រាជធានីភ្នំពេញ ៖ ស្របពេលកម្ពុជាកំពុងតែប្រឈមនឹងការបាត់បង់ប្រព័ន្ធអនុគ្រោះពន្ធអ្វីគ្រប់យ៉ាងលើកលែងតែអាវុធ (EBA) ស្រាប់តែកម្ពុជាបានសម្រេចបានជោគជ័យនូវការចរចារថ្មីមួយ ដែលបើកផ្លូវថ្មីមួយសម្រាប់កម្ពុជា អាចនាំចេញទំនិញនិងផលិតផលចំនួន៤៦មុខ ទៅកាន់ប្រទេសជាសមាជិកសហភាពសេដ្ឋកិច្ចអឺរ៉ុប-អាស៊ី ចំនួន៥ ដែលមានប្រជាជនចំនួនជាង ១៨០ លាននាក់ ។
លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានមានប្រសាសន៍ឲ្យដឹងនៅថ្ងៃទី២១ ខែមីនា នេះថា តាមរយៈសិក្ខាសាលាស្តីពី «ការផ្សព្វផ្សាយភាពអនុគ្រោះពន្ឋ លើមុខទំនិញដែលកម្ពុជាទទួលបានពីសហភាពសេដ្ឋកិច្ចអឺរ៉ុប អាស៊ី (EAEU)» ធ្វើឡើងនាថ្ងៃទី ២១ ខែមីនា ម្សិលមិញនេះ យើងបានដឹងថាប្រទេសចំនួន៥ ដែលជាសមាជិកសហភាពសេដ្ឋកិច្ចអឺរ៉ុប-អាស៊ី បានអនុញ្ញាត្តឲ្យកម្ពុជានាំចេញដោយរួចពន្ឋនូវមុខទំនិញជាច្រើនប្រភេទ ដូចជា ផលិតផលកសិកម្ម អង្ករ កៅស៊ូ សម្ភារៈប្រើប្រាស់ និងផលិតផលវាយណភ័ណ្ឌកាត់ដេរ និងស្បែកជើងជាដើម។ ទីផ្សារអន្តរជាតិថ្មី សម្រាប់ការនាំចេញផលិតផលនិងទំនិញផ្សេងៗពីកម្ពុជាទៅក្នុងសហគមន៍អឺរ៉ុបអាស៊ី រួមមាន ប្រទេសរុស្ស៊ី ប្រទេស បេឡារ៉ុស ប្រទេសកាហ្សាក់ស្ថាន ប្រទេសអាមេនី និង កៀហ្ស៊ីស៊ីស្ថាន ។
លោកឧកញ៉ា លឹម ហេង មានប្រសាសន៍បញ្ជាក់ថា «ការពិតប្រទេសទាំងនោះ ជាទីផ្សារកម្ពុជាធ្លាប់នាំចេញរួចហើយ ប៉ុន្តែទំហំពាណិជ្ជកម្មកម្ពុជាស្ថិតនៅមានក្នុងកម្រិតនៅ ឡើយ ហេតុនេះទើបយើងជំរុញឲ្យវិស័យឯកជន ពង្រីកទីផ្សារទៅកាន់ប្រទេសទាំងនោះ» ។លោក បន្តថា «ការពិតប្រទេសទាំងនោះបានអនុញ្ញាត្តឲ្យយើងនាំចេញទំនិញរាប់ម៉ឺនមុខ ប៉ុន្តែការនាំចេញត្រូវបង់ពន្ឋតាមការកំណត់របស់អង្គការពាណិជ្ជកម្មពិភពលោក តែពន្ឋមានកម្រិតទាបប៉ុណ្ណោះ» ។
