ខេត្តស្វាយរៀង ៖ អ្នកភូមិបានអំពាវនាវដល់អាជ្ញាធរខេត្តជួយសង្គ្រោះស្វាយប៉ាកមួយដើម មានអាយុជាង២០០ឆ្នាំ ត្រូវឈ្មួញគាស់ហើយកំពុងរត់ការដឹកឆ្លងព្រំដែនទៅប្រទេសវៀតណាម ដោយមានតម្លៃជិត១ម៉ឺនដុល្លារ ប្រសិនបើនាំចូលដីវៀតណាមបាន ។ ការអំពាវនាវរកអាជ្ញាធរជួយសង្គ្រោះនេះ កើតឡើងកាលពីព្រឹកថ្ងៃទី២០ មីនា នៅភូមិក្រូចឃុំជ្រុងពពេលស្រុករំដួល ។
លោកតាម្នាក់អាយុ៨២ឆ្នាំ និងជាចាស់ទុំក្នុងភូមិបានឲ្យដឹងថា នៅព្រឹកថ្ងៃទី១៨ មីនា ក្រុមឈ្មួញបាននាំគ្នាមកគាស់រំលើង ដើមស្វាយប៉ាកដ៏ធំមួយដើមនេះ ដែលមានទំហំប៉ុនកង់រទេះ កម្ពស់ជាង២០ម៉ែត្រ មានមែកសាខាជាពូជស្វាយដ៏កម្រដែលបាត់ឈ្មោះផុតពូជនៅស្រុកខ្មែរហើយ ។ ដើមស្វាយនេះ មានអាយុជាង២០០ឆ្នាំមកហើយ ព្រោះពេលលោកតាកើតមក ក៏ឃើញដើមស្វាយនេះប៉ុនកង់រទេះទៅហើយ ។ លោកតាប្រាប់បន្តថា ពេលគាត់កើតមកក៏ឃើញដើមស្វាយប៉ាកនេះធំទៅហើយ ។
លោកតាបានឲ្យដឹងទៀតថា ដើមស្វាយបា៉កនេះ មាន២ដើម ក៏ប៉ុន្តែនៅក្នុងអំឡុងឆ្នាំ១៩៩៧ រន្ទះបាញ់ងាប់អស់មួយដើម ដែលនៅចម្ងាយពីគ្នា២០ម៉ែត្រ នៅសល់មួយដើមនេះផ្លែរាល់ឆ្នាំ ទុំជ្រុះក្រាលពេញដីក្រោមដើម ។ ផ្លែស្វាយប៉ាក មានរាងសំប៉ែត ផ្លែខ្ចីមានជាតិជូរអាចយកមកហូប ឬសាប់ដាក់ទឹកត្រីហូបបាន ពេលទុំមានក្លិនក្រអូបហើយរសជាតិផ្អែម ក៏ប៉ុន្តែពេលញ៉ាំទៅរមាស់កបន្តិច ។
អ្នកភូមិចាស់ទុំមានការសោកស្តាយជាខ្លាំង ដោយដើមស្វាយប៉ាកនេះមានម្លប់ត្រជាក់ត្រឈឹងត្រឈៃ សម្រាប់មនុស្សសត្វជ្រកកម្ដៅ ហើយវាជាដើមឈើដែលកម្រជិតផុតពូជទៅហើយ ដែលមនុស្សតិចណាស់បានស្គាល់ ។ ប្រភពដ៏ដែលបន្តទៀតថា ម្ចាស់ដើមស្វាយប៉ាកបានលក់ឲ្យឈ្មួញក្នុងតម្លៃ៩០០ដុល្លារ ដោយប្រាប់ថា គេជាជនជាតិវៀតណាមនៅទីក្រុងហាណូយ មកទិញយកទៅដាំនៅទីក្រុងហាណូយ ដោយឲ្យឈ្មួញខ្មែរជាអ្នករត់ការដឹកដល់ព្រំដែន ហើយឆ្លងចូលដល់ដីវៀតណាមគេឲ្យតម្លៃ៩,០០០ដុល្លារ បើគិតទាំងថ្លៃទិញគឺជិត១ម៉ឺនដុល្លារ ។
នៅថ្ងៃទី១៨ មីនា នេះ ឈ្មួញបានមកគាស់ហើយរៀបនឹងដឹកចេញ ក៏ត្រូវអ្នកភូមិចាស់ទុំច្រើននាក់ តវា៉ប្តឹងទៅលោកមេឃុំជ្រុងពពេល និងលោកអភិបាលស្រុករំដួលឲ្យជួយអន្តរាគមន៍ ទើបក្រុមឈ្មួញបានផ្អាកការលើកដើមស្វាយប៉ាកនេះម្ដងមកហើយ ។ លុះដល់ថ្ងៃទី១៩ មីនា វេលាម៉ោង៦ល្ងាច ឈ្មួញបាននាំគ្នាយកអេស្កាវា៉ទ័របម្រុងលើកដាក់លើរថយន្តទៀត តែត្រូវអ្នកភូមិលើកគ្នាប្តឹងទៅលោកអភិបាលស្រុករំដួល ឲ្យជួយអន្តរាគមន៍ទប់ស្កាត់ ទើបមានការផ្អាកជាលើកទី២ ។ នៅថ្ងៃទី២០ មីនា ក្រុមឈ្មួញបានរត់ការខ្វែងដៃខ្វែងជើង ទំនងរត់ការបុកបើកដើមទ្រូងមន្ត្រីខ្លះហើយមើលទៅ ទើបឃើញអេស្កាវ៉ាទ័រចំនួន២គ្រឿង មកត្រៀមសម្រាប់លើកដាក់លើរថយន្ត ចង់ដឹកចេញនៅពេលយប់ ។
ទាក់ទិនករណីខាងលើនេះ លោក សុក ខារ៉ាម អភិបាលស្រុករំដួលបានមានប្រសាសន៍ថា លោកបានឲ្យសមត្ថកិច្ចនគរបាលចុះហាមឃាត់ហើយ បើគ្មានច្បាប់ពីមេព្រៃ និងច្បាប់អនុញ្ញាតិពីថ្នាក់លើទេ គឺមិនអនុញ្ញាតិឲ្យដឹកចេញឡើយ។ ចំណែកចាស់ទុំ និងអ្នកភូមិសំណូមពរដល់អាជ្ញាធរសូមឲ្យជួយទប់ស្កាត់ និងសូមឲ្យមន្ទីរជំនាញ ដឹកដើមស្វាយប៉ាកនេះយកទៅដាំនៅវត្តណាមួយ ដើម្បីទុកជាសម្បត្តិសាធារណៈ និងសង្គ្រោះដើមស្វាយប៉ាកដ៏កម្រនេះឲ្យមានជីវិតបន្តទៀត ធ្វើម៉េចបើឈ្មួញគាស់ផ្ដួលរំលំទៅហើយ មានតែដឹកយកទៅដាំនៅទីតាំងមានសុវត្ថិភាពណាមួយទើបមិនផុតពូជ ៕
ចែករំលែកព័តមាននេះ