រាជធានីភ្នំពេញ ៖ អតីតមន្ត្រីគណបក្សសង្គ្រោះជាតិចំនួន២៦នាក់នឹងសុំនីតិសម្បទាធ្វើនយោបាយឡើងវិញនៅពេលខាងមុខនេះ ។ នេះបើតាមការឲ្យដឹងពីអ្នកនាំពាក្យក្រសួងមហាផ្ទៃ ។ លោក ខៀវ សុភ័ក អ្នកនាំពាក្យក្រសួងមហាផ្ទៃបានឲ្យកោះសន្តិភាពដឹងនៅថ្ងៃទី១៧ ខែមីនា ឆ្នាំ២០១៩ថា នឹងមានអតីតមន្ត្រីគណបក្សសង្គ្រោះជាតិដែលត្រូវតុលាការកំពូលហាមឃាត់ធ្វើនយោបាយចំនួន២៦នាក់ និងសុំសិទ្ធិនយោបាយឡើងវិញ ។
ការឲ្យដឹងរបស់អ្នកនាំពាក្យក្រសួងមហាផ្ទៃនេះ បន្ទាប់លោក រៀល ខេមរិន្ទ្រ អតីតអ្នកតំណាងរាស្ត្រគណបក្សសង្គ្រោះជាតិបានស្នើសុំក្រសួងមហាផ្ទៃ ដើម្បីទទួលបាននីតិសម្បទានយោបាយឡើងវិញ ។ លោកខៀវ សុភ័កបានបញ្ជាក់ថា«ពិតហើយលោករៀល ខេមរិន្ទ្រ សុំសិទ្ធិធ្វើនយោបាយឡើងវិញ ហើយសម្តេចក្រឡាហោម ស ខេង បានយល់ព្រម ។ គាត់បានសុំកាលពីថ្ងៃទី១៤ ខែមីនា កន្លងមក ។ ឥឡូវសម្តេចឯកភាពហើយ ប៉ុន្តែនៅរង់ចាំព្រះរាជក្រឹត្យមួយទៀតទើបទទួលបានសិទ្ធិជាស្ថាពរព្រោះថា ជាគោលការណ៍រាជរដ្ឋាភិបាលឯកភាពហើយ» ។
ជាមួយគ្នានោះដែរអ្នកនាំពាក្យក្រសួងមហាផ្ទៃក៏បានដឹងថា តាមដំណឹងនឹងមានអតីតគណបក្សសង្គ្រោះជាតិប្រមាណ២៦រូបនឹងសុំនីតិសម្បទាធ្វើនយោបាយឡើងវិញ ។ សម្តេចបានបញ្ជាក់យ៉ាងដូច្នេះថា «តាមយើងដឹងមកនឹងមានអ្នកសុំចុះចូលដោយទ្រង់ទ្រាយធំប្រមាណ ជាង២៦រូប ជាកញ្ចប់ ប៉ុន្តែយើងក៏បានសុំទៅគាត់វិញ ថា ត្រូវសុំជាលាយល័ក្ខអក្សរដោយធ្វើជាម្នាក់មួយៗ» ។ លោកក៏បានឲ្យដឹងថា បើតាមសេចសក្តីជូនសំណឹងរបស់ក្រសួងមហាផ្ទៃអតីតមន្ត្រីគណបក្សប្រឆាំងមិនអាចសុំសិទ្ធិនយោបាយវិញជាកញ្ចប់នោះទេ ។
លោកបានក៏បានឲ្យដឹងថា ការសុំសិទ្ធិធ្វើនយោបាយនេះ គឺជាផលចំណេញរបស់អតីតបក្សប្រឆាំងខណៈដែលទ្វារចំហរក្នុងការផ្តល់សិទ្ធិនយោបាយមានរយៈពេលកំណត់ព្រោះថា សម្តេចតេជោហ៊ុនសែន បានប្រកាសថា អាចនឹងបិទការផ្តល់នីតិសម្បទាធ្វើនយោបាយដល់អតីតបក្សប្រឆាំងនៅមុន ឬក្រោយចូលឆ្នាំខ្មែរ ។ លោកបញ្ជាក់ថា «គាត់ចូលមកជាផលប្រយោជន៍របស់គាត់ទេ ហើយបើគាត់មិនចូលយើងមិនអាចចាំបានទេ ហើយនឹងហួសពេល រហូតដល់ឆ្នាំ២០២២ ទើបគាត់មានសិទ្ធិនយោបាយ ។