ក្រោយពីការចរចារទទួលបានជោគជ័យសម្រាប់ការអនុគ្រោះពន្ធនូវមុខទំនិញជាង៤០មុខនាំចេញទៅកាន់ទីផ្សារអឺរ៉ុប អាស៊ី ដែលមានប្រទេសធំៗចំនួនប្រាំ កម្ពុជាក៏បានផ្សព្វផ្សាយដល់បណ្ដាវិនិយោគិននិងផលិតក្នុងស្រុក ដើម្បីពង្រីកការផលិតសម្រាប់នាំចេញទៅកាន់ទីផ្សារថ្មីនេះ ស្របពេល EBA កំពុងស្ថិតនៅភាពមិនច្បាស់លាស់ ។
នៅក្នុងកិច្ចសម្ភាសន៍ជាមួយអ្នកសារព័ត៌មានក្នុងស្រុកជាច្រើន កាលពីព្រឹកថ្ងៃទី២១ មីនា ២០១៩នេះ លោកជំទាវ តឹក រ៉េតកម្រង រដ្ឋ លេខាធិការក្រសួងពាណិជ្ជកម្មកម្ពុជា បានមានប្រសាសន៍ថា វាជាឱកាស និងសក្ដានុពលថ្មីមួយសម្រាប់ទំនិញកម្ពុជា នៅលើទីផ្សារអន្តរជាតិ ដែលសហគមន៍អាស៊ី អឺរ៉ុប បានផ្ដល់មកអោយកម្ពុជា ។ លោកជំទាវមានប្រសាសន៍ថា៖ « នៅពេលដែលយើងបានចរចារសម្រេចហើយ ដែលគេបានផ្ដល់នូវការអនុគ្រោះពន្ធមកលើកម្ពុជា ដូច្នេះការងារបន្តទៀតនោះ គឺជាការខិតខំប្រឹងប្រែងរបស់វិស័យឯកជនម្ដង ថាតើពួកគាត់ធ្វើបានជោគជ័យប៉ុនណា និងអាចមានសមត្ថភាព នាំចេញបានប៉ុនណា » ។
លោកជំទាវ តឹក រ៉េតកម្រង បានពន្យល់ឲ្យដឹងថា ទីផ្សារថ្មីនេះ មានលក្ខណៈខុសពី EBA ត្រង់ថា EBA ជាការអនុគ្រោះពន្ធគ្រប់មុខទំនិញ លើកលែងអាវុធ តែសម្រាប់ការអនុគ្រោះពន្ធ ដែល សហគមន៍អឺរ៉ុបអាស៊ី ផ្ដល់ជូននៅពេលនេះ គឺមានមុខទំនិញតែ៤៦មុខប៉ុណ្ណោះ ដែលរួមមាន អង្ករ គ្រាប់ធញ្ញជាតិមួយចំនួន ត្រីសាច់ សម្លៀកបំពាក់ ស្បែកជើង ស្រោមដៃស្រោមជើង និងកន្សែងជាដើម ដែលទំនិញទាំងអស់នេះ ក៏បាននាំចេញរួចទៅហើយ ។ លោកជំទាវ មានប្រសាសន៍បន្តថា « ពេលនេះ យើងចង់អោយវិស័យឯកជនត្រូវពង្រឹងនិងពង្រីកសក្ដាពលបន្ថែមសម្រាប់នាំចេញទៅកាន់ទីផ្សារទាំងនោះ ក្នុងពេលដែលគេបានផ្ដល់ឱកាសដល់យើង » ។ លោកជំទាវ តឹក រ៉េតកម្រង បន្ថែមថា ក្នុងបណ្ដាប្រទេសដែលស្ថិតនៅក្នុងសហគមន៍អឺរ៉ុបអាស៊ី សុទ្ធសឹងតែជាប្រទេសធំៗ និងមានប្រជាជនសរុបប្រមាណ១៨០លាននាក់ ព្រមទាំងជាប្រទេសដែលមានប្រាក់ចំណូលខ្ពស់ៗផងដែរ ជាក់ស្ដែងក្នុងមួយឆ្នាំ ចំណូលរបស់ប្រជាជននៅបណ្ដាប្រទេសក្នុងសហគមន៍នេះមានរាប់ម៉ឺនដុល្លារអាមេរិក ឯណោះ ហើយក៏ជាប្រទេសដែលមានតម្រូវការនូវផលិតផលរបស់ប្រទេសកម្ពុជាផងដែរ ។
