ខេត្តពោធិ៍សាត់៖ ជនរងគ្រោះដែលផ្ទុះគ្រាប់របួសឡើងសុះសាច់ ហើយបញ្ជូនមកព្យាបាលនៅមន្ទីរពេទ្យបង្អែកខេត្តនោះ មកដល់ថ្ងៃទី២៣ ខែមីនា ឆ្នាំ២០១៩ ម៉ោង១០និង៣០នាទីព្រឹកនេះ ក្រុមគ្រូពេទ្យបានវះយកអំបែងតូចធំពីក្នុងខ្លួនអស់ទាំងស្រុងហើយ ដែលអំបែងខ្លះមុតចូលដល់ក្នុងសួតឯណោះ។
ជនរងគ្រោះខាងលើឈ្មោះ ប៉ិច ហឹម ភេទប្រុស អាយុ៤៤ឆ្នាំ រស់នៅភូមិអូរតាទិន ឃុំក្រពើពីរ ស្រុកវាលវែង ខេត្តពោធិ៍សាត់។
លោក ខូយ រីដា អភិបាលរងខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត និងលោក ហេង សុភាណា អភិបាលស្រុកវាលវែង បានទៅសួរសុខទុក្ខដល់មន្ទីរពេទ្យ ព្រមទាំងបានឧបត្ថម្ភថវិកាមួយចំនួនដល់គ្រួសារជនរងគ្រោះផងដែរ។ លោកបានសំដែងការសោកស្ដាយចំពោះឧបទ្ទវហេតុដែលកើតមានឡើងលើរូបលោក ប៉ិច ហឹម នេះ ប៉ុន្តែទោះយ៉ាងណា ត្រូវបានក្រុមគ្រូពេទ្យយកចិត្តទុកដាក់ជួយសង្គ្រោះឲ្យរួចផុតជីវិតហើយ។
លោក ខូយ រីដា បានអំពាវនាវដល់បងប្អូនប្រជាពលរដ្ឋទាំង៥ឃុំនៅស្រុកវាលវែង កាប់ឆ្ការ ភ្ជួរ និងឈួសឆាយដី មេត្តាមានការប្រុងប្រយ័ត្ន ព្រោះនៅមានគ្រាប់យុទ្ធភ័ណ្ឌមិនទាន់ផ្ទុះរាយកប់ក្នុងដីជាច្រើនទៀត ដែលបន្សល់ទុកកាលពីសម័យសង្គ្រាម។
សូមបញ្ជាក់ថា កាលពីថ្ងៃទី២១ ខែមីនា ឆ្នាំ២០១៩ វេលាម៉ោង០៤និង៣០នាទីរសៀល ជនរងគ្រោះឈ្មោះ ប៉ិច ហឹម បានយកគោយន្ដកន្ត្រៃទៅភ្ជួរដីចំការនៅភូមិអូរតាទិន ឃុំក្រពើពីរ ស្រុកវាលវែង ដើម្បីដាំដំឡូងមី ខណៈពេលកំពុងតែភ្ជួរនោះ ស្រាប់តែប៉ះគ្រាប់យុទ្ធភ័ណ្ឌមិនទាន់ផ្ទុះផ្ទុះឡើងកក្រើកដី បណ្ដាលឲ្យអំបែងមុតសុសសាច់ដេកសន្លប់ក្នុងថ្លុកឈាម។
សមត្ថកិច្ចឲ្យដឹងថា គ្រាប់ដែលផ្ទុះបង្កគ្រោះថ្នាក់នេះមិនមែនគ្រាប់មីនទេ គឺប្រភេទគ្រាប់ DK ដែលជាកាកសំណល់បន្សល់ទុកកាលពីសម័យសង្គ្រាម ៕
ចែករំលែកព័តមាននេះ