ប្រទេសម៉ូសំប៊ិក ៖ ប្រធានាធិបតីម៉ូសំប៊ិក លោកFILIPE NYUSI កាលពីថ្ងៃទី១៨មីនាថ្លែងទៅកាន់វិទ្យុមួយថា ការវាយប្រហាររបស់ព្យុះស៊ីក្លូនឈ្មោះIDAI លើអាហ្វ្រិកភាគខាងត្បូង ចំនួនមនុស្សស្លាប់អាចមានដលលើសពី១០០០នាក់ ក្នុងប្រទេសម៉ូសំប៊ិកតែមួយ។
សម្រាប់ពេលនេះតុល្យការផ្លូវការ អះអាងពីចំនួនអ្នកស្លាប់ថាមាន៨៤នាក់។ ទោះបីយ៉ាងណាប្រមុខរដ្ឋម៉ូសំប៊ិក ដែលជិះយន្តហោះក្រឡឹងពីលើបណ្ដាតំបន់រងការប៉ះពាល់ គូសបញ្ជាក់តាមវិទ្យុRADIO MOCAMBIQUEថា គ្រោះមហន្តរាយនោះពិតជាធំធេងខ្លាំងណាស់។
ព្យុះIDAIជាព្យុះខ្លាំងបំផុតកើតមាននៅអាហ្វ្រិកភាគខាងត្បូង ចាប់តាំងពីព្យុះឈ្មោះELINEកាលពីឆ្នាំ២០០០មក។ ព្យុះIDAIក៏វាយប្រហារលើប្រទេសសីុមបាវេ៉និងម៉ាឡាវី។ ព្យុះនោះបានបំផ្លាញផ្ទះសម្បែង ស្ពានហើយបង្កឲ្យមានទឹកជំនន់ធ្ងន់ធ្ងរ ការបាក់ដីព្រមទាំងការដាច់ភ្លើង។ គមនាគមន៍នានាក៏៏ដាច់់ដែរក្នុងតំបន់មួយចំនួន។ ទីក្រុងកំពង់ផែBEIRAរបស់ម៉ូសំប៊ិក រងការប៉ះពាល់ជាពិសេស។ ទំហំនៃការបំផ្លាញនៅទីនោះធំធេងណាស់។ វាហាក់ដូចជាតំបន់នោះរងការបំផ្លាញដល់ទៅ៩០%។
នៅទីនោះប្រជាជនកន្លះលាននាក់ នៅដាច់ពីពិភពខាងក្រៅ ជាមួយគំនរនៃបំណែកទាំងឡាយ ដើមឈើរលំរាយប៉ាយ ផ្ទះនានារងការបំផ្លាញនិងខូចខាតធ្ងន់ធ្ងរ។ ទីក្រុងនោះមើលលែងស្គាល់ក្រោយព្យុះ។ ពួកអ្នកនៅរស់រានមានជីវិតមួយចំនួន បាននាំគ្នាឡើងលើដើមឈើ គេចពីទឹកជំនន់ឬឡើងលើដំបូលផ្ទះ រង់ចាំការជួយសង្គ្រោះ។ ចំនួនអ្នកស្លាប់អាចមានលើសពី១០០០នាក់ ហើយមនុស្សច្រើនរយនាក់បាត់ខ្លួន។ បណ្ដាភូមិឋានទាំងមូលបានបាត់រូបដោយទឹកជន់លិច។
នៅប្រទេសស៊ីមបាវ៉េដែលព្យុះបោកបក់ក្នុងល្បឿនដល់ទៅ១៧០គីឡូម៉ែត្រក្នុងមួយម៉ោង ចំនួនអ្នកស្លាប់រាយការណ៍ជាផ្លូវការថាមាន៩៨នាក់ ហើយមនុស្សជាង២០០នាក់បាត់ខ្លួន។ ប៉ុន្តែក៏ដូចនៅម៉ូសំប៊ិកដែរ អាជ្ញាធរគិតថាចំនួនអ្នកស្លាប់នឹងឡើងខ្ពស់នាបណ្ដាម៉ោងខាងមុខ។
នៅម៉ាឡាវីពុំទាន់មានតុល្យការណាមួយត្រូវបានផ្ដល់នៅឡើយតាំងពីព្យុះនោះវាយប្រហារមក។ កាលពីខែកុម្ភៈឆ្នាំ២០០០ព្យុះស៊ីក្លូនឈ្មោះELINE សម្លាប់មនុស្ស៣៥០នាក់ហើយមនុស្ស៦៥០.០០០នាក់បាត់បង់ជម្រកនៅអាហ្វ្រិកភាគខាងត្បូង៕
ចែករំលែកព័តមាននេះ