ប្រទេសថៃ ៖ ឧត្ដមសេនីយប្រាយុទ្ធចាន់អូចា ដែលកាន់អំណាចនៅថៃចាប់តាំងពីរដ្ឋប្រហារឆ្នាំ២០១៤មក ពេលនេះចង់រក្សាអំណាចជានាយករដ្ឋមន្ត្រីស្របច្បាប់ តាមរយៈការបោះឆ្នោត។
កាលពីថ្ងៃទី២៤មីនា ក្រោយទៅបោះឆ្នោតសភា ឧត្ដមសេនីយអាយុ៦៥ឆ្នាំរូបនោះដែលពាក់វ៉ែនតាខ្មៅ បានលើកទឹកចិត្តបណ្ដាអ្នកបោះឆ្នោតឲ្យនាំគ្នាទៅបោះឆ្នោត ដើម្បីជួយដល់ការអភិវឌ្ឍន៍ប្រទេស។ លោកហាក់សម្ដែងនូវទំនុកចិត្ត ដែលលោកនឹងដណ្ដើមបានជ័យជម្នះក្នុងការបោះឆ្នោតនោះពិសេសចាប់តាំងពីព្រះរៀមព្រះមហាក្សត្រ កាលពីខែកុម្ភៈពុំអាចឈរឈ្មោះជាបេក្ខជននាយករដ្ឋមន្ត្រីប្រជែងជាមួយលោកមក។
លោកប្រាយុទ្ធខិតខំយកចិត្តប្រជាជន លោកតែងចុះទៅជួបញឹកញាប់ ជាមួយបណ្ដាអ្នកភូមិ ពិសេសពេលមានទឹកជំនន់ ហើយលោកក៏តែងជួបជារឿយៗជាមួយបណ្ដាមន្ត្រីរាជការផងដែរ។ លោកខិតខំតែងនិពន្ធបទភ្លេង ហើយបង្កើតបានបទចម្រៀង៨បទ ចាប់តាំងពីឆ្នាំ២០១៤មក។
ទោះបីយ៉ាងណាលោកប្រាយុទ្ធក៏បានជាប់ពាក់ព័ន្ធនឹងទំព័រខ្មៅងងឹតមួយចំនួននៃប្រវត្តិសាស្ត្រថៃផែរ។ ជារឿយៗលោកត្រូវបានគេចាត់ទុកជាអ្នកនាំឲ្យមានការវាយលុករបស់យោធា កាលពីថ្ងៃទី១៩ឧសភាឆ្នាំ២០១០ ប្រឆាំងជំរំរបស់ពួកអាវក្រហម ដែលកាន់កាប់ភាគកណ្ដាលក្រុងបាងកកដើម្បីទាមទារ ឲ្យនាយករដ្ឋមន្ត្រីសម័យកាលនោះលាលែងចេញពីតំណែង។ ការវាយលុកនោះបណ្ដាលឲ្យមនុស្សស្លាប់៩០នាក់និងរបួស១៩០០នាក់។ លោកក៏ជាអ្នកជួយទ្រទ្រង់ ដល់រដ្ឋប្រហារប្រឆាំងលោកថាក់ស៊ីនស៊ីណាវ៉ាត្រាកាលពីឆ្នាំ២០០៦ផងដែរ។
លោកប្រាយុទ្ធកើតក្នុងគ្រួសារមួយដែលរស់នៅនាភាគឦសានប្រទេស។ អាយុ២៦ឆ្នាំលោកក្លាយជាមេបញ្ជាការនៃកងឯកភាពការពារព្រះមហាក្សត្រីយានីក្នុងឆ្នាំ១៩៨០។ លោកមានកូនភ្លោះស្រី២នាក់។ លោកក្លាយជាមេបញ្ជាការយោធភូមិភាគកណ្ដាលប្រទេស ដែលមានក្រុងបាងកកផងដែរក្នុងឆ្នាំ២០០៦ មុនក្លាយជាជនលេខ២នៃកងទ័ពជើងគោក បន្ទាប់មកក្លាយជាប្រមុខយោធាក្នុងឆ្នាំ២០១០៕
ចែករំលែកព័តមាននេះ