រាជធានីភ្នំពេញ ៖ មកទល់ពេលនេះកីឡាករ និងគ្រូបង្វឹកខាងផ្នែកប្រដាល់សាកលជាច្រើនកំពុងចោទប្រកាន់ថា ហេតុផលដែលបណ្ដាលឱ្យវិស័យប្រដាល់សាកលនៅក្នុងប្រទេសកម្ពុជាមិនអាចដើររលូនទៅមុខ គឺបណ្ដាលមកពីអ្នកកាន់ការនៅក្នុងវិស័យមួយនេះមិនចូលរួមនិងខ្វះឆន្ទៈក្នុងការចូលរួមលើកស្ទួយ ។ ប៉ុន្តែផ្ទុយពីការចោទប្រកាន់នេះ មន្ត្រីទទួលខុសត្រូវរៀបចំកម្មវិធីប្រដាល់ប្រចាំ សង្វៀនទូរទស្សន៍ស្ទើរទាំងអស់បានបង្ហាញ ការជំទាស់ដោយលើកឡើងថា ហេតុផលដែលវិស័យមួយនេះកាន់តែចុះខ្សោយ បើទោះជាខាងសហព័ន្ធប្រឹងប្រែងដុតដៃដុតជើង គឺបណ្ដាលមកពីបញ្ហាដែលកើតមានជាប្រព័ន្ធប៉ុណ្ណោះ។
មានការកត់សម្គាល់កាន់តែខ្លាំងថា ប្រដាល់សាកលកាន់តែស្ងប់ស្ងាត់ឡើងៗ ដោយអាច និយាយបានថា ក្រៅពីខាងសហព័ន្ធជាអ្នករៀបចំការប្រកួតជើងឯករៀងរាល់មួយឆ្នាំម្ដង គឺមិនមានស្ថាប័នទូរទស្សន៍ណាមួយរួមគ្នាធ្វើនោះទេ បើមានបានតែមួយខ្យល់ហើយក៏បិទសាប៊ូអស់ ។ ក្នុងពេលបើកដំណើរការកម្មវិធីដំបូង បណ្ដាសង្វៀនភាគច្រើនសុទ្ធតែប្រកាសជំហរថានឹងរៀបចំការប្រកួតប្រដាល់សាកលឱ្យបានទៀងទាត់ ដើម្បីរួមគ្នាលើកស្ទួយវិស័យមួយនេះ ឱ្យមានការបោះជំហានឆ្ពោះទៅមុខ ។ ប៉ុន្តែគេកត់សម្គាល់ថា បណ្ដាប៉ុស្តិ៍ទូរទស្សន៍ ទាំងនោះ បានត្រឹមតែបើកសង្វៀនតាមគ្នាតែមួយប្រាវប៉ុណ្ណោះព្រោះមិនបានប៉ុន្មានផង ក៏បិទស្របគ្នា ។
គ្រូបង្វឹកផ្នែកប្រដាល់សាកល និងមន្ត្រីប្រចាំសហព័ន្ធជាច្រើនបានបន្លុយពាក្យថា ហេតុផលនៃការបិទចោលព្រមគ្នានៃបណ្ដាសង្វៀនទាំងនោះ គឺពាក់ព័ន្ធនឹងឆន្ទៈរបស់អ្នករៀបចំការប្រដាល់ ដោយគ្រូបង្វឹក និងមន្ត្រីទាំងនោះ បង្ហើបថា បណ្ដាលមកពីអ្នករៀបចំការប្រដាល់ទទួលផលចំណេញមិនច្រើនទើបសម្រេចចិត្តបិទចោល ។
គ្រូបង្វឹកកីឡាប្រដាល់មួយរូបបង្ហើបថា បើសង្វៀនទូរទស្សន៍នៅតែបន្តការប្រដាល់ខាងផ្នែកសាកល គឺទោះជាបើកមួយឆ្នាំទល់មួយឆ្នាំ ក៏មិនខ្វះអ្នកឡើងប្រកួតនោះដែរ ដោយសារតែពេលសហព័ន្ធ និងបណ្ដាសង្វៀនទូរទស្សន៍បើកឱ្យមានការប្រកួតប្រដាល់សាកល គឺមានសិស្សមកហាត់ និងមានកីឡាករផ្នែកប្រដាល់សេរីមិនតិចនោះទេបានងាកមកប្រដាល់សាកល ដែលគ្រូបង្វឹករូបនោះ អះអាងថា អត់មានខ្វះកីឡាករឡើងប្រកួតនោះទេ។
