រាជធានីភ្នំពេញ ៖ នៅក្នុងរយៈពេលប្រមាណពីរ ឬបីឆ្នាំនេះ តម្លៃកូនក្រពើបានធ្លាក់ចុះគួរអោយកត់សម្គាល់ ដែលធ្វើអោយកសិករចិញ្ចឹមក្រពើមួយចំនួន បានបង្ហាញពីការធ្លាក់ទឹកចិត្តក្នុងការបន្តចិញ្ចឹមក្រពើខណៈទីផ្សារអន្តរជាតិបានបាត់បង់បន្តិចម្ដងៗគួរឲ្យព្រួយ បារម្ភ។ បើតាមលោក កាំង…
រាជធានីភ្នំពេញ ៖ នៅក្នុងរយៈពេលប្រមាណពីរ ឬបីឆ្នាំនេះ តម្លៃកូនក្រពើបានធ្លាក់ចុះគួរអោយកត់សម្គាល់ ដែលធ្វើអោយកសិករចិញ្ចឹមក្រពើមួយចំនួន បានបង្ហាញពីការធ្លាក់ទឹកចិត្តក្នុងការបន្តចិញ្ចឹមក្រពើខណៈទីផ្សារអន្តរជាតិបានបាត់បង់បន្តិចម្ដងៗគួរឲ្យព្រួយ បារម្ភ។
បើតាមលោក កាំង សារិន អ្នកចិញ្ចឹមក្រពើមួយរូបនៅ នៅខណ្ឌដង្កោ រាជធានីភ្នំពេញ បានអោយដឹងថា សព្វថ្ងៃនេះ តម្លៃកូនក្រពើបានធ្លាក់ចុះច្រើនហើយ ដោយសារតែតម្រូវការទីផ្សារនៅប្រទេសថៃ បានធ្លាក់ចុះ នៅតែប្រទេសវៀតណាមមួយប៉ុណ្ណោះដែលនៅមានតម្រូវការ និងបញ្ជាទិញពីកសិករកម្ពុជា ។
លោក កាំង សារិន បញ្ជាក់ថា «តម្លៃក្រពើបានធ្លាក់ចុះមកនៅត្រឹមតែ១៥ដុល្លារ ទៅ១៨ដុល្លារប៉ុណ្ណោះ ទៅតាមប្រភេទក្រពើ ខណៈពីមុនតម្លៃវាបានឡើងដល់ជាង២០ ដុល្លារអាមេរិកក្នុងមួយក្បាល ។ ដូច្នេះការធ្លាក់ចុះនៃតម្លៃកូនក្រពើពិតជាប៉ះពាល់ដល់កសិករចិញ្ចឹមក្រពើណាស់ »។
កសិករចិញ្ចឹមក្រពើរូបនេះ បន្តថា ទន្ទឹមនឹងតម្លៃធ្លាក់ចុះបែបនេះ លោកបានកាត់បន្ថយការចិញ្ចឹមមួយចំនួន ដោយសារតែមិនអាចទប់ទល់នឹងការចំណាយលើចំណីក្រពើប្រចាំថ្ងៃបាននោះឡើយ ហើយសព្វថ្ងៃនេះលោកបានយកចំណូលដែលបានពីអាជីវកម្មផ្សេងមកទប់ទល់នឹងចំណីក្រពើវិញ ជាក់ស្ដែងលោកក៏បានរកស៊ីលើវិស័យដីធ្លីដែរ ដូច្នេះលោកយកផលចំណេញពីដីធ្លី មកទិញចំណីសម្រាប់ក្រពើវិញ ។
លោកបន្ថែមថា កាលពីមុនលោកបានផលិត ផលក្រពើក្នុងមួយឆ្នាំ ប្រមាណ១ម៉ឺនក្បាល តែពេលនេះ វាបានធ្លាក់មកនៅត្រឹមតែ៥ពាន់ទៅ ៦ពាន់ក្បាលប៉ុណ្ណោះ សម្រាប់លក់ចេញទៅកាន់កសិកដ្ឋានក្រពើយកស្បែក និងនាំចេញទៅកាន់ទីផ្សារអន្តរជាតិ ។
លោក កាំង សារិន បន្ថែមថា « បើសិនជាតម្លៃក្រពើនៅតែមិនឡើងវិញនោះទេ ខ្ញុំពិបាកនិយាយថានឹងរក្សាអាជីវកម្មនេះ បានទ្រង់ទ្រាយធំប៉ុនណានោះទេ ដូច្នេះខ្ញុំរំពឹងថាទីផ្សារក្រពើនឹងឡើងថ្លៃវិញនៅពេលឆាប់ៗ » ។
