កំពង់ឆ្នាំង ៖ ប្រជាកសិករ និង អាជីវករអ្នកលក់និងអ្នកទិញកសិផល ត្អូញត្អែរម្ចាស់អាជីវកម្មកំពង់ផែថ្មី លើកទំនិញពួកគាត់មិនទាន់ពេលវេលា ធ្វើអោយជួបបញ្ហាខាតបង់និងព្រួយបារម្ភបានសំណូមពរដល់លោកអភិបាលខេត្តមេត្តាជួយ ប្រជាកសិករ ដែលដឹកកសិផលមកលក់ ក៍ដូចជាក្រុមអាជីវករ ជាអ្នកប្រមូលទិញ កសិផលបានត្អូញត្អែរ ពីទុក្ខលំបាករបស់ពួកគាត់ ចំពោះម្ចាស់អាជីវកម្មផែថ្មី ដែលលើកដាក់ទំនិញរបស់ពួកគាត់មិនទាន់ពេល ធ្វើអោយហានិភ័យគ្រប់បែបយ៉ាង ខាតទាំងពេលវេលា ថវិកា និងព្រួយបារម្ភ ការទន្ទឹងរង់ចាំ រយៈពេលយូរ ពេកខ្លាចក្រែងលិចទូក កាណូតបណ្តាលអោយខូចខាតទាំងស្រុងតែម្តង ។ ហេតុនេះហើយទាំងប្រជាកសិករ ទាំងអាជីវករ សំណូមពរយ៉ាងទទូច ដល់លោកអភិបាលខេត្តសូមជួយជំរុញ អោយម្ចាស់អាជីវកម្មដែលទទួលបានសិទ្ឋធ្វើអាជីវកម្ម ផែថ្មីធ្វើយ៉ាង បង្កើនមធ្យោបាយ ឬកម្មករលើកដាក់ទំនិញរបស់ពួកគាត់អោយទាន់ពេលវេលា។
ក្រុមអាជីវករ ដែលសុទ្ឋសឹងជាអ្នកទទួលទិញកសិផល ពីប្រជាកសិករ នៅកំពង់ផែថ្មី សង្កាត់ខ្សាម ក្រុងកំពង់ឆ្នាំង បានអោយដឹងថា៖ កាលម្ចាស់អាជីកម្មផែចាស់ គឺរាល់ការលើកដាក់និងដឹកជញ្ជូនទំនិញរបស់ពួកគាត់ គឺងាយស្រូលខ្លាំងណាស់ ហើយដឹកជញ្ជូនដល់ផ្ទះទាន់ពេលវេលា ដោយមិនលំបាកឡើយ ។ ប៉ុន្តែចាប់តាំង ពីម្ចាស់ថ្មីទទួលសិទ្ធិធ្វើអាជីវកម្មផែថ្មីមក គឺពួកគាត់ជួបការលំបាកខ្លាំងណាស់ ការលើកដាក់ទំនិញមិនទាន់ពេលវេលា ដោយសារខ្វះមធ្យោបាយ និង កម្មករមិនគ្រប់គ្រាន់ពេល ខ្លះទាំងកសិករដឹកកសិផលមកលក់ ទាំងអា ជីវករអ្នកទិញ ត្រូវរង់ចាំកម្មករកំពង់ផែលើកទំនិញអស់ រហូតដល់ម៉ោង១ម៉ោង២រំលងអាធ្រាតុក៍មាន ។ ពេលខ្លះលើកមិនទាន់ម្ចាស់ផែ ច្រានក្បាលទូក កាណូត របស់ពួកគាត់ចេញ អោយទៅរកកន្លែងលើកដាក់ផ្សេង ប៉ុន្តែម្ចាស់ផែ នៅទៅតាមយកប្រាក់ថ្លៃកំពង់ផែដដែល ក្នុងតម្លៃ១តោន ៦ពាន់រៀល ។ ពេលខ្លះស្ទះខ្លាំងពេក ក្រុមអាជីវករត្រូវប្រើកម្មករខ្លួនឯង ។
ប្រភពពីក្រុមអាជីករ ដដែលបានបន្តថា៖ ពេលខ្លះកសិករដឹកកសិផលចូលដល់ផែនៅម៉ោង៧ព្រឹក ដល់ម៉ោង១២ថ្ងៃត្រង់ទើបកម្មករផែលើកអស់ បើចូលដល់ផែពេលរសៀលជួនកាលរហូត ដល់ម៉ោង១ឬ២រំលងអាធ្រាតុ ទើបហើយ។ ទាំងអស់នេះបង្ករអោយស្ទះទំនិញដឹកចេញទៅលក់នៅខាងក្រៅ មិនទាន់ពេលវេលា ធ្វើអោយមានការខាតបង់ ព្រោះតម្លៃឡើងចុះ មិនទៀងទាត់ ។ម្យ៉ាងវិញទៀតការទន្ទឹងរង់ចាំំបែបនេះគឺជួបហានិភ័យខ្ពស់ ក្រែងលិចទូក កាណូត ធ្វើមានការខាតបង់ធ្ងន់ធ្ងរជាពុំខាន ។ ពួកគាត់សំណូមពរ ដល់ឯកឧត្តម អភិបាលខេត្ត សូមមេត្តា ជួយធ្វើយ៉ាងណាជម្រុញ ម្ចាស់អាជីវកម្មផែថ្មី រកវិធីលើកទំនិញរបស់ពួកគាត់អោយទាន់ពេលវេលា ។ ឬបើម្ចាស់អាជីវកម្មនេះគ្មានលទ្ឋភាព គួររកម្ចាស់អាជីវកម្មណាដែលមានលទ្ឋភាព ដើម្បីជួយដល់ប្រជាកសិករតាមដងទន្លេ ក៍ដូចជាជួយដល់ក្រុមអាជីករផងដែរ ។
ជុំវិញករណីនេះភ្នាក់ងារកោះសន្តិភាពយើងព្យាយាមទូរស័ព្ទទៅ ម្ចាស់អាជីវកម្មកំពង់ផែថ្មី លោក សួង ប៊ុន សុង ត្រូវលោកឆ្លើយថា៖ ទូរស័ព្ទច្រឡំលេខហើយ រួចក៍បិទទូរសព្ទ័តែម្តង ៕
ចែករំលែកព័តមាននេះ