ខេត្តកំពង់ចាម ៖ ប្រដឹសឫស្សីកោះប៉ែនដែលបង្កើតឡើងដោយដៃ ប្រវែងជាង៨០០ម៉ែត្រ តភ្ជាប់ពីត្រើយក្រុងកំពង់ចាមទៅឆ្នេរខ្សាច់កោះប៉ែន ជាតំបន់ទេសចរណ៍បែបធម្មជាតិក្នុងចំណោមជាច្រើនកន្លែង ។ ប្រដឹសនេះបារម្ភទឹកទន្លេមេគង្គហក់ឡើងខុសប្រក្រតីធ្វើឲ្យអន្តរាយ ។ លោកហេង…
ខេត្តកំពង់ចាម ៖ ប្រដឹសឫស្សីកោះប៉ែនដែលបង្កើតឡើងដោយដៃ ប្រវែងជាង៨០០ម៉ែត្រ តភ្ជាប់ពីត្រើយក្រុងកំពង់ចាមទៅឆ្នេរខ្សាច់កោះប៉ែន ជាតំបន់ទេសចរណ៍បែបធម្មជាតិក្នុងចំណោមជាច្រើនកន្លែង ។ ប្រដឹសនេះបារម្ភទឹកទន្លេមេគង្គហក់ឡើងខុសប្រក្រតីធ្វើឲ្យអន្តរាយ ។
លោកហេង ណារ៉ូ វ័យ៤១ឆ្នាំ ឲ្យដឹងកាលពីពេល ថ្មីៗកន្លងមកថា ប្រដឹសកោះប៉ែនធ្វើឡើងនៅក្នុងរដូវទឹកទន្លេស្រក កាលពីមុនមានលក្ខណៈធំទូលាយសម្រាប់ឲ្យមនុស្សដើរ កង់ម៉ូតូ និងរថយន្តធុនតូចអាចបើកឆ្លងកាត់ទៅវិញទៅមកបាន ក្នុងគ្រាដែលមិនទាន់មានស្ពានបេតុងកោះប៉ែន ។ ប្រដឹសឫស្សីបច្ចុប្បន្ននេះធ្វើឡើងសម្រាប់តែមនុស្សដើរលេងនៅឆ្នេរខ្សាច់កោះប៉ែនប៉ុណ្ណោះ ។
ក្នុងអំឡុងថ្ងៃទី៣ និង៤មីនា ២០១៩ ទឹកទន្លេហក់ឡើងច្រើន ដូច្នេះហើយធ្វើឲ្យមានការបារម្ភ ក៏ជួសជុលនៅត្រង់ផ្នែកកណ្តាលដោយយកបាវខ្សាច់ដាក់សង្កត់តាមជើងប្រដឹសឲ្យធ្ងន់ ការពារកុំឲ្យសណ្តកហើបឡើងងាយនឹងរបូត ហើយអណ្តែតតាមខ្សែទឹកហូរទៅក្រោម ។ នាថ្ងៃបន្ទាប់មកទៀតលោកហេង ណារ៉ូ និងមនុស្សចំនួន២នាក់ទៀតបានបន្តដើររឹតចងខ្សែលួសតាមបង្គោលណា ដែលមើលទៅរលុង ឬធូរនោះនឹងត្រូវរើបុកឲ្យណែនចូល ។ ក្នុងករណីបើទឹកទន្លេបន្តហក់ឡើងត្រឹមកន្លះម៉ែត្របន្ថែមទៀត ប្រដឹសត្រង់ផ្នែកកណ្តាលនឹងត្រូវដាច់របូតហូរតាមទឹក ដូចកាលពីលើកមុនមិនខាន ។ លោកប៊ុន ដារ៉ា ម្ចាស់រមណីយដ្ឋានឆ្នេរខ្សាច់កោះប៉ែនព្យាយាមទាក់ទាញភ្ញៀវជាតិ និងអន្តរជាតិច្រើនទៅលេងកំសាន្តនៅឆ្នេរខ្សាច់កោះប៉ែន ។
លោកអ៊ុំ វិបុល ប្រធានមន្ទីរធនធានទឹកនិងឧតុនិយមខេត្តវិញ ឲ្យដឹងថា ទឹកទន្លេមេគង្គក្នុងរដូវប្រាំងដែលបានឡើងបន្តបន្ទាប់នោះ ដោយសារតែនៅផ្នែកខាងលើនៃទន្លេមេគង្គត្រូវគេបើកទំបន់វារីអគ្គីសនីទើបណ្តាលឲ្យនៅផ្នែកខាងក្រោមឡើង តែមិនមានអ្វីដែលត្រូវរងផលប៉ះពាល់ទេ ។ ទឹកទន្លេមេគង្គចាប់ពីថ្ងៃទី១-៤មីនា ឡើង០,៤៤ម៉ែត្រ នៅព្រឹកថ្ងៃទី៥មីនា ទឹកស្រក០,០២ម៉ែត្រ ហើយបន្តស្រក បណ្តើរៗទៀត ៕ យ៉ាន់ ចាន់ថេត
ចែករំលែកព័តមាននេះ