ប្រទេសថៃ ៖ យុទ្ធនាការគួរឱ្យកត់សម្គាល់នៅឯប្រទេសថៃ គឺផែនការសម្រកក្បាលពោះសម្រាប់ប៉ូលិសដែលគេហៅថា «ក្បាលពោះស្អុយ» គឺមិនមានការស្វាគមន៍ចំពោះមន្ត្រីប៉ូលិសណាដែលដុះក្បាលពោះនោះទេ ។ ដោយអនុវត្តតាមផែនការនេះ ប៉ូលិសថៃដែលធាត់ដុះក្បាលពោះ ត្រូវបានគេបញ្ជូនទៅមជ្ឈមណ្ឌលហ្វឹកហ្វឺនសម្រកក្បាលពោះ ដែលមានទីតាំងស្ថិតក្នុងស្រុក Pak Chong ខេត្តណាខនរាជសីម៉ា (Nakhon Ratchasima) រយៈពេល២សប្តាហ៍ ដើម្បីធ្វើការហាត់ប្រាណដែលជាផ្នែកមួយនៃកម្មវិធីថ្មីក្នុងការជួយសម្រកទម្ងន់ដែលមានប្រសិទ្ធភាព ហើយត្រូវប៉ូលិសដែលបណ្តោយឱ្យខ្លួនឡើងទម្ងន់និងដុះក្បាលពោះត្រូវបានអង្គភាពរបស់ខ្លួនចាត់បញ្ជូនឱ្យមកហ្វឹកហ្វឺនដើម្បីសម្រកទម្ងន់ និងក្បាលពោះ ដោយដាក់លក្ខខណ្ឌថាបើក្បាលពោះស្អ៊ុយមិនស្រក មិនអាចវិលត្រឡប់មកធ្វើការវិញបានឡើយ ព្រោះនេះគឺជាកាតព្វកិច្ច ។
ជុំវិញដំណើរការនេះ លោក Sornpetch ជាមន្ត្រីដឹកនាំការហ្វឹកហ្វឺននេះបានឲ្យដឹងថា មន្ត្រីប៉ូលិសទាំងអស់ គឺត្រូវតែហ្វឹកហាត់នៅក្នុងជំរុំជារៀងរាល់ថ្ងៃ និងចូលរួមសកម្មភាពនានាដូចជា ជិះកង់ និងការងារខាងក្រៅផ្សេងៗទៀត ដើម្បីជួយឲ្យពួកគេឆាប់ស្រកទម្ងន់ ។ ជាមួយគ្នានេះ ក៏មានការបង្កើតជា ID មួយ ដើម្បីធ្វើការតាមដាន និងកត់ត្រាពីស្ថានភាពទម្ងន់របស់ពួកគេមុននិងក្រោយការហ្វឹកហាត់នេះ ។ ជំរំហ្វឹកហាត់បើតាមប្រភពដដែលបញ្ជាក់ថា ទើបតែចាប់ផ្តើមបានរយៈពេល១ខែប៉ុណ្ណោះ ប៉ុន្តែទទួលបានការគាំទ្រយ៉ាងខ្លាំង ពីសំណាក់មហាជន និងនៅលើបណ្តាញសង្គម ។
ឃើញសកម្មភាពនៅឯប្រទេសថៃនោះ កោះសន្តិភាពបាននឹកឃើញទៅដល់លោកឧត្តមសេនីយ៍ រ័ត្ន ស្រ៊ាង មុនពេលមកទទួលតំណែងជាមេបញ្ជាការកងរាជអាវុធហត្ថរាជធានីភ្នំពេញ គឺជាមេបញ្ជាការកងរាជអាវុធហត្ថខេត្តបន្ទាយមានជ័យ ។ លោកឧត្តមសេនីយ៍ក៏បានចាត់ការលើកូនចៅរបស់លោកដែលដុះក្បាលពោះ ត្រូវតែធ្វើការហ្វឹកហាត់ដើម្បីសម្រក ។
កាលណោះកោះសន្តិភាពក៏ធ្លាប់បានចុះផ្សាយ១ឈុតរួចទៅហើយដែរ ដែលបានបង្ហាញថាលោកឧត្តមសេនីយ៍ពិតជាមេបញ្ជាការទី១ហើយ ដែលបានចាត់វិធានការឱ្យមន្ត្រីជាកងកម្លាំងក្រោមឱវាទត្រូវតែហ្វឹកហាត់សម្រកក្បាលពោះ តែមិនដឹងថា តាំងពីពេលនោះមកបានទទួលលទ្ធផលទៅជាបែបណានៅឡើយនោះទេ ។
បញ្ហាដុះក្បាលពោះមិនថាជាកងកម្លាំងណានោះទេ មិនត្រូវឱ្យមានដុះក្បាលពោះឡើយ ផ្ទុយទៅវិញបញ្ហាដុះក្បាលពោះនៅតែឃើញមានក្នុងជួរកងកម្លាំង ។ បើសិនជាមានការតម្រូវឱ្យហ្វឹកហាត់សម្រកក្បាលពោះដូចនៅស្រុកថៃប្រហែលជាល្អមើលហើយ ប្រហែលជាមានមិនតិចទេ ។
សម្រាប់មន្ត្រីកងកម្លាំងរបស់កម្ពុជា ដែលខ្លះដុះក្បាលពោះស្អ៊ុយ ដើរយោងខ្លួនសឹងតែមិនរួចទៅហើយ តើធ្វើមេគេមានប្រសិទ្ធភាពការងារបានប៉ុនណាទៅហ្ន៎ ?
ចែករំលែកព័តមាននេះ