រាជធានីភ្នំពេញ ៖ប្រធានអាជ្ញាធរជាតិប្រយុទ្ធប្រឆាំងគ្រឿងញៀនបានបង្ហាញជំហរថា នឹងប្រើយុទ្ធសាស្ត្រកម្ចាត់ឈ្មួយគ្រឿងញៀន និងយកអ្នកប្រើប្រាស់ទៅព្យាបាល ហើយនៅតែបន្តចុះអប់រំអំពីបញ្ហាគ្រឿងញៀនដល់ប្រជាពលរដ្ឋ ។ ប្រធានអាជ្ញាធរជាតិប្រយុទ្ធប្រឆាំងគ្រឿងញៀនលោកឧបនាយករដ្ឋមន្ត្រីកែ គឹមយ៉ាន បានផ្តល់បទសម្ភាសន៍ជាមួយអ្នកសារព័ត៌មានក្រោយ ក្នុងកិច្ចប្រជុំស្តីពីលទ្ធផលការងារត្រួតពិនិត្យគ្រឿងញៀន ឆ្នាំ២០១៨ និងទិសដៅការងារឆ្នាំ២០១៩នៅថ្ងៃទី១៩ ខែមីនា ឆ្នាំ២០១៩ ស្តីការក្រសួងថា វិធានការនៃការបង្ក្រាបបញ្ហាគ្រឿងញៀនមានជាង៦០ចំណុច ប៉ុន្តែមានតែ៣ចំណុចប៉ុណ្ណោះ ។
លោកបញ្ជាក់ថា «ឥឡូវយើងនៅតែបន្តការអប់រំទោះបីជាការអប់រំនោះមានភាពស្មុគស្មាញ ហើយមិនសូវបានផលនៅកន្លែងខ្លះ ប៉ុន្តែវាចាំបាច់ត្រូវធ្វើកិច្ចការនេះ(អប់រំ) ដើម្បីធ្វើយ៉ាងណាឲ្យគេបដិសេធគ្រឿងញៀននេះចោល ហើយធ្វើយ៉ាងណាឲ្យគេព្យាបាលនៅពេលដែលប៉ះពាល់ ឬប្រើគ្រឿងញៀន» ។ លោកបានឲ្យដឹងថា បច្ចុប្បន្នអ្នកប្រើប្រាស់គ្រឿងញៀនមានចំនួនប្រមាណ២ម៉ឺននាក់ ហើយអ្នកទាំងនេះត្រូវការព្យាបាល បើមិនដូច្នេះថាទេនឹងទៅជាទីផ្សារមួយសម្រាប់ពួកឈ្មួញគ្រឿងញៀន ។
លោកបញ្ជាក់ថា «បើអត់មានអ្នកប្រើអាឈ្នួញគ្រឿងញៀននោះក៏ងាប់ដែរ តែសួរថា យើងធ្វើអាណាមុន ? យើងសូមប្រាប់ថា យើងធ្វើទាំងពីរ គឺឈ្នួញក៏ធ្វើអ្នកប្រើក៏ត្រូវបញ្ចប់ និងយកមកព្យាបាល» ។ ជាមួយគ្នានោះដែរលោកឧបនាយករដ្ឋមន្ត្រីក៏បានឲ្យដឹងថា ពេលនេះអាជ្ញាធរប្រយុទ្ធឆាំងគ្រឿងញៀនបានកំពុងប្រើគោលនយោបាយដោយយកភូមិឃុំជាកន្លែងប្រយុទ្ធប្រឆាំងគ្រឿងញៀន ហើយប្រមួលផ្តុំយកអ្នកប្រើគ្រឿងញៀនទៅព្យាបាល ។
លោក កែ កឹមយ៉ាន ប្រធានអាជ្ញាធរជាជាតិប្រយុទ្ធប្រឆាំងគ្រឿងញៀនបានលើកឡើងថាបញ្ហាគ្រឿងញៀនមិនមានតែនៅកម្ពុជានោះទេ សូម្បីប្រទេសនៅជិតកម្ពុជាក៏កើតផងដែរ ។ ដូច្នេះហើយកម្ពុជាទទួលឥទ្ធិពលពីគេតាមរយៈការធ្វើចរាចរណ៍លក់ជួញដូរ ។ លោកបានបញ្ជាក់ថា ប្រទេសណាក៏មិនថយចំពោះបញ្ហាគ្រឿងញៀន សូម្បីប្រទេសជិតខាងក៏នៅតែកើនដែរ ។ លោកបានបន្ថែមថា បញ្ហាគ្រឿងញៀនរាជរដ្ឋាភិបាលបានកំពុងតែខិតខំក្នុងការទប់ស្កាត់ការជូញដូរគ្រឿងញៀននៅតាមតំបន់ព្រំដែនដែលគេហៅថា ភូមិ«ស» ។
លោកថា សារៈសំខាន់នៃការបង្ក្រាប គឺដើម្បីកុំឲ្យចូលមកស្រុកខ្មែរដែលបច្ចុប្បន្នគ្រឿងញៀនបាននចូលនាំចូលពីតំបន់ភូមិភាគឥសាឦ ហើយពីមុននាំមកពីទិសាខាងលិច ។ លោកឧបនាយករដ្ឋមន្ត្រីបានបន្ថែមថា ពីមុនគ្រឿងញៀនវាបានមកពីគោលដៅពីប្រទេសថៃ ឥលូវវាបានមកដល់ប្រទេសឡាវ អីញ្ចឹងរឿងសំខាន់យើងពង្រឹងទប់ស្កាត់ការហូរគ្រឿងញៀននៅភូមិភាគឥសាឦ ហើយឆ្នាំ២០១៩នេះយើងជ្រើសរើសខេត្តមួយដោយយកឃុំមួយអនុវត្តការបង្ក្រាបផងដែរ ៕
ចែករំលែកព័តមាននេះ