ខេត្តស្វាយរៀង ៖ ទីបំផុត ការជំទាស់របស់អ្នកភូមិក្រូច មិនឱ្យដឹកដើមស្វាយប៉ាកអាយុជាង២០០ឆ្នាំទៅស្រុកយួន ព្រមទាំងស្វែងរកអាជ្ញាធរខេត្តឱ្យជួយសង្គ្រោះដើមស្វាយប៉ាកមួយដើមនេះត្រូវបរាជ័យ ដែលធ្វើឲ្យពួកគាត់ខកចិត្តយ៉ាងខ្លាំង ព្រោះតែអាជ្ញាធរមិនព្រមជួយសង្គ្រោះ ។ ប៉ុន្តែបែរជាបើកដៃឲ្យឈ្មួញយកអេស្កាវ៉ាទ័រ២គ្រឿង មកស្ទូចដើមស្វាយប៉ាកដាក់លើរថយន្តដឹកឆ្លងដែនទៅប្រទេសវៀតណាមយ៉ាងរំភើយ កាលពីវេលាម៉ោង១និង១០នាទី រំលងអធ្រាតថ្ងៃទី២១ ខែមីនា ដោយសារតែដើមស្វាយប៉ាកយក្ស១ដើមនេះមានតម្លៃជិត១ម៉ឺនដុល្លារ ពេលឆ្លងដែនចូលដីវៀតណាម ។
បើតាមមន្ត្រីយោធាម្នាក់បានបង្ហើបឲ្យដឹងថា ឈ្មួញបានដឹកឆ្លងដែនតាមច្រករបៀងប៉ុស្តិ៍ត្រឡោកបែក ក្នុងភូមិតាសួស ឃុំដូង ស្រុករមាសហែក ។ សូមរំឭកថា កាលពីព្រឹកថ្ងៃទី២០ ខែមីនា កន្លងទៅ នៅភូមិក្រូច ឃុំជ្រុងពពេល ស្រុករំដួល អ្នកភូមិបានស្វះស្វែងរកការសង្គ្រោះដើមស្វាយប៉ាកនេះ និងបានរារាំង២លើកមិនឱ្យក្រុមឈ្មួញស្ទូចដឹកចេញ តែការរារាំងមិនមានប្រសិទ្ធភាពទេ ដោយត្រូវមន្ត្រីខិលខូចឃុបឃិតជាមួយឈ្មួញ នាំដើមស្វាយប៉ាកនេះចេញទៅប្រទេសវៀតណាមគួរឲ្យស្តាយ ។
បើតាមចាស់ទុំក្នុងភូមិក្រូចម្នាក់ អាយុ៨២ឆ្នាំ បានឲ្យដឹងថា នាព្រឹកថ្ងៃទី១៨ ខែមីនា ក្រុមឈ្មួញបាននាំគ្នាមកគាស់រំលើងដើមស្វាយប៉ាកមួយដើមនេះ ស្ថិតនៅភូមិក្រូច ដែលមានទំហំប៉ុនកង់រទេះ កម្ពស់ជាង២០ម៉ែត្រ មានមែកសាខា ជាស្វាយដ៏កម្រដែលអាចនឹងបាត់ផុតពូជ ក្នុងស្រុកខ្មែរទៅហើយ ។ ដើមស្វាយនេះមានអាយុជាង២០០ឆ្នាំមកហើយ ដែលគាត់កើតមកឃើញស្វាយនេះធំប៉ុនកង់រទេះទៅហើយ ។
លោកតាបានឲ្យដឹងទៀតថា ស្វាយបា៉កនេះមាន២ដើម ក៏ប៉ុន្តែនៅអំឡុងឆ្នាំ១៩៩៧ រន្ទះបាញ់ងាប់អស់មួយដើម ដែលនៅចម្ងាយពីគ្នាប្រមាណ២០ម៉ែត្រ នៅសល់មួយដើមនេះផ្លែរាល់ឆ្នាំ ទុំជ្រុះក្រាលពេញដី ។ ផ្លែស្វាយប៉ាក មានរាងសំប៉ែត ធំជាងស្វាយខ្លាំបន្តិច ផ្លែខ្ចីមានរសជាតិជូរអាចយកមកហូបឬសាប់ដាក់ទឹកត្រីហូបបាន ។ ពេលទុំមានក្លិនក្រអូប ហើយរសជាតិផ្អែម ក៏ប៉ុន្តែពេលហូបទៅរមាស់កបន្តិច ។ ប្រជាពលរដ្ឋដែលមានវ័យចំណាស់ មានការសោកស្តាយយ៉ាងខ្លាំង ព្រោះដើមស្វាយប៉ាកនេះធ្លាប់ផ្តល់ម្លប់ត្រជាក់ត្រឈឹងត្រឈៃសម្រាប់មនុស្ស សត្វ ជ្រក ។
ដើមស្វាយប៉ាកយក្ស១ដើមនេះ ក្រោយពីមានការគាស់រំលើងគល់ហើយនោះ អ្នកភូមិដែលមានការសសោកស្តាយ បាននាំគ្នារារាំងជាបន្តបន្ទាប់នៅថ្ងៃទី១៨ ខែមីនា ។ លុះនៅថ្ងៃទី១៩ខែមីនា វេលាម៉ោង៦ល្ងាច ក៏នាំគ្នារារាំងទៀតខណៈឈ្មួញយកអេស្កាវ៉ាទ័របម្រុងលើកដាក់លើរថយន្ត ។ នៅថ្ងៃទី២០ ខែមីនា ពេលក្រុមឈ្មួញកំពុងរត់ការខ្វែងដៃខ្វែងជើង និងត្រៀមអេស្កាវ៉ាទ័រចំនួន២គ្រឿងសម្រាប់លើកដាក់លើរថយន្ត និងដឹកចេញនៅពេលយប់ ។
ទាក់ទិននឹងករណីខាងលើនេះ លោក សុក ខារ៉ាម អភិបាលស្រុករំដួល មានប្រសាសន៍ថា លោកបានឲ្យសមត្ថកិច្ចនគរបាលចុះហាមឃាត់ហើយ បើគ្មានច្បាប់ពីមេព្រៃនិងច្បាប់អនុញ្ញាតពីថ្នាក់លើទេ គឺមិនអនុញ្ញាតឲ្យដឹកចេញឡើយ ។ ផ្ទុយទៅវិញ ទឹកមាត់លោកអភិបាលស្រុកសាបដូចទឹកទន្លេ ហើយក្រុមឈ្មួញបានទទួលជ័យជម្នះ ៕
ចែករំលែកព័តមាននេះ