ខេត្តកំពង់ឆ្នាំង ៖ ដោយសារខឹងប្តីស្តីបន្ទោសរឿងផឹកស៊ី នាងក៏រត់ឡើងលើដើមរាំងប៉ងចង.កសម្លាប់ខ្លួន តែត្រូវប្តីនាងឡើងទៅជួយទាន់ ធ្លាក់មកដីទាំងពីរនាក់ បណ្តាលឱ្យម្នាក់បាក់ដៃ និងម្នាក់បាក់ជើង ។ អ្វីហួសចិត្ត…
ខេត្តកំពង់ឆ្នាំង ៖ ដោយសារខឹងប្តីស្តីបន្ទោសរឿងផឹកស៊ី នាងក៏រត់ឡើងលើដើមរាំងប៉ងចង.កសម្លាប់ខ្លួន តែត្រូវប្តីនាងឡើងទៅជួយទាន់ ធ្លាក់មកដីទាំងពីរនាក់ បណ្តាលឱ្យម្នាក់បាក់ដៃ និងម្នាក់បាក់ជើង ។ អ្វីហួសចិត្ត ពេលមកដល់មន្ទីរពេទ្យកុហកថា ប្រពន្ធគាត់ឡើងបេះត្រូយអំពិលទើបបាក់មែកធ្លាក់សង្កត់លើ កើតឡើងកាលពីវេលាម៉ោង០៨ និង២០នាទីយប់ថ្ងៃទី១៩ មីនា ។ នេះបើយោងតាមបណ្ដាញសង្គម ហ្វេសបុក ដែលមាន អខោនឈ្មោះ «មន្ទីរពេទ្យខេត្តកំពង់ឆ្នាំង» ។
នៅក្នុងអាក់ខោនដដែលបានរៀបរាប់ទៀតថា គ្រួសារខាងលើ គឺមានទីលំនៅក្នុងភូមិសំរោង ឃុំពោធិ៍ ស្រុកកំពង់លែង ខេត្តកំពង់ឆ្នាំង ។ កាលពីល្ងាចថ្ងៃទី១៩ មីនា នោះ ស្ត្រីជាប្រពន្ធបានឡើងបេះត្រួយអំពិល ដើម្បីយកមកស្លរ តែអកុសល មែកដើមអំពិលដែលស្ត្រីនោះជាន់ បានប្រេះរកកលនឹងបាក់ ហើយស្ត្រីរូបនោះ ក៏បានហៅបុរសជាប្ដីឱ្យមកជួយ ។ នៅពេលដែលប្តីមកដល់ពីក្រោមប្រពន្ធ មែកអំពិលក៏បានបាក់សង្កត់មកលើប្តី បណ្ដាលឲ្យរងរបួសទាំង២នាក់តែម្តង ។ ក្នុងនោះ បុរសជាប្តីឈ្មោះអឿន សុខជា អាយុ ២៥ ឆ្នាំ ជាជាងផ្សារដែកបានបាក់ដៃឆ្វេង ចំណែកប្រពន្ធឈ្មោះ អៀម សាទី អាយុ២២ ឆ្នាំ បានបាក់ស្មងជើងឆ្វេងដែរ ។
ក្រោយពេលកើតហេតុ អ្នកជិតខាងបានដឹកប្តីប្រពន្ធទាំង២នាក់ មកមន្ទីរពេទ្យខេត្តកំពង់ឆ្នាំង តាមរ៉ឺម៉កម៉ូតូតុតុ និងដឹកតាមការណូត ។ រាល់ការដឹកជនរងគ្រោះមកមន្ទីរពេទ្យ គេមិនយកប្រាក់ទេ ព្រោះតែគ្រួសារនេះក្រីក្រ សូម្បីតែខាងមន្ទីរពេទ្យ ក៏មិនយកថ្លៃសេវ៉ាព្យាបាលដែរ ហើយថែមទាំងឧបត្ថមសម្ភារៈមួយចំនួនទៀត ។
ប៉ុន្តែ ជុំវិញព័ត៌មាននេះ លោក ប៉ាល់ ជឿន អធិការនគរបាលស្រុកកំពង់លែងបានបដិសេធថា មិនដូចការរៀបរាប់របស់ប្តីប្រពន្ធទាំងពីរនាក់នោះឡើយ ។ លោកបានបញ្ជាក់ទៀតថា កាលពីរសៀលថ្ងៃកើតហេតុ បុរសជាប្តីឈ្មោះអឿន សុជា បានត្រឡប់ពីធ្វើការវិញ ក៏ឃើញប្រពន្ធឈ្មោះអៀម សាទី កំពុងអង្គុយផឹកស៊ីនៅផ្ទះជាមួយអ្នកជិតខាង ក៏ស្តីបន្ទោសបន្តិចបន្តួច ។ ភ្លាមនោះ ប្រពន្ធដែលមានចិត្តភ្លើង ខឹងច្រឡោតប្ដី ក៏ស្ទុះរត់ឡើងលើដើមរាំង ហើយស្រែកថា «នឹងឡើងចង.កសម្លាប់ខ្លួនឱ្យស្លាប់ …..!» ។
ដោយឃើញប្រពន្ធប៉ងសម្លាប់ខ្លួនបែបនេះ បុរសជាប្ដីក៏បានរត់ឡើងតាម ដើម្បីរារាំងមិនឲ្យប្រពន្ធចង.ក ព្រោះខ្លាចស្លាប់ តែពេលទៅដល់លើដើមរាំងក៏កើតរឿងប្រតាយគ្នា ព្រោះម្នាក់ចង់ចងកឱ្យស្លាប់ ម្នាក់ជាអ្នករារាំង ក៏បណ្ដាលឲ្យទាំង២នាក់ ធ្លាក់មកដីទាំងអស់គ្នា ហើយម្នាក់បាក់ដៃ ម្នាក់បាក់ជើង រៀងៗខ្លួន បែបនេះ មិនមែនរឿងឡើងបេះត្រួវអំពិលនោះទេ ។
យ៉ាងនេះក្តី ព័ត៌មានដែលបានរៀបរាប់មកខាងលើ មិនមានចេតនាបន្ទោសបង្អាប់ប្ដី-ប្រពន្ធទាំងពីរនាក់ខាងលើនោះទេ តែព័ត៌មានមិនពិតបែបនេះ បានធ្វើឱ្យមានការយល់ច្រឡំ ។
ចែករំលែកព័តមាននេះ