រាជធានីភ្នំពេញ ៖ ក្នុងកិច្ចខិតខំប្រឹងប្រែងរបស់រាជរដ្ឋាភិបាលក៏ដូចជាថ្នាក់ដឹកនាំក្រសួងពាក់ព័ន្ធ ក្នុងការជំរុញផលិតលផលកម្ពុជាទៅលក់ក្នុងទីផ្សារតំបន់ ដ៏ដូចជាអន្តរជាតិ ថ្មីៗនេះក្រសួងពាណិជ្ជកម្មបានជូនដំណឹងដល់ផលិតករ និងអ្នកនាំចេញកម្ពុជាឲ្យបានដឹងថា មុខទំនិញមួយចំនួនរបស់កម្ពុជាទទួលបានភាពអនុគ្រោះពន្ធសូន្យភាគរយសម្រាប់នាំចេញទៅវៀតណាម ។
ក្រសួងពាណិជ្ជកម្មបានជូនដំណឹងទៅផលិតករ និងអ្នកនាំចេញ ដោយបញ្ជាក់ថា ក្រោមកិច្ចសម្របសម្រួលជំរុញពាណិជ្ជកម្មទ្វេភាគីរវាងរាជរដ្ឋាភិបាលកម្ពុជា និងរដ្ឋាភិបាល វៀតណាមនោះ កាលពីថ្ងៃទី ២៦ ខែកុម្ភះ ឆ្នាំ២០១៩ កន្លងទៅរដ្ឋាភិបាលទាំងពីរ បានចុះហត្ថលេខាលើកិច្ចព្រមព្រៀងមួយដែលមានន័យថា កម្ពុជាទទួលបានភាពអនុគ្រោះពន្ធសូន្យភាគរយ (០%) នូវមុខទំនិញចំនួន ៣២ បន្ទាប់ពន្ធគយ ពីសាធារណរដ្ឋសង្គមនិយមវៀតណាមសម្រាប់ឆ្នាំ២០១៩-២០២០ ។
យោងតាមសេចក្តីជូនដំណឹងរបស់ក្រសួង ពាណិជ្ជកម្ម ចុះថ្ងៃទី ១១ ខែមីនា ឆ្នាំ២០១៩ បានបញ្ជាក់ថា «ផលិតករ ឬអ្នកនាំចេញ ដែលបាននិងកំពុងប្រកបអាជីវកម្ម ទាក់ទងនឹងមុខទំនិញ […] នៃកិច្ចសម្របសម្រួលជំរុញពាណិជ្ជកម្មទេ្វភាគីខាងលើ មានបំណងនាំចេញទៅសាធារណរដ្ឋសង្គមនិយមវៀតណាម គឺទទួលបានភាពអនុគ្រោះពន្ធសូន្យភាគរយ (០%) ត្រូវស្នើសុំវិញ្ញាបនបត្របញ្ជាក់ពីដើមកំណើតទំនិញ» តាមរយៈគេហទំព័ររបស់ក្រសួង ។ ដោយឡែកសម្រាប់បិរមាណមុខទំនិញសន្លឹកថ្នាំជក់ និងអង្ករ សម្រាប់អនុវត្តឆ្នាំ ២០១៩ ក្រសួងតម្រូវឲ្យផលិតករ ឬអ្នកនាំចេញ ដាក់ពាក្យស្នើសុំទៅក្រសួងពាណិជ្ជកម្ម នៃនាយក ដ្ឋាននាំចេញ-នាំចូល នៃអគ្គនាយកដ្ឋានសេវាពាណិជ្ជកម្ម ដែលនឹងផុតកំណត់ត្រឹមថ្ងៃទី ០៨ ខែមេសា ឆ្នាំ ២០១៩ ។
យោងតាមឯកសាររបស់ក្រសួងដដែល បានបញ្ជាក់ថាមុខទំនិញចំនួន ៣២ បន្ទាត់ ពន្ធគយ ដែលទទួលបានភាពអនុគ្រោះពន្ធសូន្យភាគរយពីវៀតណាម ដែលមានដើមកំណើតនៅកម្ពុជា មានដូចជា៖ បសុបក្សីរស់ សំដៅទៅលើ ទា ក្ងាន មាន់បារាំង និងបក្សីគីណា, សាច់និងបំណែកសាច់ដែលអាចបរិភោគបានរបស់បសុបក្សី នៅទីតាំងលេខ ០១.០៥ ស្រស់ ក្លាស្សេ និងបង្កក, ផ្លែឈើប្រភេទក្រូចស្រស់ ឬក្រៀម, ថ្នាំជក់ កាត់ធាង/ច្រកដោយផ្នែក ឬទាំងស្រុង ដែលជាប្រភេទថ្នាំជក់វើជីនីញ៉ា អប់ផ្សែង ឬ ថ្នាំជក់វើជីនីញ៉ា ក្រៅពីអប់ផ្សែង, ស្រូវ, ស្រូវមិនទាន់បកសម្បក និងបកសម្បកជាដើម ៕
ចែករំលែកព័តមាននេះ