ខេត្តកំពង់ចាម ៖ តាមរយៈបណ្តាញសង្គមក្នុងរយៈពេលប៉ុន្មានថ្ងៃនេះ មានការបង្ហោះករណីអំពើហិង្សា និងគំរាមសម្លាប់នៅក្នុងហាងអីុនធើណេតមានយីហោរ៥០៧ យ៉ាងកក្រើកមានទីតាំងនៅក្រោយសាលាវាលវង់ ក្នុងភូមិទី៣ សង្កាត់វាលវង់ ក្រុងកំពង់ចាម ។ ដោយជនសង្ស័យមានឋានៈវរសេនីយ៍ត្រីសាន្ត សុខុម ត្រូវបានគេស្គាល់ជាកូនប្រុសរបស់លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ បានរត់គេចខ្លួនក្រោយពីបានបង្កហិង្សារួច ហើយត្រូវកម្លាំងសមត្ថកិច្ចកំពុងតែតាមប្រមាញ់ចាប់ខ្លួនផងដែរ។
តាមសមត្ថកិច្ចបានប្រាប់ឲ្យដឹងថា ជនរងគ្រោះក្នុងអំពើហិង្សាខាងលើមា២នាក់ ក្នុងនោះមាន ១-ឈ្មោះ វ៉ាន់ ចាន់អទិច្ចបញ្ញា ភេទប្រុស អាយុ៣៥ឆ្នាំ នៅភូមិទី១ សង្កាត់វាលវង់ ក្រុងកំពង់ចាម និង២-ឈ្មោះ យ៉េ ចិន្តា ភេទប្រុស អាយុ២៨ឆ្នាំ នៅភូមិទី៦ សង្កាត់ក្រុងជាមួយនឹងអ្នកទី១ដែរ ។
សមត្ថកិច្ចបានរំលឹកថា នៅល្ងាចថ្ងៃទី២៣ មីនា ២០១៩ អ្នករងគ្រោះទាំង២នាក់បានមកដាក់ពាក្យ បណ្តឹងនៅស្នងការដ្ឋាននគរបាលខេត្ត ដើម្បីឲ្យលោកឧត្តមសេនីយ៍ទោ ឯម កុសល ស្នងការនគរបាល
ខេត្តជួយអន្តរាគមន៍តាមចាប់ខ្លួនជនបង្កនោះ។
ដោយយោងតាមពាក្យបណ្តឹងរបស់អ្នករងគ្រោះបានបញ្ជាក់ថា នៅម៉ោង១១និង៤៥នាទីយប់ ថ្ងៃទី១៨ មីនា ២០១៩ ក្នុងខណៈដែលពួកគេកំពុងតែអង្គុយលេងហ្គេមតាមអនឡាញនៅផ្ទះណេតយីហោ៥០៧ ម្តុំក្រោយសាលាវាលវង់ ដោយក្នុងនោះមានមនុស្សពី៥ទៅ៦នាក់កំពុងតែនាំគ្នាលេងហ្គេម ស្រាប់តែឈ្មោះសាន្ត សុខុម ភេទប្រុស អាយុប្រហែល៣០ឆ្នាំ បានជិះរថយន្តម៉ាកឡិចស៊ីស៥៧០ពណ៌ស ពាក់ស្លាកលេខខេមរភូមិន្ទ ជាមួយនិងមនុស្សម្នាក់ទៀតមិនស្គាល់ឈ្មោះមកឈប់នៅមុខហាង ហើយបើកទ្វាររថយន្តដើរចុះមក រួចចូលក្នុងហាងបានចាប់ទាញអាវពួកគេឲ្យចូលទៅក្នុងរថយន្ត និងបានយកកាំភ្លើងខ្លីម៉ាកឡុកមកភ្ជង់លើពួកគេទាំង២នាក់។
ជនរងគ្រោះបន្តថា គ្រានោះពួកគេបានចុះពីលើរថយន្តមកចូលក្នុងហាងណេត ក៏ត្រូវបានឈ្មោះសុខុម ដើរតាមពីខាងក្រោយចូលមកដែរ និងបានទះកំផ្លៀងមកលើពួកគេចំនួន៤កំភ្លៀងថែមទៀត និងបានដកកាំភ្លើងខ្លីភ្ជង់ បន្ទាប់មកពួកគេបានគេចខ្លួនពីកន្លែងលេងហ្គេមមកផ្ទះបាត់ទៅ ។ ជនរងគ្រោះសំណូមពរសូមឲ្យសមត្ថកិច្ចចាត់វិធានការតាមច្បាប់លើជនបង្ក ។
លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះវិញបានបំភ្លឺអង្គភាពព័ត៌មានក្នុងស្រុកមួយ ដោយបានលើកហេតុផលថា រូបលោកសូមទទួលស្គាល់កំហុសរបស់កូនប្រុសឈ្មោះសាន្ត សុខុម តែអង្គហេតុដំបូងកូនប្រុសរបស់លោកបានជិះរថយន្តទៅដល់ហាងណេតខាងលើ និងបានជួបមិត្តភក្តិកូនប្រុសឈ្មោះសាន្ត សុវិជ្ជា ដោយបានសួរនាំរកទីកន្លែងដែលបញ្ចាំម៉ូតូ និងខ្សែ.កដែលកូនប្រុសបានលេងល្បែងចាញ់ ដើម្បីលោះត្រឡប់មកវិញ ដោយសារតែមិនព្រមប្រាប់នោះ ក៏បណ្តាលឲ្យមានជម្លោះកើតឡើងតែម្តង ។ គាត់ថា កូនប្រុសពៅរបស់គាត់កន្លងមក ធ្លាប់យករថយន្តរបស់គាត់ (សាន្ត ប៊ុនថាន) ទៅបញ្ចាំដោយសារតែចាញ់ល្បែង ។
លោកឧត្តមសេនីយ៍ត្រី សោ សាវឿន មេបញ្ជាការកងរាជអាវុធហត្ថខេត្តកំពង់ចាមវិញឲ្យដឹងថា រឿងហេតុកើតឡើងនៅថ្ងៃទី១៨ មីនា ២០១៩ ហើយជនរងគ្រោះបានដាក់ពាក្យបណ្តឹងនៅល្ងាចថ្ងៃទី២៣ មីនា ២០១៩ នៅស្នងការដ្ឋាននគរបាលខេត្តដើម្បីឲ្យជួយអន្តរាគមន៍ ហើយជនបង្កជាមន្ត្រីអាវុធហត្ថនោះ កម្លាំងរបស់លោកកំពុងតែបំពេញនីតិវិធីច្បាប់ហើយ ៕
ចែករំលែកព័តមាននេះ