រាជធានីភ្នំពេញ ៖ ខណៈការដាំដុះម្រេចនៅក្នុងប្រទេសកម្ពុជានៅតែប្រើលក្ខណៈបែបលក្ខៈប្រពៃណីនិងបុរាណនៅឡើយនេះ ក្រុមហ៊ុនបញ្ជាទិញម្រេចដ៏ធំមួយនៅកម្ពុជា បានបង្ហាញពីបច្ចេកទេសថ្មីសម្រាប់កសិករ ក្នុងការដាំដុះដំណាំម្រេច ហើយនឹងប្រមូលទិញពីកសិករវិញ សម្រាប់នាំចេញទៅកាន់ទីផ្សារអន្តរជាតិ ។
បើតាម កញ្ញា សឹង សុផា ប្រធានគ្រប់គ្រងទូទៅនៃក្រុមហ៊ុនបញ្ជាទិញម្រេចពីកសិករ Sela pepper បានអោយដឹងថា បច្ចេកទេសថ្មីដែលក្រុមហ៊ុនបានបង្ហាញសម្រាប់អោយកសិករ ធ្វើនោះមានឈ្មោះថា Science and Technology ហើយបច្ចេកទេសថ្មីនេះ នឹងត្រូវបានអោយប្រជាពលរដ្ឋដែលជាអ្នកដាំម្រេច ក្រៅពីម្រេចកំពត អាចមកសួររក និងស្នើសុំពីក្រុមហ៊ុនដើម្បីយកទៅអនុវត្តន៍ផ្ទាល់ខ្លួន ដើម្បីទទួលបានផលច្រើនជាងមុន សម្រាប់ផ្គត់ផ្គង់មកក្រុមហ៊ុនក្នុងការនាំចេញទៅកាន់ទីផ្សារអន្តរជាតិ ។
កញ្ញា សឹង សុផា បានបន្តថា « ក្រុមហ៊ុនបញ្ជាទិញម្រេចរបស់យើង មើលឃើញថា ដោយសារតែពលរដ្ឋដាំម្រេចភាគច្រើននៅតែប្រើប្រាស់វិធីបុរាណក្នុងការដាំដុះ និងពឹងលើអាកាសធាតុទាំងស្រុង ដូច្នេះយើងក៏បង្កើតនូវគម្រោងដាំដុះម្រេចតាមបច្ចេកទេសថ្មី សម្រាប់ផ្ដល់ជូនកសិករ ដែលជាដៃគូររបស់ពួកយើង ក្នុងការអនុវត្តន៍វិធីសាស្ត្រថ្មី » ។
កញ្ញាបន្តថា គម្រោងថ្មីរបស់ក្រុមហ៊ុនបញ្ជាទិញនេះ ក៏ជាគម្រោងដែលទទួលស្គាល់ពីក្រុមហ៊ុនអ្នកបញ្ជាទិញនៅក្រៅប្រទេសផងដែរ ដែលវាធានាបាននូវទីផ្សារសម្រាប់កសិករដាំដុះម្រេច ។ ហើយយើងនឹងបញ្ជូនផលិតផលម្រេចរបស់យើងទៅកាន់ទីផ្សារអន្តរជាតិ ក្នុងការពិនិត្យ គុណភាព ថាតើគេទទួលបានដែរឬទេ នៅពេលនោះយើងនឹងបង្កើនការទិញបន្ថែមពីកសិករ ហើយកសិករក៏នឹងទទួលបានផលប្រយោជន៍ច្រើនពីគម្រោងនេះដែរ ។
កញ្ញាបន្ថែមថា ក្រុមហ៊ុនសិលាភេបភើ ពិតជាត្រូវការកសិករខ្លាំងណាស់ ក្នុងការសហការ ដើម្បីផលិត ផលិតផលម្រេចសម្រាប់នាំចេញទៅកាន់ទីផ្សារអន្តរជាតិ ។ ហើយម្រេចដែលក្រុមហ៊ុននឹងនាំចេញទៅនោះ ជាម្រេចដែលមិនមែនជាម្រេចខេត្តកំពត ពីព្រោះម្រេចខេត្តកំពត មានអ្នកជួយគាំទ្រ និងសហការរួចហើយ ដូច្នេះយើងក៏ងាកមករកផលិតផលម្រេចដែលមិនទាន់មានអ្នកជួយគាំទ្រសហការ ។
