ខេត្តមណ្ឌលគិរី ៖ ជនជាតិដើមភាគតិចបានសម្តែងការខកចិត្តក្រោយបរាជ័យ ក្នុងការចុះបោះបង្គោលកំណត់ព្រំដីភ្នំដោះក្រមុំ កាលពីព្រឹកថ្ងៃទី១៩ មីនា ក្រោយពេលរដ្ឋបាលខេត្តប្រកាសរំសាយការជួបជុំ ក្រោមមូលហេតុស្ថាប័នជំនាញដែលពាក់ព័ន្ធអវត្តមាន និងត្រូវលើកទៅធ្វើនៅពេលក្រោយ ។
លោក សុក សេរ៉ា នាយករងរដ្ឋបាលសាលាខេត្តបានឲ្យដឹងថា ដោយថ្នាក់ដឹកនាំចង់បានសមភាពគណៈកម្មាធិការដីរដ្ឋថ្នាក់ខេត្តទាំងអស់ចូលរួម ដើម្បីឲ្យបានដឹងឮទាំងអស់គ្នា ។ ដោយសារថ្ងៃនេះសមាជិកគណៈកម្មការមួយចំនួនជាប់រវល់មិនបានចូលរួម ដូច្នេះត្រូវលើកទៅធ្វើពេលក្រោយ ។ រដ្ឋបាលខេត្តនឹងផ្តល់ដំណឹងជូនពីរថ្ងៃមុន ដើម្បីរៀបចំការងារឲ្យបានរលូន ។
លោក ក្រើង តុលា សមាជិកគណៈកម្មការភ្នំដោះក្រមុំបានឲ្យដឹងថា លោកពិតជាមានការសោកស្តាយ ខណៈដែលប្រជាពលរដ្ឋខិតខំមកពីឆ្ងាយដើម្បីចូលរួមពិនិត្យមើលការចុះអនុវត្តរបស់អាជ្ញាធរជុំវិញបញ្ហាដីភ្នំដោះក្រមុំ ដែលបានអូសបន្លាយជាច្រើនឆ្នាំមកហើយនោះ ។ លោក តុលា ថា ការប្រកាសរំសាយរបស់អាជ្ញាធរ គឺមិនមានហេតុផលជាក់លាក់ទេ ។
អ្នកស្រី ភ្លឹក ភារម្យ ជនជាតិដើមភាគតិចរស់នៅភូមិឡៅកា ក្រុងសែនមនោរម្យ បានឲ្យដឹងដែរថា ប្រជា ជនពិតជាចង់បញ្ចេញដើម្បីចូលរួមជាមួយអាជ្ញាធរ ក្នុងការរកដំំណោះស្រាយជុំវិញរឿងរ៉ាវដីធ្លីភ្នំដោះក្រមុំនេះ ។ អ្នកស្រីបន្តថា អ្នកដែលបានចូលរួមកាលពីព្រឹកមិញ មិនសប្បាយចិត្តនោះទេ ព្រោះអាជ្ញាធរបានអះអាងថានឹងរៀបចំការងារបោះបង្គោលកំណត់ព្រំដីនៅថ្ងៃទី១៩ មីនា ប៉ុន្តែបែរជាត្រូវលើកទៅថ្ងៃក្រោយទៅវិញ ។
លោក ស្រូយ ខេត ប្រធានសមាជិកឧត្តមក្រុមប្រឹក្សាពិគ្រោះនិងផ្តល់យោបល់ និងជាប្រធានគណបក្សជន ជាតិដើមប្រជាធិបតេយ្យ បានលើកឡើងថា តាមឆន្ទៈរបស់ប្រជាពលរដ្ឋជនជាតិដើមរស់នៅខេត្តមណ្ឌល គិរី ពួកគាត់ចង់បានដីមជ្ឈមណ្ឌលជនជាតិដើមភាគតិចត្រឡប់មកវិញទាំងអស់ ទៅតាម សជណ ដែលមិនអាចរំលោភបានទេ ។ លោក ស្រូយ ខេត បានហៅសកម្មភាពរបស់អាជ្ញាធរនៅពេលនេះថា គឺមិនសមហេតុផល ព្រោះបានណាត់គ្រប់អង្គភាព មន្ទីរជំនាញរួមនឹងប្រជាពលរដ្ឋផងដែរ បែរជាត្រូវរំសាយទៅវិញធ្វើឱ្យខកចិត្តស្តូក ។
លោក ស្វាយ សំអ៊ាង អភិបាលខេត្តមណ្ឌលគិរីធ្លាប់បានឲ្យដឹងថា«បញ្ហាដីភ្នំដោះក្រមុំនេះកន្លងមក យើង
ក៏បានខិតខំដោះហើយ ប៉ុន្តែនៅមិនទាន់ចប់សព្វគ្រប់ដោយសារភាគីមួយចំនួននៅតែតវ៉ានៅតែជំទាស់…ហើយនៅថ្ងៃមិញនេះ(ថ្ងៃទី ២៨) ខេត្តទទួលបានបទបញ្ជាពីសម្តេចតេជោ ដូច្នេះនៅថ្ងៃទី១ មីនាកន្លងទៅ គណៈអភិបាលខេត្តបានកោះប្រជុំបន្ទាន់ ដើម្បីចាត់ការរឿងនេះ ហើយនឹងមាននីតិវិធីដើម្បីដោះស្រាយបញ្ហានេះ ទៅតាមអ្វីដែលជាអនុសាសន៍ណែនាំរបស់សម្តេចតេជោ..» ។ តាមអនុសាសន៍របស់សម្តេចតេជោគឺត្រូវដកហូតតំបន់ភ្នំដោះក្រមុំទុកជាសម្បត្តិរដ្ឋវិញ ។
លោកអភិបាលខេត្តបន្តថា«ករណីដីភ្នំដោះក្រមុំនេះមានពាក់ព័ន្ធនឹងការផ្តល់ដី មានតាំងពីអភិបាលខេត្តមុន…ហើយវាពាក់ព័ន្ធនឹង ស ជ ណ ចំនួនពីរដែល ស ជ ណ ដំបូងរក្សាដីភ្នំដោះក្រមុំនេះទុក ហើយ ស ជ ណ មួយទៀតសម្រេចផ្តល់ដីមួយផ្នែកដល់អង្គភាពទឹកស្អាត…ហើយឥឡូវនេះការជំទាស់គឺទី១ជំទាស់ សជ ណ លើកក្រោយដែលកាត់ដីឲ្យកន្លែងទឹកស្អាត២ហិកតា នោះគឺជាការជំទាស់របស់ក្រុមអ្នកផ្សេងក្រៅពីគណៈ កម្មាធិការជនជាតិដើមភាគតិចគ្រប់គ្រងតំបន់មជ្ឍមណ្ឌលវប្បធម៌ជនជាតិដើមភាគតិច»។
សូមបញ្ជាក់ថា កាលពីថ្ងៃទី១ មីនា ២០១៩ អាជ្ញាធរខេត្តមណ្ឌលគិរី បានសម្រេចដកហូតដីនៅតំបន់ជុំវិញជើងភ្នំដោះក្រមុំ មកធ្វើជាសម្បត្តិសាធារណៈវិញ និងត្រូវបោះបង្គោលកំណត់ព្រំដីផងដែរ ៕
ចែករំលែកព័តមាននេះ