គ្រូបង្វឹកដដែលបញ្ជាក់ថា ហេតុផលប្រដាល់សាកលទៅមុខមិនរួច គឺដោយសារតែម្ចាស់សង្វៀនមានចេតនាមិនចង់បន្ត ហើយនៅពេលបើកការប្រដាល់ទៀតសោត គឺឱ្យតម្លៃខ្លួនទាបជាងដាច់ឆ្ងាយ ហើយបើដាក់ក៏ដាក់របៀបបង្គ្រប់កិច្ច ដែលធ្វើឱ្យកីឡាករម្នាក់ៗបាក់ទឹកចិត្ត ។ លោក បង្ហើបដោយមិនបញ្ចេញឈ្មោះថា៖«ការពិតប្រដាល់សាកល កុំនិយាយថាបើកប្រកួតគេមិនមើល ឬខ្វះកីឡាករ ប៉ុន្តែមកពីអ្នករៀបចំគេពិបាកស៊ី ហើយឱ្យតម្លៃគ្នាទាបៗ ទើបខ្ញុំ និងក្លិបមួយចំនួន លែងបញ្ជូនសិស្សឱ្យប្រកួតតែម្ដង»។
លោកថា បណ្ដាប៉ុស្តិ៍ខ្លះ កីឡាកររបស់លោកឡើងវ៉ៃសេរីបាន៤០ទៅ៥០ម៉ឺនរៀលទៅហើយ តែនៅពេលសុំឡើងប្រដាល់សាកល បែរជាឱ្យទាបជាងហ្នឹង ដោយលើកហេតុផលថា ម្ចាស់ស្ពុនស័រមិនហ៊ានថ្លៃសម្រាប់គូប្រកួតផ្នែកសាកល ដែលគ្រូបង្វឹករូបនោះ យល់ថាជារឿងពាក់ព័ន្ធនឹងការខ្វះការចូលរួមលើកស្ទួយពីអ្នកទទួលខុសត្រូវ ។ ក្នុងនោះមន្ត្រីដែលបង្ហាញពីការត្អូញត្អែរផ្សេងទៀត ក៏បានដាក់បន្ទុកថា ហេតុផលដែលសង្វៀនប្រដាល់សាកលត្រូវបានដួលទាំងស្រុងពីបណ្ដាសង្វៀនទូរទស្សន៍ ក៏ដោយសារតែក្នុងពេលដាក់ឱ្យកីឡាករឡើងប្រកួត គឺដាក់តែកីឡាករបក្សពួក មិនលើកទឹកចិត្តដល់កីឡាករដែលខំហ្វឹកហាត់ពិតប្រាកដនោះផងដែរ ។
អ្នកលើកឡើងទាំងនោះសុទ្ធតែបានបង្ហើបថា ការបិទចោលសង្វៀនប្រដាល់សាកលដែលធ្លាប់កើតមាននៅតាមទូរទស្សន៍ គឺជាមូលហេតុធ្វើឱ្យកីឡាករផ្នែកប្រដាល់រត់ចោលអាជីព ហើយធ្វើឱ្យសហព័ន្ធប្រដាល់សាកលកាន់តែខ្វះធនធានអ្នកល្អពិតប្រាកដ ដោយមានការបង្ហើបទៀតថា នៅពេលសហព័ន្ធធ្វើការជ្រើសរើសជើងឯកទូរទស្សន៍រាល់ឆ្នាំ គឺស្វះស្វែងរកកីឡាករមកប្រកួតបង្គ្រប់កិច្ចទម្រាំបានគឺពិបាក ។ គ្រូបង្វឹកថា បើសហព័ន្ធមិនបើកការប្រកួតឱ្យញឹកញាប់ដើម្បីឱ្យអ្នកស្ម័គ្រចិត្តហ្វឹកហាត់មានចំណូលមានទីផ្សារមិនរង់ចាំតែការប្រកួតថ្នាក់ជាតិមួយឆ្នាំម្ដង គឺមិនខុសពីធ្វើឱ្យវិស័យមួយនេះ រកអ្នកចង់ហាត់មិនឃើញនោះទេ ស្របគ្នាដែលគ្រូបង្វឹក ដែលធ្លាប់សកម្មក្នុងវិស័យមួយនេះ ក៏ចូលនិវត្តន៍ចង់អស់។
សង្វៀនទូរទស្សន៍ប៉ុស្តិ៍លេខ៥ ត្រូវគេឃើញប្រកាសផ្អាកមុនគេ បន្ទាប់ពីបើកប្រដាល់សាកលបានតែមួយរយៈ ហើយអះអាងថា ខ្វះការគាំទ្រ ។ លោក សេង កដិកា ជាអ្នករៀប ចំកម្មវិធីប្រដាល់ប្រចាំសង្វៀនទូរទស្សន៍មួយនេះបានបដិសេធថា ហេតុផលដែលលោកបិទចោលការប្រដាល់សាកល មិនមែនដូចអ្វីដែលបានចោទប្រកាន់ខាងលើនោះទេ ផ្ទុយទៅវិញគឺពាក់ព័ន្ធនឹងកត្តាជុំវិញប៉ុណ្ណោះ ។ លោកបានថ្លែងបញ្ជាក់ថា ស្ថាប័នទាំងមូលនៅតែចង់រៀបចំការប្រដាល់សាកលបង្អួតភ្នែកមហាជន ប៉ុន្តែបណ្ដាលមកពីមានហេតុផលទើបសម្រេចចិត្តលុបចោល ។