លោកជំទាវបញ្ជាក់ថា ការអនុគ្រោះពន្ធនេះ គឺធ្វើឡើងដោយសារតែគេគិតថាប្រទេសកម្ពុជា ស្ថិតនៅក្នុងចំណោមប្រទេសអភិវឌ្ឍន៍តិចតួច ដូច្នេះ នៅពេលដែលប្រទេសកម្ពុជារួចផុតពីប្រទេសអភិវឌ្ឍន៍តិចតួច នោះការអនុគ្រោះពន្ធនោះ នឹងត្រូវដាច់ដោយស្វ័យប្រវត្តិ ។ ជុំវិញបញ្ហាដែលថ្នាក់ដឹកនាំក្រសួង ពាណិជ្ជ កម្ម ចង់អោយវិស័យឯកជនត្រូវពង្រឹងនិងពង្រីកសក្ដានុពលបន្ថែមសម្រាប់នាំចេញទៅកាន់ទីផ្សារអន្តរជាតិមួយនេះ លោកឧកញ៉ា លឹម ហេង មានប្រសាសន៍ផងដែរថា អ្វីដែលវិស័យឯកជនប្រឈមនឹងការប្រកួតប្រជែងសម្រាប់នាំចេញទៅកាន់ទីផ្សារអន្តរជាតិ គឺបញ្ហាថ្លៃដើម នៅខ្ពស់ ក៏ប៉ុន្តែកន្លងមកនេះ រដ្ឋាភិបាលកម្ពុជា បានផ្ដល់នូវដំណោះស្រាយមួយចំនួនហើយផងដែរ ដល់វិស័យឯកជន ដូចជាការដកស្ថាប័នមួយចំនួន កាំសាប កាំងកុងត្រូលនៅតាមព្រំដែនជាដើម ។
លោក បន្តថា « បញ្ហាមួយទៀតដែលវិស័យឯកជនតែងតែរអ៊ូនោះគឺបញ្ហាដឹកជញ្ជូន តែរដ្ឋាភិបាលកម្ពុជា បានប្រកាសសម្ពោធផ្លូវល្បឿនលឿនមួយ ពីភ្នំពេញ-ព្រះសីហនុ ដូច្នេះនៅពេលផ្លូវនេះរួចរាល់ វានឹងកាត់បន្ថយនូវការចំណាយតាមថ្លៃដឹកជញ្ជូនផងដែរ » ។
លោកឧកញ៉ាលឹម ហេង បានបន្តថា លក្ខខ័ណ្ឌនៃការនាំចេញទៅកាន់ប្រទេសទាំង៥នោះ មានភាពដូចគ្នានឹងលក្ខខ័ណ្ឌនៃ EBA ដែលនាំចេញទៅអឺរ៉ុបផងដែរ មានន័យថានៅពេលប្រទេសយើងមានប្រាក់ចំណូលកាន់តែខ្ពស់ ការលើកលែងពន្ឋទាំងនោះនឹងត្រូវបញ្ចប់ដោយស្វ័យប្រវត្តិ។ លោកបន្តថា ប្រសិនជាកម្ពុជាត្រូវដក EBA ក៏ដោយ កម្ពុជានឹងមានឱកាសនាំចេញដោយរួចពន្ឋទៅកាន់អឺរ៉ុបនាពេលអនាគតផងដែរ ព្រោះបច្ចុប្បន្នអាស៊ាន និងអឺរ៉ុបកំពុងចចារក្នុងការនាំចេញ ក្រោមប្រព័ន្ឋអនុគ្រោះ
ពន្ឋលើគ្រប់មុខទំនិញលើកលែងតែអាវុធ (EBA) ផងដែរ ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