ខេត្តកណ្តាល៖ មួយរយៈនេះនៅក្រុងតាខ្មៅហាក់បីដូចជា កើតឡើងបទល្មើសជាពិសេសគឺនៅពេលយប់តែម្តងដូចកាលពីយប់ថ្ងៃទី២០ ខែមីនា ឆ្នាំ២០១៩ យុវជនម្នាក់រងរបួសបែកក្បាលចេញខួរ និងឈាមស្រោចពេញខ្លួន ខណៈកំពុងជិះម៉ូតូត្រូវជនដៃដល់ និងបក្ខពួកបានធ្វើសកម្មភាពជិះម៉ូតូដេញកាប់ពីក្រោយ មិនញញើតសមត្ថកិច្ចមូលដ្ឋានសោះ ។ ហេតុការណ៍នេះបានកើតឡើងនៅថ្ងៃទី២០ ខែមីនា ឆ្នាំ២០១៩ វេលាម៉ោង២១និង០០នាទីចំណុចមុខហាងគុយទាវក្រវិលធំភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល ។
ជនរងគ្រោះឈ្មោះ សំអូន ផាលិត ហៅផ្លយ ភេទប្រុស អាយុ១៧ឆ្នាំ មានទីលំនៅភូមិក្រពើហាកើត សង្កាត់ព្រែកឬស្សី ក្រុងតាខ្មៅ ខេត្តកណ្តាល មុខរបរសិស្ស ។ ជនរងគ្រោះមានរបួសស្នាមត្រង់ក្បាលផ្នែកខាងក្រោយយ៉ាងធ្ងន់ធ្ងរ ។ ជនសង្ស័យ០២នាក់ (គេចខ្លួន) ទី០១ឈ្មោះ ភក្តី ភេទប្រុស អាយុ២០ឆ្នាំ ស្នាក់នៅក្នុងអាគារ វប្បធម៌ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល និងទី០២ មិនស្គាល់អត្តសញ្ញាណ ភេទប្រុស ។
សាក្សីបានអោយដឹងថា កាលពីពេលវេលាកើតហេតុខាងលើជនរងគ្រោះបានជិះម៉ូតូជាមួយ មិត្តភក្តិ (អង្គុយខាងក្រោយ) បន្ទាប់មកក៏ស្រាប់តែឃើញជនសង្ស័យ២នាក់ជិះម៉ូតូ០១គ្រឿងម៉ាក ZoomerX ក្នុងនោះស្គាល់ឈ្មោះម្នាក់ ជាជនដៃដល់ឈ្មោះ ភក្តី បានដកកាំបិតប៉័ងតោ កាប់លើជនរងគ្រោះពីក្រោយត្រូវក្បាលសើយសាច់ឡើងលើ បណ្តាលឲ្យមានរបួសស្នាមហូរឈាមយ៉ាងធ្ងន់ធ្ងរ ហើយក៏ត្រូវបងប្អូនដឹកយកទៅសង្គ្រោះបន្ទាន់នៅមន្ទីរពេទ្យកាល់ម៉ែត្រតែម្តង រីឯជនសង្ស័យបានជិះម៉ូតូរត់គេចខ្លួនបាត់ ។
ករណីនេះសមត្ថកិច្ចកំពុងបន្តចាត់ការតាមនីតិវិធី ។ ប្រជាពលរដ្ឋបានអោយដឹងថា មួយរយៈនេះនៅក្រុងតាខ្មៅបទល្មើសហាក់មានការកើតឡើងទាំងបទល្មើសគ្រឿងញៀន និងបទល្មើសលួច ឆក់ ប្លន់ និងជាពិសេសនៅពេលយប់មានក្រុមជិះម៉ូតូជិះចេញធាក់ដេញកាប់យកម៉ូតូពីប្រជាពលរដ្ឋ ដោយក្រុមទាំងនោះមានស្រី មានប្រុសជិះម៉ូតូជាច្រើនគ្រឿងផងដែរ ។ ពួកគាត់សំណូមពរទៅលោកឧត្តមសេនីយទោ អ៊ាវ ចំរើន ស្នងការនគរបាលខេត្តកណ្តាលមេត្តាជួយបង្ការបង្ក្រាបផងកុំអោយក្រុងតាខ្មៅក្លាយជាទីក្រុងក្រុមម៉ាកាវ ៕
ចែករំលែកព័តមាននេះ