ប្រភពដដែលបាននិយាយទៀតថា « បច្ចុប្បន្ននេះ យើងក៏មានរោងចក្រ សម្រាប់ចាប់យកកំទេចកំទី និងសម្លាប់មេរោគដោយប្រើចំហាយទឹក និងកំដៅ ព្រមទាំងមន្ទីរពិសោធន៍ដើម្បីធ្វើតេស្ត សារធាតុគីមី និងពពួកបាក់តេរី ។ ក្នុងការផលិត រោងចក្រយើងមានសមត្ថភាពអាចផលិតបាន ផលិតផលសម្រេច ១,៥តោនក្នុងមួយម៉ោង ធានានូវគុណភាព សុវត្ថិភាពដែលឆ្លើយតបទៅនឹងតម្រូវការទីផ្សារបច្ចុប្បន្ន » ។
កញ្ញាបញ្ជាក់ថា សព្វថ្ងៃសិលាភេបភើ បាននាំចេញផលិតផលម្រេចទៅកាន់ទីផ្សារក្រៅប្រទេសជាច្រើន នៅលើពិភពលោក ដែលមានតម្រូវការម្រេច ជាក់ស្ដែងកាលពីឆ្នាំមុននេះ សិលាភេបភើបាននាំចេញទៅកាន់ទីផ្សារនូវផលិតផលម្រេចប្រមាណជាង១០០តោន ហើយក៏គ្រោងនឹងបន្ថែមបរិមាណជាបន្តបន្ទាប់ ទៅតាមអ្វីដែលបានប្រមូលទិញពីកសិករ ។ នៅឆ្នាំថ្មីៗនេះ ក្រុមហ៊ុនក៏នឹងព្យាយាមស្វែងរកទីផ្សារថ្មីៗបន្ថែមទៀត នៅតំបន់អាស៊ី និង អឺរ៉ុប ។
បើតាមកញ្ញា ផលិតផលម្រេចកម្ពុជា ត្រូវបានទទួលស្គាល់នៅតាមបណ្ដាប្រទេសជាច្រើន ក្នុងនោះប្រទេសជិតខាងដែលជាអ្នកដាំម្រេចផងដែរនោះ ក៏ទទួលស្គាល់ពីគុណភាពម្រេចរបស់កម្ពុជាផងដែរ ដែលជាហេតុធ្វើអោយតម្រូវការម្រេចកម្ពុជានៅលើពិភពលោកបានកើនឡើងជាបន្តបន្ទាប់ ក៏ប៉ុន្តែដោយសារតែកសិករ មិនទាន់យល់ដឹងពីការផលិតម្រេចអោយបានច្បាស់លាស់ និងមិនទាន់ដឹងពីបច្ចេកវិទ្យាដាំដុះនោះ ទើបធ្វើអោយគុណភាពម្រេចមានបញ្ហា ដោយសារតែការប្រើប្រាស់ថ្នាំគីមី សម្រាប់ព្យាបាលលើជំងឺដែលវាយលុយដាំណាំ ម្រេច ។ ហេតុផលនេះដែលធ្វើអោយខូចឈ្មោះម្រេចកម្ពុជា ប៉ុន្តែបើសិនជាកសិករមានក្បួនខ្នាតត្រឹមត្រូវ នោះទីផ្សារម្រេចរបស់កម្ពុជា នឹងកាន់តែកើនឡើងថែមទៀត ។
គួរបញ្ជាក់ថា ដំណាំម្រេចត្រូវបានគេដាំដុះនៅតាមតំបន់ខ្ពស់រាបនៃប្រទេសកម្ពុជា ក្នុងនោះដូចជាខេត្តត្បូងឃ្មុំ កំពង់ចាម រតនគីរី មណ្ឌលគីរី ពោធិ៍សាត់ ខេត្តកំពតជាដើម ប៉ុន្តែក្នុងចំណោមដំណាំម្រេចដែលនៅលើទឹកដីកម្ពុជា មានតែខេត្តកំពតមួយប៉ុណ្ណោះ ដែលទទួលបានស្គាល់ថាជាម្រេចមានគុណភាពខ្ពស់ជាងគេ និងត្រូវបានចុះជាផលិតផលសម្គាល់ភូមិសាស្ត្រ GI ផងដែរ ដែលធ្វើអោយម្រេចដាំដុះក្នុងខេត្តនេះទទួលបានតម្លៃខ្ពស់ជាងគេ ៕
ចែករំលែកព័តមាននេះ