ខេត្តកំពង់ឆ្នាំង ៖ ខ្លោងទ្វារនិមិត្តសញ្ញាឆ្នាំងមួយកន្លែង ដែលអាជ្ញាធរខេត្តកំពង់ឆ្នាំងបានរៀបចំក្នុងពិធីបុណ្យទន្លេកន្លងទៅនេះ ត្រូវបានរថយន្តមិនស្គាល់ម៉ាកមួយគ្រឿងបុកបណ្តាលឲ្យបាក់រលំខូចខាតទាំង
ស្រុងកាលពីវេលាម៉ោង៣និង៤០នាទីទៀបភ្លឺថ្ងៃទី២៥ ខែមីនា ឆ្នាំ២០១៩ នៅចំណុចភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង។
សមត្ថកិច្ចនគរបាល មូលដ្ឋានបានឲ្យដឹងថា គ្រោងខ្លោងទ្វារនិមិត្តសញ្ញាឆ្នាំង ដែលតាំងលម្អភ្លើងពណ៌កាត់ទទឹងថ្នល់ជាតិលេខ ៥ នៅចំណុចភូមិដំណាក់ពពូលគឺត្រូវបានរថយន្តមិនស្គាល់ម៉ាក មួយគ្រឿងបើកបរក្នុងទិសដៅពីខេត្តកំពង់ឆ្នាំងទៅរាជធានីភ្នំពេញបានបុកបណ្ដាលឲ្យបាក់រលំទាំងស្រុងតែម្ដង ។ នេះបើយោងតាមប្រជាពលរដ្ឋបានរាយការណ៍ជូនសមត្ថកិច្ចនគរបាល ។
ប្រភពដដែលបានបន្តអោយដឹងថា កន្លងទៅខ្លោងទ្វារនិមិត្តសញ្ញាឆ្នាំងដែលឆ្លងកាត់ថ្នល់ជាតិនិងថ្នល់មួយចំនួនគឺត្រូវបានបំពាក់ភ្លើងបំភ្លឺរហូតមក ចាប់ពីពិធីបុណ្យទន្លេរហូតមក ប៉ុន្តែនៅយប់ថ្ងៃកើតហេតុ ខ្លោងទ្វារកាត់ទទឹងផ្លូវទាំងអស់ត្រូវបានបិទភ្លើងបំភ្លឺទាំងស្រុងតែម្ដង គឺមិនមែនដាច់ភ្លើងទេគឺផ្តាច់ចរន្តអគ្គិសនីតាមខ្លោងទ្វារនិមិត្តសញ្ញាឆ្នាំង ដែលគេដាក់កាត់ថ្នល់ជាតិ ។ ហេតុនេះហើយទើបធ្វើឲ្យរថយន្តមើលមិនឃើញ ស្មានមិនត្រូវ ទើបបណ្ដាលឲ្យបុកខ្ទេចទាំងប៉ាណូមួយកន្លែងនៅចំណុចខាងលើនេះតែម្ដង។
ទោះបីជាយ៉ាងនេះក្តី ក្រោយកើតហេតុ សមត្ថកិច្ចនគរបាលបានលើកខ្លោងទ្វារនិមិត្តសញ្ញាឆ្នាំងដែលដួលរលំលើថ្នល់ជាតិ មកដាក់តម្រៀបខាងចិញ្ចើមផ្លូវ ដើម្បីសម្រួលចរាចរណ៍ទាំងយប់ផងដែរ ។
គេមិនទាន់ដឹងថាតើមូលហេតុដែលផ្ដាច់ភ្លើងយប់ថ្ងៃកើតហេតុ បណ្ដាលមកពីអ្វីនោះទេ ? ប៉ុន្តែគ្រប់ផ្ទាំងប៉ាណូដែលឆ្លងកាត់ទទឹងផ្លូវ បើសិនជាគ្មានភ្លើងបំភ្លឺដាក់បំពាក់នៅលើហ្នឹងដូចសព្វដងទេ ប្រាកដជានឹងរងគ្រោះដូចខ្លោងទ្វារនិមិត្តសញ្ញាឆ្នាំងនេះទៀតជាមិនខាន ៕
ចែករំលែកព័តមាននេះ