លោកថា ប្រដាល់សាកលមិនសូវទទួលបានការគាំទ្រណាស់ណានោះទេ ដោយសារតែកីឡាមួយនេះ តម្រូវឱ្យប្រកួតដោយប្រើតែដៃ ដែលអ្នកទស្សនាមិនសូវមើលឃើញពីភាពរស់រវើក ។ លោកថាប្រដាល់សេរី ហាក់ជាប់ចិត្តជាងនៅក្នុងផ្នត់គំនិតមហាជន ទើបធ្វើឱ្យអ្នកស្នេហាកីឡាមួយនេះ មិនទទួលយកកីឡាប្រដាល់មួយផ្សេង ដែលលោកចង់សំដៅលើការប្រដាល់សាកល ដែលមានដង្ហើមរស់ល្អតែមួយឆាវចុងក្រោយក៏ពិបាក។
លោកនិយាយថា៖«ខ្មែរយើងជាប់ចិត្តតែប្រដាល់ សេរីប្រើដៃប្រើជើង ដល់ឱ្យមកមើលប្រដាល់ សាកលប្រើតែដៃ ហើយមានដាក់របាំងក្បាលអី ការពារផង មើលមិនចូលភ្នែកទេ អ៊ីចឹងហើយទើបយើងដំណើរការប្រដាល់សាកលមិនបានល្អ»។
លោកថា អ្នករៀបចំកម្មវិធីប្រដាល់រំពឹងតែការគាំទ្រប៉ុណ្ណោះ ដូច្នោះបើការគាំទ្រមិនមាននោះអ្នកផ្ដល់កញ្ចប់ប្រាក់ឱ្យរៀបចំកម្មវិធីក៏មិនចង់បោះទុនទៀតដែរ ទើបរឹតតែជាសម្ពាធមិនអាចឱ្យប៉ុស្តិ៍លេខ៥ បន្តការប្រកួត ។ លោកនៅតែចង់ដំណើរការប្រដាល់សាកល ប៉ុន្តែបណ្ដាល មកពីឧបសគ្គមួយចំនួនមិនអាចឱ្យបន្តទៅកើត ទើបបានត្រឹមតែប៉ងចង់បង្កើតវិញ តែមិនអាចទៅរួច ។ យ៉ាងណាមិញ លោកទទូចចង់ឱ្យប្រដាល់សាកលមានការប្រកួតគគ្រឹកគគ្រេងគ្រប់បុស្តិ៍ ទើបអាចសាបព្រួសផ្នត់គំនិតអ្នកមិនចូលចិត្តការប្រដាល់សាកលឱ្យចាប់អារម្មណ៍ច្រើនឡើង។
មិនខុសគ្នាដែរ លោក ញាណ សុធី អ្នករៀបចំការប្រដាល់ប្រចាំនៅទូរទស្សន៍អាស៊ីអាគ្នេយ៍ បានច្រានចោលដែរថា បើស្ថាប័នរបស់លោកមិនមានឆន្ទៈក្នុងការចូលរួមលើកស្ទួយវិស័យមួយនេះ មិនមែនលោកខំរៀបចំកាលពីគ្រាមុននោះទេ ប៉ុន្តែបណ្ដាលមកពីក្នុង ពេលបើកប្រដាល់ បណ្ដាក្លិបដែលលោកសហការរៀបចំ កីឡាករមិនដឹងឯណាឯណី ហើយក្លិបខ្លះអះអាងពីសមត្ថភាពរបស់កូនសិស្ស តែពេលមកដល់រេញ គឺប្រកួតមិនកើតធ្វើឱ្យ លោកត្រូវមាត់ពីខាងស្ពុនស័រ ទើបលោក តស៊ូមិនកើត ។
ស្ថាប័នរបស់លោកទើបតែសម្រេចបិទចោលការប្រដាល់កាលពីពេលកន្លងទៅប៉ុណ្ណោះ ដោយសារតែហេតុផលខ្វះការគាំទ្រ និងខ្វះអ្នកឧបត្ថម្ភកម្មវិធីតែម្ដង ដែលករណីនេះ លោកថាគឺបណ្ដាលមកពីក្លិប និងកីឡាករខ្លួនឯង ។ លោកបញ្ជាក់ថា ការប្រកួតប្រដាល់សេរី គឺទោះជាអ្នកប្រដាល់ថ្មី ក៏មានអ្នកចង់ទស្សនា ជាពិសេសប្រសិនបើកីឡាករទាំងពីរវាយគ្នាបានល្អនៅលើសង្វៀន ។
