ប្រទេសអារ៉ាប៊ីសាអូឌីត ៖ យោងតាមកាសែតញូវយ៉កថែមថា ជាង១ឆ្នាំមុនការធ្វើឃាតអ្នកកាសែតម្នាក់ដែលប្រឆាំងរដ្ឋអំណាចអារ៉ាប៊ីសាអូឌីត លោកJAMAL KHASHOGGI ព្រះអង្គម្ចាស់រជ្ជទាយាទ MOHAMMED BEN SALMANE បានអនុវត្តយុទ្ធនាការសម្ងាត់មួយ ដែលសំដៅបិទមាត់ពួកប្រឆាំង។
ក្នុងអត្ថបទមួយចេញផ្សាយកាលពីថ្ងៃទី១៧មីនា កាសែតនោះដែលដកស្រង់សម្ដីបណ្ដាអ្នកទទួលខុសត្រូវអាមេរិក ជាអ្នកដឹងបណ្ដាឯកសារសើុបការណ៍រៀបរាប់ថា សកម្មភាពទាំងនោះរួមមានការតាមដានត្រួតពិនិត្យ ការចាប់ពង្រត់ ការចាប់ឃុំឃាំងនិងការធ្វើទារុណកម្មពលរដ្ឋអារ៉ាប៊ីសាអូឌីតទាំងឡាយ។ គេបានបង្កើតក្រុមអន្តរាគមន៍រហ័សមួយ ដែលចូលរួមយ៉ាងតិចក្នុងប្រតិបត្តិការចំនួន១០ ចាប់តាំងពីឆ្នាំ២០១៧មក។
បេសកកម្មសម្ងាត់មួយចំនួន ត្រូវបានធ្វើដោយសមាជិកកងកុំម៉ង់ដូ ដែលជាអ្នកសម្លាប់និងកាត់ដៃកាត់ជើងសាកសពអ្នកកាសែត លោកJAMAL KHASHOGGI កាលពីខែតុលាឆ្នាំ២០១៨ ក្នុងស្ថានកុងស៊ុលអារ៉ាប៊ីសាអូឌីតប្រចាំក្រុងអីុស្តង់ប៊ុល ដែលនាំឲ្យគេយល់ថា ការធ្វើឃាតនោះជាផ្នែកមួយនៃយុទ្ធនាការចាត់ការពួួកប្រឆាំង។
ការធ្វើឃាតលោកJAMAL KHASHOGGIសហការីរបស់កាសែតវ៉ាស៊ិនតោនប៉ុស្តិ៍ និងជាអ្នករិះគន់ក្រុងរីយ៉ាដ បានបង្កើតឲ្យមានការក្ដុកក្ដួលនិងការក្ដៅក្រហាយលើពិភពលោកទាំងមូល ព្រមទាំងធ្វើឲ្យស្រអាប់ខ្លាំងដល់មុខមាត់របស់អារ៉ាប៊ីសាអូឌីត។ នៅសហរដ្ឋអាមេរិក បណ្ដាព្រឹទ្ធសមាជិកនៃគណបក្សសាធារណរដ្ឋធ្លាប់អះអាងក្រោយស្ដាប់បណ្ដាការសនិដ្ឋានរបស់ភ្នាក់ងារCIAថា គ្មានការសង្ស័យណាមួយឡើយដែលព្រះអង្គម្ចាស់រជ្ជទាយាទ ជាអ្នកបញ្ជាឲ្យសម្លាប់អ្នកកាសែតរូបនោះ។
កាសែតញូវយ៉កថែមបន្តថា ក្នុងចំណោមសកម្មភាពរបស់ខ្លួនក្រុមអន្តរាគមន៍រហ័ស ក៏ជាអ្នកចូលរួមក្នុងការចាប់ឃុំឃាំងនិងធ្វើ្វបាបបណ្ដាសកម្មជនការពារសិទ្ធិនារី ដែលត្រូវចាប់ខ្លួនកាលពីឆ្នាំទៅមិញ៕
ចែករំលែកព័តមាននេះ