះបានបង្កឱ្យមានខ្យល់កន្ត្រាក់ប៉ះពាល់ដល់ឃុំចំនួន៣ គឺ១-ឃុំត្រពាំងច្រេស ២-គឺឃុំត្រពាំងក្រហម និង៣-ឃុំស្រែអង្គ្រង ។ ដោយឡែកមានតែឃុំត្រពាំងក្រហមមួយគត់មានភ្លៀងធ្លាក់ខ្លាំងជាងគេគឺមានរយៈពេលជាង១ម៉ោងរហូតដល់មានខ្យល់បក់បោកយ៉ាងខ្លាំង ធ្វើអោយផ្ទះប្រជាពលរដ្ឋក្នុងឃុំត្រពាំងក្រហមចំនួន១០ខ្នងបានរងការខូចខាតយ៉ាងខ្លាំង ។
ប្រភពដដែលបានបន្តទៀតថា នៅក្នុងឃុំត្រពាំងក្រហម ស្រុកកូនមុំ ខ្យល់កន្ទ្រាក់បានបោកបក់ បណ្តាលឱ្យផ្ទះរបស់ប្រជាពលរដ្ឋរលំបាក់រាបដល់ដីចំនួន៤ខ្នង ចំណែកផ្ទះប្រជាពលរដ្ឋចំនួន៦ខ្នងទៀតគ្រាន់តែរបើកដំបូលសង្ក័សី និងរបើកជញ្ជាំង ។ ផ្ទះប្រជាពលរដ្ឋដែលរងការខូចខាតខាងលើនោះគឺធ្វើអំពីឈើប្រក់សង្ក័សី និងជញ្ចាំងបាំងក្ដារ ។
ក្នុងករណីខ្យល់កន្ត្រាក់ខាងលើនេះមិនបណ្ដាលអោយប្រជាពលរដ្ឋណាម្នាក់រងរបួស ឬបាត់បង់អាយុជីវិតនោះទេ ហើយនៅរសៀលថ្ងៃទី២៤ ខែមីនា ឆ្នាំ២០១៩ មានកម្លាំចំរុះរបស់ខេត្តបានចុះទៅជួយរើផ្ទះប្រជាពលរដ្ឋផងដែរ និងធ្វើរបាយការណ៍ជូនអោយកាកបាទក្រហមខេត្តដើម្បីជួយជាថវិកាខ្លះដល់ក្រុមគ្រួសាររងគ្រោះដោយគ្រោះធម្មជាតិ ៕
ចែករំលែកព័តមាននេះ