ខេត្តកណ្តាល ៖ កម្លាំងសមត្ថកិច្ចនគរបាលប៉ុស្តិ៍រដ្ឋបាលគគីរបានធ្វើការឃាត់ខ្លួនជនសង្ស័យម្នាក់ជាកូនតាមពាក្យបណ្តឹងរបស់ជនរងគ្រោះជាម្តាយ ក្នុងករណីប្រើអំពើហិង្សាក្នុងគ្រួសារវាយម្តាយបណ្តាលអោយមានរបួសស្នាមកាលពីវេលាម៉ោង១២និង៣០នាទីថ្ងៃត្រង់ថ្ងៃទី២០ ខែមីនា ឆ្នាំ២០១៩ នៅចំណុចផ្ទះជនរងគ្រោះ ស្ថិតក្នុងភូមិដូនសឃុំគគីរ ស្រុកកៀនស្វាយ ខេត្តកណ្តាល។
ជនសង្ស័យជាកូនឈ្មោះឃុន រតនា (ហៅឆ្មេញ) ភេទប្រុស អាយុ២៤ឆ្នាំ មានទីលំនៅភូមិ-ឃុំកើតហេតុខាងលើ។ ចំណែកជនរងគ្រោះជាម្តាយឈ្មោះអែល មុំ អាយុ៤៩ឆ្នាំ ស្នាក់នៅផ្ទះជាមួយគ្នា បានរងរបួសជាំមុខ, ស្នាមមុតម្រាមដៃខាងស្តាំ និងខូចខាតវិទ្យុមួយគ្រឿង។
តាមរបាយការណ៍របស់សមត្ថកិច្ចបានបញ្ជាក់អោយដឹងថា នៅមុនពេលកើតហេតុ ជបរងគ្រោះជាម្តាបានត្រឡប់មកពីចូលរួមកម្មវិធីបុណ្យផ្ទះអ្នកជិតខាង ហើយកំពុងប្តូរសំលៀកបំពាក់ចេញ ស្រាប់តែជនសង្ស័យជាកូនក៏បានត្រឡប់មកពីលេងបុកប៊ីយ៉ែវិញផងដែរ ពេលនោះស្ត្រីជាម្តាយបានស្តីបន្ទោស និងជេរជនសង្ស័យជាកូន២-៣មាត់ ធ្វើអោយជនសង្ស័យជាកូនខឹងស្ទុះទៅយកវិទ្យុបោកទៅលើដី បណ្តាលឲ្យ បែកខ្ទេច ។
ប្រភពដដែលបានបន្តថា ពេលនោះជនរងគ្រោះជាម្តាយបានសួរជនសង្ស័យថា «ម៉េចហ្អែងបោកវិទ្យុអញចោលអញ្ចឹង?» ភ្លាមនោះជនសង្ស័យបានស្រែកដេញម្តាយថា «ចេញពីផ្ទះអញទៅ» ។ បន្ទាប់មកស្ត្រីជាម្តាយមិនបានតបតវិញនោះទេ ក៍ដើរទៅមុខផ្ទះដើម្បីដឹកគោ ។ ស្រាប់តែជនសង្ស័យជាកូនបានដើរទៅពីក្រោយចាប់បោចសក់ម្តាយទះកំផ្លៀង១ដៃចំសៀតផ្កាខាងឆ្វេងនិ ងដាល់ចំនួន៣ដៃបណ្តាលអោយជាំភ្នែកទាំងសងខាង រួចថែមទាំងទាត់មួយជើងចំក្បាលពោះ និងចាប់បោកជនរងគ្រោះជាម្តាយដួល២ដង បណ្តាលអោយរងរបួសម្រាមដៃខាងស្តាំរលាត់ហូរឈាម។ លុះដល់វេលាម៉ោង៨និង៤០នាទីយប់ថ្ងៃដដែល ទើបជនរងគ្រោះជាម្តាយបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលគគីរដើម្បីចុះទៅឃាត់ខ្លួនជនសង្ស័យជាកូនយកមកប៉ុស្តិ៍នគរបាលដើម្បីធ្វើការសួរនាំ។
នៅចំពោះមុខសមត្ថកិច្ចប៉ុស្តិ៍ ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពវាយទាត់ធាក់ម្តាយប្រាកដមែន ។ យោងតាមពាក្យបណ្តឹង រួមជាមួយចម្លើយសារភាពរបស់ជនសង្ស័យ សមត្ថកិច្ចប៉ុស្តិ៍ក៍បានបញ្ជូន ជនសង្ស័យទៅអធិការដ្ឋាននគរ បាលស្រុកកៀនស្វាយដើម្បីបន្តចាត់ការតាមនីតិវិធី៕
ចែករំលែកព័តមាននេះ