ខេត្តព្រៃវែង ៖ តាមសេចក្តីរាយការណ៍បឋមបានឲ្យដឹងថា តូបលក់ស្បែកជើង និងតូបលក់គ្រឿងទេសរបស់ក្រុមអាជីវករក្នុងផ្សារក្រុងព្រៃវែងចំនួន៤តូបត្រូវភ្លើងឆេះអស់ទាំងស្រុង សមត្ថកិច្ចនៅរកមូលហេតុមិនទាន់ឃើញ ។ ហេតុការណ៍នេះបានកើតឡើងកាលពីវេលាម៉ោង៦និង១២នាទីល្ងាចថ្ងៃទី១៧ មីនានេះ នៅចំកណ្តាលផ្សារក្រុងព្រៃវែង ដែលស្ថិតក្នុងក្រុងព្រៃវែង ខេត្តព្រៃវែង ។
សេចក្តីរាយការណ៍បានបន្ត សមត្ថកិច្ចបានអោយដឹងថា តូបលក់ដូរដែលត្រូវភ្លើងឆេះមានចំនួន៤តូបក្នុងនោះតូបលក់ស្បែកជើងចំនួន២តូប និងតូបលក់គ្រឿងទេសចំនួន២តូប ។ ប្រភពដដែលនេះបានបញ្ជាក់ថា ចំពោះមូលហេតុនៃការឆាបឆេះនេះនៅមិនទាន់មានមូលដ្ឋានណាមួយអាចបញ្ជាក់អោយបានច្បាស់នៅឡើយទេ ព្រោះនៅពេលដែលដឹងថា មានភ្លើងឆេះនោះគឺភ្លើងបានឆេះពេញបន្ទុក និងឆេះអស់៤តូបទៅហើយ ។
ទោះជាយ៉ាងណា ក្រោយពីដឹងថា មានភ្លើងឆេះភ្លាមក្រុមអាជីវករក៏បានរាយការណ៍ប្រាប់សមត្ថកិច្ចភ្លាម ហើយឡានទឹកក៏បានទៅដល់ និងបាញ់ទឹកអស់ចំនួន៦ឡានប្រើរយៈពេលប្រមាណជាកន្លះម៉ោងភ្លើងក៏បានរលត់ជាស្ថាពរ ដោយមិនបន្តឆ្លងរាលដាលទៅតូបដទៃទៀតនោះទេ ។
បញ្ជាក់៖ គិតមកដល់ត្រឹមម៉ោង១០ ជាងព្រឹកនេះលោកអធិការក្រុងព្រៃវែង បញ្ជាក់ថា ការខូចខាត គិតទឹកប្រាក់ប្រមាណជាង ៣ម៉ឺនដុល្លារ ។
ចែករំលែកព័តមាននេះ