លោក អ៊ិន ហ៊ុល អនុប្រធាននាយកដ្ឋានអភិរក្សជលផល នៃក្រសួងកសិកម្ម រុក្ខាប្រមាញ់និងនេសាទ បានអោយដឹងថា តម្លៃក្រពើបានធ្លាក់ចុះមិនមែនរឿងចំឡែកនោះទេ ពីព្រោះ ដូចបានឃើញស្រាប់ហើយ ទីផ្សារកសិកម្មស្ទើរតែគ្រប់ប្រភេទ បានធ្លាក់ចុះដូចគ្នា ហើយវាមិនមែនកើតឡើងតែក្នុងប្រទេសកម្ពុជានោះឡើយ គឺបានធ្លាក់ចុះនៅបណ្ដាប្រទេសជាច្រើនទៀត ដែលមានសក្ដានុពលលើកសិកម្ម ។
លោក បន្តថា « ទីផ្សារកសិកម្មក្នុងវិស័យជលផល យើងឃើញថាវាបានធ្លាក់ចុះគ្រប់មុខគ្រប់ប្រភេទ ពីព្រោះតែមិនមានតម្រូវការខ្ពស់ដូចកាលពីប៉ុន្មានឆ្នាំមុន » ។ លោកបន្តថា សម្រាប់ទីផ្សារក្រពើក៏ដូចគ្នាដែរ ក៏ប៉ុន្តែកសិករនៅអាចទប់ទល់បាន ព្រោះតែតម្លៃក្រពើមិនធ្លាក់ខ្លាំងរហូតដល់ទប់រួចមិននោះឡើយ ។ តម្លៃក្រពើបច្ចុប្បន្ននេះ គឺនៅអោយកសិករបានប្រាក់កម្រៃខ្លះដើម្បីទប់ជាមួយនឹងចំណី តែបើសិនជាពួកគាត់ខាតខ្លាំង ប្រហែលជាពួកគាត់មិនបន្តចិញ្ចឹមទៀតនោះទេ ។
មន្ត្រីជលផលរូបនេះបានអោយដឹងផងដែរថា បច្ចុប្បន្នកសិកដ្ឋានចិញ្ចឹមក្រពើនៅទូទាំងប្រទេសកម្ពុជាដែលបានចុះបញ្ជី មានចំនួន ៥៦១កសិដ្ឋាន ដែលអាចផលិតកូនក្រពើបានប្រមាណពី២០ម៉ឺន ទៅ៣០ម៉ឺនក្បាល ក្នុងមួយឆ្នាំៗ ។ ក្នុងចំណោមកសិដ្ឋានទាំងជាង៥០០កសិដ្ឋាននេះដែរ ក៏មានកសិដ្ឋានមួយចំនួនបានផលិតក្រពើយកស្បែក ដើម្បីលក់ចេញទៅក្រៅប្រទេសផងដែរ ក៏ប៉ុន្តែបើប្រៀបធៀបគុណភាពស្បែកក្រពើទៅនឹងប្រទេសជិតខាង ឃើញថាគុណភាពស្បែកក្រពើនៅកម្ពុជា មិនទាន់ស្របទៅតាមស្ដង់ដារ ដែលគេចង់បាននៅឡើយទេ ។
លោកបញ្ជាក់ថា ដើម្បីអោយវិស័យចិញ្ចឹម ក្រពើនៅកម្ពុជា បានទទួលផលកាន់តែច្រើន និងរីកចម្រើននោះ មន្ត្រីជលផល របស់ក្រសួង កសិកម្មរុក្ខាប្រមាញ់ និងនេសាទ បានចុះអប់រំបណ្ដុះបណ្ដាល កម្មវិធីចិញ្ចឹមក្រពើ អោយបានល្អនិងបង្ហាញពីបច្ចេកទេសចិញ្ចឹមក្រពើ សម្រាប់យកកូន និងក្រពើសម្រាប់យកស្បែក ធ្វើយ៉ាងណាអោយទទួលបានក្រពើដែលមានស្បែកល្អ សម្រាប់ប្រកួតប្រជែងនៅលើទីផ្សារប្រទេសជិតខាង។
យ៉ាងណាមិញ ឯកសារផ្លូវការមួយរបស់ក្រសួងកសិកម្មដែលកោះសន្តិភាពទទួលបាននោះបានអោយដឹងផងដែរថា មានការចិញ្ចឹមក្រពើរហូតដល់ចំនួនជាង ៤១០ ០០០ ក្បាល កាលពីឆ្នាំ២០១៨ ដោយមានការកើនឡើងបន្តិចពីឆ្នាំ២០១៧ ។ ឯកសារដដែលបានឲ្យដឹងការចិញ្ចឹមក្រពើជាផ្នែកមួយនៃវារីវប្បកម្មដែលក្រសួងយកចិត្តទុកដាក់ជំរុញ ។ កាលពីឆ្នាំ២០១៨ ផលវារីវប្បកម្មមានចំនួន២៥៤០០០តោន ដោយកើនឡើងចំនួនជាង២២ភាគរយ បើប្រៀបធៀបនឹងឆ្នាំ២០១៧ ។ នៅឆ្នាំ២០១៨ កម្ពុជាក៏ផលិតបានកូនត្រីពូជចំនួន២១០លានក្បាលផងដែរ៕
ចែករំលែកព័តមាននេះ