លោកថា ហេតុផលបិទចោលការប្រដាល់សាកល គឺដោយសារតែពេលដាក់ប្រដាល់សាកលនៅក្នុងការប្រកួតប្រដាល់សេរី គឺស្ងាត់សម្រាប់ការគាំទ្រតែម្ដង ទើបធ្វើឱ្យអ្នកឧបត្ថម្ភកម្មវិធី សម្រេចកាត់ចោលការប្រដាល់សាកលចេញ ខណៈដែលលោកគ្រាន់តែជាអ្នកដឹកនាំកម្មវិធី ក៏មិនអាចធ្វើអ្វីដោយមិនមើលទីផ្សារនោះដែរ ទើបធ្វើឱ្យការប្រដាល់សាកលមិនអាចរស់បាននៅលើសង្វៀនទូរទស្សន៍អាស៊ីអាគ្នេយ៍ ។ លោកបន្តថា ប្រដាល់សាកលបើទោះជាចង់រៀបចំជាប់លាប់ ក៏មិនអាចទៅរួចនោះដែរ ដោយសារតែភាពជាក់ស្ដែងកីឡាករប្រដាល់សាកលក៏មិនមានច្រើននាក់ដោយក្នុងការផ្គូផ្គងម្ដងៗគឺពិបាកស្វែងរកអ្នកប្រកួតឱ្យបានល្អរៀងរាល់សប្ដាហ៍ ហើយថាទម្រាំតែបានដំណើរការការប្រដាល់សាកលមួយអាទិត្យៗនៅក្នុងពេលនោះ គឺមិនខុសពីដាក់កីឡាករឆិនឆៃបង្គ្រប់កិច្ច ដែលធ្វើឱ្យលោកស្មុគស្មាញ ។
លោកនិយាយថា៖«ប្រដាល់សាកលពិបាកដើរណាស់សម្រាប់ស្ថាប័នទូរទស្សន៍ ដោយសារទី១ អ្នកទស្សនាមិនសូវមានអ្នកចូលចិត្ត ទី២អ្នកស្ពុនស័រទាមទារមិនឱ្យដាក់ និងទី៣គឺនៅក្នុងប្រទេសកម្ពុជាមិនមានកីឡាករល្អៗដើម្បីប្រកួតទេ ទម្រាំបានប្រកួតរួច មួយសប្ដាហ៍ៗ គឺពិបាកណាស់ ពេលខ្លះរើសអ្នកប្រកួតឱ្យតែបានទើបចង់បន្តក៏ពិបាក»។ លោកថា ប្រដាល់សាកលបើបើកការប្រកួត យូរៗម្ដង ដូចគណៈកម្មការប្រដាល់សាកលរៀបចំ នោះប្រកួតបានល្អ តែបើឱ្យប្រកួតល្អប្រចាំសប្ដាហ៍ គឺមិនអាចទៅរួចនោះទេ ម្យ៉ាងមកពីគ្រូបង្វឹកក្លិបខ្លះ មានបញ្ហាលាបពណ៌គ្នាចុះឡើង ខឹងរឿងសង្វៀនលោកមិនដាក់សិស្សឱ្យប្រកួតញឹកញាប់អ៊ីចេះអ៊ីចុះមិនចេះអស់ផង ទើបលោកសម្រេចបិទចោល ហើយមិនច្បាស់ពីគម្រោងបើកឡើងវិញ ។ ទោះបីយ៉ាងណាលោកថា បើបរិយាកាសអាចឱ្យលោកដំណើរការឡើងវិញ គឺលោកនឹងធ្វើការពិចារណា។
ជាមួយនឹងការលើកឡើងខាងលើទើបគេកត់សម្គាល់ថា កីឡាករប្រដាល់សាកលមិនសូវមានទីផ្សារ ហើយកាន់តែបណ្ដាលឱ្យពួកគេខ្លះសម្រេចចិត្តបោះបង់អាជីព ហើយវិស័យមួយនេះហាក់មិនសូវមានសកម្មភាពខ្លាំង បើទោះជាកីឡាករ ឃុន ឌីម៉ា ធ្លាប់បានតំណាងផ្នែកប្រដាល់សាកល ទៅដណ្ដើមបានមេដាយក្នុងព្រឹត្តិការណ៍កីឡាសុីហ្គេម នាពេលកន្លងមកក្ដី៕
ចែករំលែកព័តមាននេះ