ប្រទេសម៉ូសំប៊ិក ៖ មនុស្សយ៉ាងតិច១៣៨នាក់ស្លាប់ នៅស៊ីមបាវ៉េ និងនៅម៉ូសំប៊ិកជិតខាង ដោយសារព្យុះស៊ីក្លូនយ៉ាងបំផ្លិចបំផ្លាញមួយ ឈ្មោះ IDAI ហើយមនុស្សច្រើននាក់ទៀតត្រូវបាត់ខ្លួនកាលពីថ្ងៃទី១៧ មីនា ក្នុងប្រទេសអាហ្វ្រិកភាគខាងត្បូងទាំង២នោះ ដែលរងការប៉ះពាល់ដោយទឹកជំនន់និងខ្យល់បោកបក់យ៉ាងខ្លាំង។
តុល្យការនៅម៉ូសំប៊ិកចំនួនអ្នកស្លាប់មាន៦៨នាក់នាភាគកណ្ដាលប្រទេស ចំណែកនៅស៊ីមបាវ៉េ ចំនួនអ្នកស្លាប់មានដល់៧០នាក់នាភាគខាងកើតប្រទេស។ រដ្ឋមន្ត្រីបរិស្ថានម៉ូសំប៊ិក លោកCELSON CORREIA ថ្លែងនៅក្រុងBEIRAថា មនុស្ស៦៨នាក់ស្លាប់ក្នុងស្រុកបេរ៉ានិងស្រុកបុនដូ។ ពិតណាស់តុល្យការអាចមានខ្ពស់ជាងនេះទៀត ក្រោយការបោកបក់របស់ព្យុះនោះ កាលពីថ្ងៃទី១៤មីនាមុនពេលវាបោកបក់មកដល់ស៊ីមបាវ៉េ។ ខ្ញុំគិតថា នោះជាគ្រោះមហន្តរាយធម្មជាតិធ្ងន់ធ្ងរបំផុត វាយប្រហារលើម៉ូសំប៊ិក។ អ្វីៗទាំងអស់រងការបំផ្លាញ ហើយអាទិភាពរបស់យើងគឺជួយសង្គ្រោះអាយុជីវិតមនុស្ស។
ចំណែកអ្នកតំណាងរាស្ត្រស៊ីមបាវ៉េម្នាក់នៃស្រុក CHIMANIMANI ភាគខាងកើតប្រទេសដែលរងការប៉ះពាល់ខ្លាំងដោយគ្រោះមហន្តរាយនោះ លោក JOSHUA SACCOថ្លែងថា គេកំពុងតាមរុករកមនុស្ស៦៥នាក់ ខណៈចំនួនអ្នកបាត់ខ្លួនមានច្រើននាក់ក្រោយការវាយប្រហារនៃព្យុះនោះ ដែលបំផ្លាញផ្ទះសម្បែង និងស្ពាននានា។ ពួកអ្នកជួយសង្គ្រោះពុំទាន់អាចចូលដល់គ្រប់តំបន់រងការប៉ះពាល់។ ស្ថានភាពឧតុនិយមមិនល្អ រារាំងបណ្ដាឧទ្ធម្ភាគចក្រយោធា មិនអាចចូលទៅដល់ជួយពួកអ្នករងគ្រោះ។
សមាជិកសភារូបនោះបន្តទៀតថា រហូតមកទល់ពេលនេះមនុស្ស៧០នាក់ស្លាប់នៅប្រទេសលោក ហើយមនុស្សប្រហែលពី១៥០ទៅ២០០នាក់បាត់ខ្លួន។ ភាគច្រើននៃអ្នកបាត់ខ្លួនគឺមន្ត្រីរដ្ឋការនៃប្លុកស្នាក់នៅមួយ ដែលរងការរាតត្បាតទាំងស្រុងដោយទឹកជំនន់។
កាលពីថ្ងៃទី១៧មីនា កងទ័ពស៊ីមបាវ៉េ បានជួយសិស្ស គ្រូបង្រៀននិងបុគ្គលិកជិត២០០នាក់នៃសាលារៀនមួយ ដែលជាប់ទៅណាមិនរួចដោយសារទឹកឡោមព័ទ្ធជាប់ នៅស្រុកCHIMANIMANI។
យោងតាមអ.ស.បថា មនុស្សជាង១០០នាក់បាត់ខ្លួននៅស៊ីមបាវ៉េ ហើយមនុស្សជិត១០.០០០នាក់រងការប៉ះពាល់ដោយព្យុះ។ ចំណែកមនុស្សច្រើនសិបនាក់ នៅតែបាត់ខ្លួននាភាគកណ្ដាលម៉ូសំប៊ិក និងភាគខាងកើតស៊ីមបាវ៉េ ក្រោយការវាយប្រហាររបស់ព្យុះនេះ ដែលអមដោយខ្យល់បោកបក់និងភ្លៀងធ្លាក់ខ្លាំងបំផុតនិងទឹកជំនន់៕
ចែករំលែកព័តមាននេះ