តាមធម្មតាសទ្រព្យម្បត្តិនៅក្នុងលោកនេះ យើងអាចចាយវាយអស់បាន តែចំពោះចំណេះវិជ្ជាវិញទោះជាយើងប្រឹងចាយយ៉ាងណា ក៏មិនចេះអស់ មានតែរឹងរឹតតែចម្រើនឡើង។ ព្រោះហេតុនោះឪពុកម្តាយត្រូវតាំងចិត្តថា អាត្មាអញត្រូវតែផ្ដល់ចំណេះវិជ្ជាដល់កូនៗ មិនត្រូវឲ្យពួកគេល្ងង់ខ្លៅឡើយ ។
ពិតណាស់ឪពុកម្ដាយខ្លះមិនបានសិក្សារៀនសូត្រមានចំណេះវិជ្ជាខ្ពង់ខ្ពស់នៅក្នុងខ្លួនទេ គាត់ត្រូវប្រកបរបរចិញ្ចឹមជីវិតដ៏លំបាកលំបិន និងមិនអាចចិញ្ចឹមកូនឲ្យបានសុខស្រួលឡើយ បញ្ហានេះគាត់ក៏គួរគិតថា នឹងមិនឲ្យកូនគាត់លំបាកដូចគាត់នោះឡើយ ។
ការយល់ឃើញបែបនេះឪពុកម្តាយក៏ត្រូវព្យាយាមផ្ដល់ចំណេះវិជ្ជាដល់កូន ដោយចំណាយលុយកាក់សម្រាប់រៀនសូត្រតាំងពីបឋមសិក្សារហូតដល់ថ្នាក់ខ្ពស់ គឺជាការប្រសើរក្រៃលែង ។
នេះជាទឹកចិត្តដ៏ល្អរបស់ឪពុកម្ដាយត្រូវមានចំពោះកូន មិនត្រូវមើលងាយចំណេះវិជ្ជាថា មិនមានប្រយោជន៍នោះឡើយ ព្រោះ សព្វថ្ងៃនេះបើមិនមានចំណេះវិជ្ជាគ្រប់គ្រាន់ទេ នឹងមិនអាចស្វែងរកការងារធ្វើបានឡើយ។
អ្នកមានចំណេះវិជ្ជាខ្ពស់ ធ្វើការងារស្រួល បានប្រាក់ខែច្រើន ចំណែកអ្នកមិនមានចំណេះវិជ្ជាត្រូវធ្វើការងារលំបាករាល់ថ្ងៃក៏នៅមិនគ្រប់ ។
ចែករំលែកព័តមាននេះ