រាជធានីភ្នំពេញ ៖ បុរសម្នាក់ដែលចេញពីផឹកស៊ីស្រវឹងសុំមិត្តភក្តិថា ចេញមុនព្រោះមានធុរៈ តែបែរជាលួចទៅទាក់ទងស្ត្រីបម្រើផ្លូវភេទ ដែលឈរទាក់ម៉ូយនៅវត្តភ្នំ យកទៅឡើងឋានសួគ៌ម៉ាសប្បាយរួចរាល់ហើយត្រឡប់ទៅវិញ ត្រូវបានស្ត្រីរកស៊ីផ្លូវភេទនោះលួចយកកាបូបលុយអស់ជាង៣០០ដុល្លារ និងកាតគ្រីម៉ូតូមួយទៀត បង្កឲ្យមានការភ្ញាក់ផ្អើលកាលពីវេលាម៉ោង១០ និង៣០នាទីយប់ថ្ងៃទី១៣ មីនា តាមបណ្តោយផ្លូវ៥១ នៅចំណុចរង្វង់មូលវត្តភ្នំ ស្ថិតនៅក្នុងសង្កាត់វត្តភ្នំ ខណ្ឌដូនពេញ ។
ស្ត្រីរកស៊ីផ្លូវភេទដែលជាប់ចោទមាន ឈ្មោះស្រី លន អាយុជាង៣០ឆ្នាំ ស្នាក់នៅផ្ទះជួលគ្មានលេខ ម្តុំផ្សារសាំហាន់ សង្កាត់ទួលសង្កែទី១ ខណ្ឌឫស្សីកែវ ។ បើតាមប្រភពព័ត៌មានពីបុរសឈ្មោះ ម៉េង ឆាយ អាយុ២៨ទៅ២៩ឆ្នាំ បានឱ្យដឹងថា មុនពេលកើតហេតុ គាត់ជាមួយមិត្តភក្តិបានអង្គុយផឹកស៊ីនៅម្តុំក្បែរកន្លែងកើតហេតុ ។ លុះពេលស្រវឹងស្រា ក៏សុំមិត្តភក្តិចេញមកមុន តែមិនអោយមិត្តភក្តិដឹងថា ខ្លួនលួចទាក់ទងស្ត្រីរកស៊ីផ្លូវភេទនាំទៅឡើងឋានសួគ៌នោះទេ ។ លុះបើកប្រតិបត្តិការឡើងផ្ទះសំណាក់ទ្វារនាគនៃឋានព្រះច័ន្ទចប់រួចរាល់ហើយ ស្រាប់តែបាត់កាបូបលុយ នៅក្នុងកាបូបដែលមានលុយជាង៣០០ដុល្លារ និងកាតគ្រីម៉ូតូហុងដាឌ្រីម ។
ប្រភពដដែលបានចោទថា ស្ត្រីដែលគាត់នាំទៅកម្សាន្តនៅឋានលើមិញនេះ ជាអ្នកលួចក៏ទៅប្រាប់មិត្តភក្តិឱ្យជួយដើររក ។ លុះពេលមកដល់ចំណុចវត្តភ្នំវិញ ក៏ប្រទះឃើញស្ត្រីម្នាក់ កំពុងតែឈររេរាតឺនុយលេចលើលេចក្រោម ស្មានភ្លាមថា ជាបក្សពួកផ្សំគំនិតគ្នាជាមួយស្ត្រីម្នាក់នោះ ដោយស្រវឹងផង ខឹងពេកបានវាយ២ដៃចំមុខស្ត្រីរកស៊ីផ្លូវភេទម្នាក់នេះ បណ្តាលឱ្យរងរបួសប៉ោងមុខ ។ ភ្លាមៗនោះដែរ ក៏មានបក្សពួក២ ទៅ៣នាក់ទៀត មានស្រី មានប្រុស បានចេញមកព្រួតវាយទៅលើបុរសនេះវិញ ផ្អើលដល់សមត្ថកិច្ចនឹងអ្នកសារព័ត៌មានទៅដល់កន្លែងកើតហេតុព្រោងព្រាត គឺផ្អើលឈុលនៅវត្តភ្នំ ។
បើតាមសម្តីស្ត្រីរកស៊ីផ្លូវភេទ ដែលត្រូវប៉ុន្មានដៃមុននេះបាននិយាយថា ខ្លួនមិនបានលួចកាបូបដូចការចោទប្រកាន់នោះទេ ហើយក៏មិនបានទៅដេកជាមួយដែរ គឺគាត់យកស្រីផ្សេងទៅដេកជាមួយ ចំណែកខ្លួនមិនដែលស្គាល់និងមិនបានទៅដេកជាមួយទេ ។ ស្ត្រីជាំមុខត្រូវប៉ុន្មានដៃរូបនេះចោទតបវិញថា ខ្លួនឯងបែកថ្នាំបែរជាមករករឿងច្រឡំមនុស្ស ហើយវាយទៅលើរូបនាងទៅវិញ ។ ក្រោយពេលកើតហេតុ បុរសរងគ្រោះនឹកឃើញថា កាបូបលុយគាត់បានបាត់ទៅហើយ ឯការដាក់ពាក្យបណ្តឹង ក៏មិនបានការអីនោះដែរ ក៏ជិះម៉ូតូត្រឡប់ទៅផ្ទះវិញទាំងទោមនស្សក្រៃលែង គឺបើនៅត្រេងត្រាងទៀតច្បាស់ ជាវណ្ឌ.កវិញមិនខាន ព្រោះវ៉ៃគេច្រឡំ ។
ចែករំលែកព័តមាននេះ