ខេត្តស្វាយរៀង ៖ ក្មេងស្រីម្នាក់អាយុ៧ឆ្នាំ ត្រូវសត្វកណ្តុរខាំដាច់មេដៃខាងឆ្វេង របួសធ្ងន់ព្រួយបារម្ភខ្លាចស្លាប់ដូចសត្វឆ្មាខាំបានអំពាវនាវរកសប្បុរសជនផ្តល់ក្តីមេត្តាជួយជាសោហ៊ុយ ដើម្បីទៅរាជធានីភ្នំពេញបានចាក់វ៉ាក់សាំងការពារជម្ងឺឆ្កួត ។ ការអំពាវនាវនេះធ្វើឡើង កាលពីរសៀលថ្ងៃទី១៤ មីនា ២០១៩ នៅភូមិសួនថ្មី សង្កាត់ព្រៃឆ្លាក់ ក្រុងស្វាយរៀង ។
កុមារីរងគ្រោះរស់នៅជាមួយម្តាយជាស្ត្រីមេម៉ាយមានកូន៣នាក់ ហើយមានជីវភាពទីទាល់ក្រគ្មានលទ្ធភាពនាំកូនទៅចាក់វ៉ាក់សាំង នៅរាជធានីភ្នំពេញបានដង្ហើយរកសប្បុរសជនឱ្យជួយខណៈកូនស្រីពៅបានរងរបួសមេដៃឆ្វេង ដោយសារតែសត្វកណ្តុរខាំ ហើយកំពុងមានជម្ងឺក្តៅខ្លួនខកខានមិនបានទៅរៀនអស់រយៈពេលមួយសប្តាហ៍មកហើយ ។
បើតាមស្ត្រីជាម្តាយក្មេងស្រីរងគ្រោះឈ្មោះ មាស ផល្លា អាយុ៤២ឆ្នាំ សព្វថ្ងៃមានទីលំនៅភូមិសួនថ្មី សង្កាត់ព្រៃឆ្លាក់បានឱ្យដឹងថា កូនស្រីរបស់គាត់ដែលត្រូវសត្វកណ្តុរខាំរងរបួសនោះ ឈ្មោះ សៅ ស៊ីណាត មានអាយុ៧ឆ្នាំ សព្វថ្ងៃរៀននៅថ្នាក់ទី១ នៃសាលាបឋមសិក្សា២ធ្នូ ។
ប្រភពខាងលើបានឱ្យដឹងទៀតថា កាលពីយប់ថ្ងៃទី១០ ខែមីនា ឆ្នាំ២០១៩នេះ រូបគាត់ទាំង៤នាក់ម្តាយនឹងកូនបានគេងក្នុងមុងជាមួយគ្នា តែចៃដន្យកូនស្រីរងគ្រោះបានដាក់ដៃចេញក្រៅមុង ហើយក៏ត្រូវសត្វកណ្តុរខាំចំមេដៃខាងឆ្វេងតែម្តង បណ្តាលឱ្យរងរបួសហើយក្រោយពីត្រូវសត្វកណ្តុរខាំបានមួយយប់កូនរបស់គាត់ក៏កើតមានអាការៈក្តៅខ្លួន រួចរូបគាត់ក៏បាននាំកូនទៅព្យាបាលមុខរបួសនៅមន្ទីរពេទ្យខេត្ត បានរយៈពេល៣ថ្ងៃក៏សុំគ្រូពេទ្យត្រឡប់មកផ្ទះវិញ ដោយសារពេទ្យពុំមានថ្នាំសម្រាប់ព្យាបាលប្រភេទសត្វខាំខាងលើនោះទេ ម្យ៉ាងសង្ស័យថាក្រែងសត្វឆ្មាខាំគួរទៅរាជធានីភ្នំពេញចាក់វ៉ាក់សាំងការពារជម្ងឺឆ្មាឆ្កួត ។
ស្ត្រីដដែលបានបន្តថា នៅពេលដែលកូនគាត់សម្រាកនៅមន្ទីរពេទ្យខេត្តស្វាយរៀងនោះគ្រូពេទ្យបានឱ្យរូបគាត់នាំកូនទៅភ្នំពេញ ដើម្បីព្យាលបាលទៅពីព្រោះនៅមន្ទីរពេទ្យខេត្តគ្មានថ្នាំវ៉ាក់សាំងសម្រាប់ចាក់ឱ្យទេ ។ ដោយសាររូបគាត់គ្មានមុខរបរអ្វីក្រៅពីដើរស៊ីឈ្នួលលាងចានឆ្នាំងឱ្យគេ ហើយកូនតូចៗនៅក្នុងបន្ទុករហូតដល់ទៅ៣នាក់ផង ជីវភាពទីទាល់ក្ររកតែអង្ករច្រកឆ្នាំងស្ទើរមិនបានផង គាត់ក៏សម្រេចចិត្តយកកូនមកផ្ទះដេកមើលតាមយថាកម្មតែម្តងទៅ ។
បច្ចុប្បន្នរូបគាត់មានតែលើកម្រាមដៃ១០ប្រណមសុំដល់សប្បុរសជនដែលមានចិត្តធម៌ផ្តល់ក្តីមេត្តាជួយជាថវិកាធ្វើសោហ៊ុយ និងថ្លៃចាក់វ៉ាក់សាំងឲ្យកូនស្រីពៅរបស់គាត់ផុតពីគ្រោះកាចនេះផង ។ពាក់ព័ន្ធទៅនឹងករណីខាងលើនេះលោកគ្រូពេទ្យនៅមន្ទីរពេទ្យខេត្តស្វាយរៀងបានឱ្យដឹងថា ក្មេងស្រីរងគ្រោះខាងលើពិតជាបានចូលមកសម្រាកព្យាបាលមុខរបួសនៅមន្ទីរពេទ្យខេត្តស្វាយរៀង កាលពីថ្ងៃទី១១ ខែមីនា ឆ្នាំ២០១៩ ប្រាកដមែន ហើយក៏បានសុំចេញទៅវិញផងដែរ ក្រោយពេលដែលគ្រូពេទ្យបានលាងមុខរបួស និងចាក់ថ្នាំផ្សះ រួមនិងថ្នាំបញ្ចុះកំដៅរួច ។
ប្រភពដដែលបានបន្តថា នៅមន្ទីរពេទ្យខេត្តមិនមានវ៉ាក់សាំងសម្រាប់ចាក់ការពារសត្វកណ្តុរ ឬសត្វឆ្មាខាំនោះទេ មានតែនៅភ្នំពេញទើបមានដូច្នេះត្រូវយកជនរងគ្រោះទៅព្យាបាលនៅភ្នំពេញទើបបាន ៕
ចែករំលែកព័តមាននេះ