រាជធានីភ្នំពេញ ៖ លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា ពេលនេះកំពុងដឹកនាំការហ្វឹកហាត់ក្រុម U23 កម្ពុជា ដើម្បីត្រៀមចូលរួមការប្រកួត AFC U23 Championship Thailand 2020 វគ្គជម្រុះពូល H ដែលកម្ពុជាធ្វើជាម្ចាស់ផ្ទះ។ ការប្រកួតនេះ ធ្វើឡើងពីថ្ងៃទី២២ ដល់ ២៦ ខែមីនា ឆ្នាំ២០១៩ នៅពហុកីឡដ្ឋានជាតិ ដោយក្នុង១ថ្ងៃមាន២ប្រកួត ១ប្រកួតធ្វើឡើងនៅម៉ោង៥ល្ងាច និង១ប្រកួតទៀតធ្វើនៅម៉ោង ៨យប់។
ក្នុងពូលHនេះរួមមាន កម្ពុជា, អូស្ត្រាលី,កូរ៉េខាងត្បូង និងឆាយនីសតៃប៉ិ ដែលត្រូវប្រកួតតាមកម្មវិធីខាងក្រោម៖ ថ្ងៃទី២២ មីនា ៖ កូរ៉េខាងត្បូងប្រកួត ជាមួយឆាយនីសតៃប៉ិ នៅម៉ោង៥ល្ងាច និង អូស្ត្រាលី ប្រកួតជាមួយកម្ពុជា នៅម៉ោង៨យប់។
ថ្ងៃទី២៤ មីនា ៖ ឆាយនីសតៃប៉ិ ប្រកួតជាមួយអូស្ត្រាលី នៅម៉ោង៥ល្ងាច និងកម្ពុជា ប្រកួតជាមួយកូរ៉េខាងត្បូង នៅម៉ោង៨យប់។ ថ្ងៃទី២៦ មីនា ៖ កូរ៉េខាងត្បូង ប្រកួត ជាមួយអូស្ត្រាលី នៅម៉ោង៥ល្ងាច និងកម្ពុជា ប្រកួតជាមួួយ ឆាយនីសតៃប៉ិ នៅម៉ោង៨យប់។
គួររំលឹកថា AFC U23 Championship Thailand 2020 មាន៤៤ប្រទេសចូលរួមចែកចេញជា១១ពូល ។ គណៈកម្មការរៀបចំការប្រកួតតម្រូវឱ្យមាន១៦ក្រុមសម្រាប់ឡើងទៅប្រកួតវគ្គជម្រុះចុងក្រោយនៅប្រទេសថៃ នា ដើមឆ្នាំ២០២០ ។
ដូច្នេះ ដើម្បីរកឱ្យបាន១៦ក្រុម មានតែយកក្រុមដែលជាប់លេខ១ក្នុងពូលនីមួយៗចំនួន១១ក្រុមបូកជាមួយក្រុមប្រទេសថៃជាម្ចាស់ផ្ទះ១ក្រុមទៀតបាន១២ក្រុម ហើយគណៈកម្មការរៀបចំការប្រកួតជ្រើសរើសក្រុមជាប់លេខ២ដែលល្អជាងគេចំនួន៤ក្រុមដើម្បីបង្គ្រប់ចំនួន១៦ក្រុម។
ចំពោះការប្រកួតវគ្គជម្រុះចុងក្រោយរបស់ ក្រុមទាំង១៦នេះទៀត សម្រាប់ក្រុមដែលឈ្នះពីលេខ១ដល់លេខ៣ ត្រូវបានគេផ្ដល់ឱកាស ឡើងទៅប្រកួតនៅក្នុងព្រឹត្តិការណ៍កីឡាអូឡាំពិក ឆ្នាំ២០២០នៅប្រទេសជប៉ុនដោយស្វ័យប្រវត្តិ។ជាការកត់សម្គាល់តាំងពីដើមមក ក្រុមកម្ពុជាមិនដែលឆ្លងផុតវគ្គជម្រុះតាមពូលបានឡើងទៅប្រកួតនៅវគ្គជម្រុះ១៦ក្រុមចុងក្រោយឡើយ។
សម្រាប់ការមកជួបប្រកួតជាមួយក្រុមប្រទេសអូស្ត្រាលីនេះទៀត គឺសង្ឃឹមតិចណាស់ ព្រោះប្រវត្តិជួបគ្នានាពេលកន្លងមក កម្ពុជាយើងមិនដែលយកឈ្នះឬក៏ស្មើម្ដងណាទេ ។ រីឯសំបុត្រចាប់ផ្ដើមលក់ពីថ្ងៃនេះតទៅហើយដោយកន្លែងមានដំបូល១ម៉ឺនរៀល និងកន្លែងអត់ដំបូល៥ពាន់រៀល ៕
ចែករំលែកព័តមាននេះ