ក្រុមហ៊ុន Volkswagen អាចនឹងយឺតពេលបន្តិចក្នុងការចេញលក់រថយន្តប្រភេទ Crossover នៅអាមេរិក តែគេមិនបានធ្វេសប្រហែសទៅលើការផលិតរថយន្តអគ្គិសនីឡើយ។ ការមិនទាន់បុកសម្រុកទៅលើការផលិតរថយន្តអគ្គិសនី គឺដោយសារតែក្រុមហ៊ុននេះមិនទាន់ចង់សម្រុក ដោយឃើញទីផ្សារនាពេលបច្ចុប្បន្នគឺថ្មីនៅឡើយ ។ គេជឿជាក់ថា នៅឆ្នាំ២០២២ គឺជាឆ្នាំដែលប្រជាជនជាច្រើនទិញរថយន្តអគ្គិសនីប្រើប្រាស់ដូចផ្សិត។
លោក Scott Keogh នាយកប្រតិបត្តិនៅ Volkswagen Group អាមេរិកខាងជើង មានការជឿជាក់ថា ឆ្នាំ២០២២ គឺជាឆ្នាំដែលទីផ្សាររថយន្តសម្បូររថយន្តអគ្គិសនី ។ លោកថា ៖«នៅក្នុងគំនិតរបស់ខ្ញុំ វាជាឱកាសមួយរបស់ VW ក្នុងការផលិតរថយន្តអគ្គិសនីឱ្យបានច្រើននៅពេលនោះ។ ជាមួយនឹងរថយន្តអគ្គិសនី យើងអាចវាស់ស្ទង់ទីផ្សារ ហើយធ្វើយ៉ាងណាឱ្យរថយន្តរបស់យើង ស្ថិតនៅក្នុងតម្លៃមួយដ៏ល្អ ។ សម្រាប់ពេលនេះ បើទោះបីជាមានការផលិតច្រើនក៏ដោយ ក៏ចំនួនអ្នកទិញនៅតិចនៅឡើយ» ។
នៅប៉ុន្មានឆ្នាំកន្លងមកនេះ ចំនួនអ្នកទទួលស្គាល់ការប្រើប្រាស់រថយន្តអគ្គិសនី មានការកើនឡើង តែវាក៏ទាមទារពេលវេលាផងដែរ ទម្រាំតែអាចចាត់ទុកថាទីផ្សារនេះមានភាពជោគជ័យ ។
លោកបានបន្តថា៖«នៅពេលខ្ញុំសម្លឹងមើលការស្រាវជ្រាវទីផ្សារនៅសហរដ្ឋអាមេរិច (សម្រាប់រថយន្តអគ្គិសនី) ប្រជាជនជាច្រើននៅមិនទាន់ដឹងថា រថយន្តអគ្គិសនីគឺជាអ្វីផង ។ អ្នកខ្លះទៀតថា ពួកគេបានដឹងថាវាជាអ្វីហើយ តែនឹងមិនទិញឡើយ ។ មានអ្នកខ្លះទៀតថា វាឡូយណាស់ តែវាមិនមែនសម្រាប់ខ្ញុំទេ តែសម្រាប់ពេលនេះ មានមនុស្សមួយចំនួនថា គេនឹងទិញវាមកធ្វើជារថយន្តបន្ទាប់នៅថ្ងៃខាងមុខ។ ពិតប្រាកដណាស់ វាទាមទារពេលវេលា» ៕
ចែករំលែកព័តមាននេះ