រាជធានីភ្នំពេញ ៖ តំណាងក្រុមហ៊ុនដែលទទួលបានសិទ្ធសម្រាប់ការវិនិយោគលើគម្រោងព្រលានយន្តហោះអន្តរជាតិលំដាប់ 4F លោកអគ្គនាយកក្រុមហ៊ុន OCIC ឧកញ៉ា ពុង ឃាវសែ បានឱ្យដឹងថាបើមិនមានការជួបបញ្ហាវិវាទដីធ្លីនោះទេ ចំណតអាកាសយានដ្ឋានអន្តរជាតិភ្នំពេញថ្មី ដែលគ្រោងនឹងសាងសង់នៅក្នុងទឹកដីស្រុកកណ្តាលស្ទឹង ខេត្តកណ្តាល និងស្រុកបាទី ខេត្តតាកែវ នឹងចាប់ផ្តើមសាងសង់នាដើមឆ្នាំ២០២៤។
លោកឧកញ៉ា ពុង ឃាវសែ អគ្គនាយកក្រុមហ៊ុន OCIC បានឱ្យដឹងថា យ៉ាងយូរនៅដើមឆ្នាំ២០២៤ ខាងមុខនេះ ក្រុមហ៊ុនដ៏ធំមួយរបស់ប្រទេសអង់គ្លេស និងក្រុមហ៊ុនពាក់ព័ន្ធនានាទៀត នឹងចាប់ផ្តើមដំណើរការសាងសង់ព្រលានយន្តហោះអន្តរជាតិភ្នំពេញថ្មី ប្រសិនបើមិនមានវិវាទ ឬបញ្ហាដីធ្លីពាក់ព័ន្ធក្នុងបរិវេណគម្រោងត្រូវបានដោះស្រាយ។
លោកឧកញ៉ា ពុង ឃាវសែ បានបញ្ជាក់ថា ៖ «នៅពេលបច្ចុប្បន្ននេះ តំបន់ដែលនឹងត្រូវបានសាងសង់ព្រលានយន្តហោះនោះ គឺកំពុងបានដំណើរការរ៉ាវរកគ្រាប់មីន និងគ្រាប់អាវុធយុទ្ធភ័ណ្ឌនានាទៀត ដែលក្នុងមួយថ្ងៃគឺគេអាចរ៉ាវរកគ្រាប់មីនបានក្នុងទំហំដីពី៥ ទៅ៦ហិចតា ហើយក្នុងទំហំដីដែលគ្រោងសាងសង់ព្រលានគឺមានប្រមាណជាង២៦០០ហិកតា គឺត្រូវរ៉ាវមីនរយៈពេល៨ខែទើបរួចរាល់» ។
ឧកញ៉ា ពុង ឃាវ សែ បានបន្តថា ដីសាងសង់ព្រលានយន្តហោះអន្តរជាតិលំដាប់ 4F នេះ បច្ចុប្បន្ន ប្រមូលដីបានប្រមាណជាង១,០០០ហិចតាហើយ ពោលគឺប្រមូលបាន៤០% នៅសល់៦០%ទៀត កំពុងរៀបចំដោះស្រាយ។ សម្រាប់ការសង់ព្រលានយន្តហោះនៅក្នុងទឹកដីស្រុកកណ្តាលស្ទឹង និងស្រុកបាទីនោះ កន្លងមក មានក្រុមហ៊ុនធំៗបីនៅក្នុងពិភពលោក បានដេញថ្លៃសាងសង់ ប៉ុន្តែចុងក្រោយកម្ពុជាសម្រេចអោយក្រុមហ៊ុនដ៏ធំមួយរបស់ប្រទេសអង់គ្លេសជាអ្នកទទួលសាងសង់។
សូមបញ្ជាក់ថា ព្រលានយន្តហោះថ្មីដែលគ្រោងសាងសង់ចំណុះឱ្យរាជធានីភ្នំពេញនេះ គឺបានប្រើប្រាស់ទុនវិនិយោគ ១,៥០០លានដុល្លារសហរដ្ឋអាមេរិច ក្នុងនោះ ប្រាក់កម្ចីធនាគារបរទេសគឺមានចំនួន១,១០០លានដុល្លាអាមេរិក កម្ចីពីភាគទុន OCIC មានចំនួន២៨លានដុល្លារអាមេរិក និងដើមទុនចុះបញ្ជី មាន១២០លានដុល្លារអាមេរិក ក្នុងនោះក្រុមហ៊ុន OCIC មាន៩០% និងរដ្ឋលេខាធិការដ្ឋានអាកាសចរណ៍ស៊ីវិលតំណាងរាជរដ្ឋាភិបាលគឺមាន១០%។
យ៉ាងណាក៏ដោយ ទីតាំងគម្រោងព្រលានយន្តហោះថ្មីស្ថិតនៅឃុំពុទ្ធស នៅស្រុកបាទីខេត្តតាកែវ ហាក់មិនមានបញ្ហាដែលនាំដល់វិវាទដីធ្លីនោះទេ ព្រោះលាតសន្ធឹងលើដីប្រមាណជាង ១០០ ហិកតាដែលជាប្រភេទដីកសិកម្ម ៦ខែគោក ៦ខែលិចទឹក។ នេះបើយោងតាមមន្ត្រីស្រុកបាទី ។
ក៏ប៉ុន្តែនៅមានភាពមិនច្បាស់លាស់នៅឡើយពាក់ព័ន្ធនឹងទីតាំងគម្រោងព្រលានយន្តហោះនៅឃុំចំនួន ២ នៃស្រុកកណ្តាលស្ទឹង ខេត្តកណ្តាល ត្រូវបានឲ្យដឹងថាត្រូវបានអ្នកមានគ្រាក់ៗទិញនិងកាន់កាប់តាំងពីឆ្នាំ ២០១៨ មកម្លេះ ដូច្នេះការដោះស្រាយយ៉ាងណានៅមិនទាន់ច្បាស់ការនៅឡើយទេ ៕
ចែករំលែកព័តមាននេះ