រាជធានីភ្នំពេញ ៖ ប៉ុន្មានថ្ងៃចុងក្រោយនេះ ការដាច់ភ្លើងបានចោទជាបញ្ហាធំមួយសម្រាប់ប្រជាពលរដ្ឋ ក៏ដូចជាម្ចាស់អាជីវកម្មមួយចំនួនធំ រហូតម្ចាស់ទីតាំងមួយចំនួនធំបានសម្រេចចិត្តជាវ ម៉ាស៊ីនភ្លើងយកមកផ្គត់ផ្គង់ការខ្វះខាតថាមពលអគ្គិសនី ជាក់ស្តែងម៉ាស៊ីនភ្លើងពេលនេះកំពុងត្រូវប៉ាន់ ជាពិសេសកន្លែងលក់ម៉ាស៊ីនភ្លើងខ្លះ គឺលក់អស់ម៉ាស៊ីនភ្លើងពីឃ្លាំងតែម្តង ។
បុគ្គលិកផ្នែកលក់ម៉ាស៊ីនភ្លើងមួយរូបនៅហាងលក់ម៉ាស៊ីនភ្លើងមួយកន្លែង នៅសង្កាត់ឃ្មួញ ខណ្ឌសែនសុខ សុំមិនបញ្ចេញឈ្មោះ បានអោយដឹងថា បច្ចុប្បន្ននេះការលក់ម៉ាស៊ីនភ្លើងមានកំណើនខ្លាំងមិនគួរអោយជឿ ក្រោយពីមានបញ្ហានៃការខ្វះខាតអគ្គិសនីរហូតការផ្គត់ផ្គង់ត្រូវកាត់ផ្តាច់តាមតំបន់ជាច្រើននៅភ្នំពេញ និងបណ្តាខេត្ត ដែលបណ្តាលឲ្យមានការខឹងសម្បាពីសំណាក់អ្នកប្រើប្រាស់ ។
បុគ្គលិកផ្នែកលក់ដដែលបានបញ្ជាក់ថា «ជាក់ស្ដែងពេលនេះ មិនមានម៉ាស៊ីនភ្លើងសម្រាប់ទុកក្នុងឃ្លាំងនោះទេ ដូច្នេះបើសិនជាអតិថិជនចង់ទិញម៉ាស៊ីនភ្លើង គឺត្រូវការបញ្ជាទិញជាមុន ដើម្បីអោយក្រុមហ៊ុននាំពីក្រៅប្រទេសមកផ្គង់ផ្គង់វិញ» ។ បុគ្គលិកផ្នែកលក់រូបនេះបានបន្តថា កាលពីមុន ភាគច្រើនលក់ដាច់តែប្រភេទម៉ាស៊ីនភ្លើងធំៗតាមសហគ្រាស និងក្រុមហ៊ុន តែពេលនេះ លក់ដាច់ខ្លាំងទៅលើប្រភេទម៉ាស៊ីនភ្លើងតូចៗសម្រាប់ផ្គត់ផ្គង់តាមផ្ទះ និងតាមហាងកាហ្វេតូចៗជាដើម ដែលម៉ាស៊ីននេះសម្រាប់ដាក់បានតែភ្លើង អំពូល និងកង្ហារ ទូរទស្សន៍ជាដើម ដោយមិនអាចដាក់បានម៉ាស៊ីនត្រជាក់ ឬទូរទឹកកកអីបាននោះទេ ។
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ថ្មីៗនេះ បានសំណូមពរជាច្រើនលើកច្រើនសារ ឲ្យប្រជាពលរដ្ឋអត់ធ្មត់មួយរយៈ ហើយក៏បានលើកទឹកចិត្តឲ្យម្ចាស់អាជីវកម្មជាវម៉ាស៊ីនភ្លើងយកមកប្រើប្រាស់បណ្តោះ អាសន្នសិន ដោយសារតែការផ្គត់ផ្គង់អគ្គិសនីនារដូវក្តៅនេះមានការខ្វះខាតដល់ទៅជាង ៤០០ មេហ្គា
វ៉ាត់ ។ ជាក់ស្តែង ម្ចាស់គ្លីនិកមួយរូបបានបង្ហាញការឆ្លើយតបទៅនឹងការអំពាវនាវរបស់ប្រមុខដឹកនាំរាជ រដ្ឋាភិបាលទៅលើបញ្ហានៃការរអាក់រអួលការផ្គត់ផ្គង់ថាមពលអគ្គីសនី តាមរយៈការជាវម៉ាស៊ីន ភ្លើងយកមកប្រើប្រាស់នៅគ្លីនិករបស់ខ្លួន ។
សាស្ត្រាចារ្យវេជ្ជបណ្ឌិតឯកទេស ស៊ិក ធីរះ ម្ចាស់គ្លីនិកឯកទេសឆ្អឹង បានបង្ហោះសារលើបណ្តាញសង្គមហ្វេសប៊ុក កាលពីថ្ងៃច័ន្ទ ថា«ឆ្លើយតបតាមសំណូមពររបស់សម្តេចនាយករដ្ធមន្ត្រី និងការអំពាវនាវរបស់អាជ្ញាធរអគ្គិសនីកម្ពុជា ជាពិសេសដើម្បីសុខសុវត្ថិភាពរបស់អ្នកជំងឺ ការចំណាយមួយត្រូវបានធ្វើទ្បើង។ ម៉ាស៊ីនភ្លើងបំរុងក្នុងពេលដាច់ចរន្តអគ្គិសនីមួយត្រូវបានទិញស្មើ 7500$ ។ សៀងហើយខែនេះ (ជេរ ខឹងសម្បារ រិះគន់បែបជាន់ពន្លិច មិនបានផ្តល់អ្វីមកវិញទេ)» ។