បើគាត់មិនពេលនោះនឹងដល់ថ្ងៃបោះឆ្នោតបាត់ហើយ» ។
ចំណែកលោក សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងថា ការធ្វើលិខិតសុំនីតិសម្បទាធ្វើនយោបាយឡើងវិញរបស់អ្នកនយោបាយនៃអតីតបក្សប្រឆាំងដែលត្រូវព្យួរសិទ្ធិធ្វើនយោបាយដោយតុលាការកំពូល គឺជាសិទ្ធិសម្រេចដោយឯករាជ្យរបស់សាម៉ីជនម្នាក់ៗស្របទៅតាមច្បាប់វិសោធនកម្មច្បាប់ស្តីពីគណបក្សនយោបាយ និងជាសិទ្ធិនយោបាយនិងសិទ្ធិពលរដ្ឋដែលមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា ។ លោកបានបន្តថានៅក្រោយពេលដែលមានអ្នកនយោបាយបានធ្វើលិខិតស្នើសុំនីតិសម្បទាធ្វើនយោបាយឡើងវិញនោះស្រាប់តែមានមតិវិភាគមួយចំនួនរិះគន់ផង និងសរសើរផង ។
តែទោះជាយ៉ាងណាការមានមតិរិះគន់លើសាម៉ីជន គឺជាការរំលោភសិទ្ធិស្វ័យសម្រេចរបស់ សាម៉ីជនដែលមានសិទ្ធិពេញលេញក្នុងការសម្រេចចិត្តដោយឯករាជ្យរបស់ខ្លួនគ្មានជនណា មានសិទ្ធិមករារាំងជាដាច់ខាត ។ លោកបញ្ជាក់ថា« យ៉ាងណាក៏ដោយក៏អ្នកដែលបានស្នើសុំសិទ្ធិធ្វើនយោបាយឡើងវិញប្រាកដជានឹងទទួលបានសិទ្ធិធ្វើនយោបាយឡើងវិញ ស្របតាមបំណងរបស់ខ្លួន ។ ឯអ្នកដែលមិនធ្វើលិខិតក៏ជាសិទ្ធិរបស់ខ្លួនដែរ តែបើមិនធ្វើលិខិតនៅតែអត់សិទ្ធិធ្វើនយោបាយដដែល ហើយនៅពេលខាងមុខនឹងបាត់អាជីពនយោបាយរបស់ខ្លួន ។ នេះគឺជាលទ្ធផលនៃការសម្រេចចិត្តរបស់ម្នាក់ៗប៉ុណ្ណោះ» ។
សូមជម្រាបថាអតីតមន្ត្រីជាន់ខ្ពស់នៃអតីតគណបក្សសង្គ្រោះជាតិចំនួន៣រូបហើយ ត្រូវបានព្រះមហាក្សត្រចេញព្រះរាជក្រឹត្យត្រាស់បង្គាប់ផ្ដល់នីតិសម្បទាឡើងវិញ ពោល គឺមានសិទ្ធិធ្វើនយោបាយឡើងវិញ ក្នុងនោះរួមមាន លោកគង់គាំ អតីតទីប្រឹក្សា ជាន់ខ្ពស់នៃអតីតគណបក្សសង្គ្រោះជាតិ ។ លោកគង់ បូរ៉ា អតីតអ្នកតំណាងរាស្ត្រ និងលោកស៊ីម សុវណ្ណនី សមាជិកគណៈកម្មាធិការនាយកនៃអតីតគណបក្សសង្គ្រោះជាតិ ៕
ចែករំលែកព័តមាននេះ