ថ្លែងប្រាប់សារព័ត៌មានកោះសន្តិភាព នៅថ្ងៃទី ១៩ ខែមីនា ឆ្នាំ២០១៩ នេះ សាស្ត្រាចារ្យវេជ្ជបណ្ឌិតឯកទេស ស៊ិក ធីរះ មានប្រសាសន៍បញ្ជាក់ថា «ធម្មតាការរកស៊ី យើងត្រូវចេះទទួលខុសត្រូវលើអ្នកជំងឺរបស់យើង ។ នៅក្នុងស្ថាន ភាពនៃកំណើនប្រើប្រាស់អគ្គិសនី កើនឡើងខ្ពស់ ហើយកម្តៅក៏ក្តៅខ្លាំង ហើយខ្វះខាតទឹក ដូច្នេះ បើយើងបន្ទោសខាងអគ្គីសនីទាំងស្រុង ក៏មិនកើតដែរ ។ ដើម្បីសុវត្តិភាពរបស់អ្នកជំងឺ ហើយយើងប្រកបរបរបើកគ្លីនិក ជាធម្មតានៅក្នុងមុខរបរអីក៏ដោយ យើងត្រូវត្រៀមសម្រាប់ហានិភ័យដោយចៃដន្យដែលអាចកើតមាន ដូច្នេះយើងត្រូវរៀនចេះដោះស្រាយបញ្ហា ជាជាងយើងទៅអង្គុយរអ៊ូ យើងត្រូវបង្ហាញទំនួលខុសត្រូវចំពោះអ្នកជំងឺ ព្រោះការខ្វះខាតអគ្គិសនីនេះតែប៉ុន្មានខែតែប៉ុណ្ណោះ» ។ យ៉ាងណាមិញ ម្ចាស់គ្លីនិកខាងលើទទួលស្គាល់ថាការចំណាយជាវម៉ាស៊ីនភ្លើងនាពេលនេះគឺជាចំណាយក្រៅខ្ទង់ដែលមិនបានត្រៀមទុក ។
សូមរម្លឹកថា សម្ដេចតេជោ ហ៊ុន សែន កាលពីថ្ងៃទី១៨ ខែមីនា កន្លងទៅបានបន្ដអំពាវនាវដល់ប្រជាពលរដ្ឋមានការអត់ធ្មត់ យោគយល់ចំពោះបញ្ហាដាច់ភ្លើង និងដាច់ទឹក នៅតំបន់មួយចំនួនក្នុងរាជធានីភ្នំពេញ ក៏ដូចជានៅតាមបណ្ដាខេត្តផ្សេងៗផងដែរ ដូច្នេះហើយដើម្បីដោះស្រាយ បញ្ហាប្រឈមនាពេលបច្ចុប្បន្ននេះ សម្ដេចស្នើឲ្យអ្នកដែលមានម៉ាស៊ីនភ្លើង ត្រូវបញ្ចេញមកប្រើប្រាស់បណ្ដោះអាសន្នសិន។ ចំណែកឯការដាច់ភ្លើងតាមតំបន់ខ្លះនៅភ្នំពេញ និងបណ្តាខេត្តមួយចំនួន គឺបណ្ដាលមកពីការកើនឡើងកម្តៅ ដែលធ្វើឲ្យវារីអគ្គិសនីមិនអាចដំណើរការបាន ហើយខ្វះថាមពលរហូតដល់ ៤០០មេហ្គាវ៉ាត់ និងត្រូវបង្ខំចិត្តផ្អាកអគ្គិសនីនៅតំបន់នេះ ។
សម្ដេចតេជោ បានមានប្រសាសន៍បញ្ជាក់យ៉ាងដូច្នេះថា «វារីអគ្គិសនីទាំងអស់របស់យើង ដោយសារទឹកវាហួតហែង ធ្វើឲ្យវារីអគ្គិសនីរបស់យើង ទាញតួប៊ីនអត់រួច ដែលត្រូវបិទមួយចំនួនធ្វើឲ្យយើងកំពុងខ្វះអគ្គិសនីរហូតដល់៤០០មេហ្គាវ៉ាត់ ដូច្នេះហើយបានវាផ្គត់ផ្គង់អគ្គិសនីរបស់យើង មានការរអាក់រអួល។ រហូតឈានដល់កន្លែងខ្លះត្រូវបានស្នើសុំឲ្យមានការកាត់ផ្ដាច់ ផ្អាកការផ្គត់ផ្គង់ដើម្បីទៅផ្គត់ផ្គង់កន្លែងនេះ រួចហើយបន្ទាប់ទៅផ្គត់ផ្គង់កន្លែងនោះ»។ សម្ដេចតេជោបន្ដថា «សូមមេត្ដាអត់ធ្មត់ ក្នុងស្ថានភាពលំបាក ហើយកន្លែងណាដែលមានលទ្ធភាព គឺបញ្ចេញម៉ាស៊ីនភ្លើងយកមកប្រើប្រាស់។ ពិតហើយតែបញ្ឆេះម៉ាស៊ីនភ្លាមវាលឺសំឡេង វាមានផ្សែង ប៉ុន្ដែវាប្រសើរជាងយើងដុតចន្លុះ ដុតចង្កៀងប្រេងកាត […] ខ្ញុំសូមឲ្យប្រជាពលរដ្ឋរបស់យើងមេត្ដាយោគយល់ការលំបាកនេះ» ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