រាជធានីភ្នំពេញ ៖ ក្នុងពេលដែលវិស័យទូទាត់នានានៅកម្ពុជាកំពុងពង្រីកខ្លួនជាបណ្ដើរៗទៅតាមការរីកចម្រើននៃបច្ចេកវិទ្យា បានជួយពន្លឿនការងារកាន់តែងាយស្រួលដល់ប្រជាពលរដ្ឋនិងធុរជន ក៏ប៉ុន្តែបើក្រឡេកទៅមើលទិដ្ឋភាពទូទៅវិញ ការទូទាត់បែបនេះនៅមិនទាន់មានភាពទូលំទូលាយនៅឡើយទេ ជាពិសេសការទូទាត់ទៅកាន់ស្ថាប័នរដ្ឋក្នុងវិស័យដឹកជញ្ជូន ។
យោងតាម លោក ស៊ិន ចន្ធី ប្រធានសមាគមទីភ្នាក់ងារបញ្ជូនទំនិញកម្ពុជា បានអោយដឹងថា បច្ចុប្បន្ននេះការទូទាត់ទំនិញចេញចូលនៅតែមានបញ្ហាប្រឈមនៅឡើយជាមួយច្រកចេញចូល ជាពិសេសនៅច្រកកំពង់ផែផ្ទាល់តែម្ដង ដោយសារតែទំនិញចេញចូលនោះគឺប្រទេសភាគច្រើនត្រូវដឹកតាមផ្លូវទឹក
( កប៉ាល់ ) ហើយការទូទាត់ទៀតសោតនៅមិនទាន់ប្រើប្រាស់តាមអនឡាញ ឬបច្ចេកវិទ្យាទំនើបនៅឡើយ មានន័យថាការទូទាត់នៅតែប្រើជាសាច់ប្រាក់ ដដែល ។
ប្រធានសមាគមទីភ្នាក់ងារបញ្ជូនទំនិញកម្ពុជា បានថ្លែងបញ្ជាក់យ៉ាងដូច្នេះថា « រាល់ការទូទាត់នានាពេលនេះ គឺនៅតែប្រើជាសាច់ប្រាក់យកទៅបង់នៅឡើយ ដោយមិនទាន់មានបំពាក់ម៉ាស៊ីនស្វ័យប្រវត្តិក្នុងការទូទាត់នោះទេ អញ្ចឹងហើយទើបបង្កអោយមានភាពយឺតយ៉ាវបន្តិចបន្តួច » ។ លោក ស៊ិន ចន្ធី បន្តថា ទោះជាយ៉ាងណាក៏ដោយ ក៏វាមានភាពប្រសើរជាមុនបន្តិច ក៏ប៉ុន្តែបើធៀបជាមួយនឹងបណ្ដាប្រទេសផ្សេងទៀត ឃើញថានៅតែក្រោមគេ ។ ដោយឡែកសម្រាប់ស្ថាប័នគយ បច្ចុប្បន្ននេះ បានសហការជាមួយធនាគារក្នុងស្រុកពីរ គឺអេស៊ីលីដា និងកាណាឌីយ៉ា ដើម្បីអោយអ្នកដឹកជញ្ជូនអាចទូទាត់តាមរយៈធនាគារជាដៃគូរទាំងពីរ ក៏ប៉ុន្តែនៅតែមិនទាន់ទូលំទូលាយសម្រាប់អ្នកដឹកជញ្ជូននៅឡើយ ។
ប្រភពដដែលមាន បានបន្ថែមទៀតថា នៅថ្ងៃទី២៩មីនា ខាងមុខនេះ វិស័យឯកជនដែលមានវិស័យដឹកជញ្ជូនដែរនោះ នឹងជួបជាមួយប្រមុខរាជរដ្ឋាភិបាល ដើម្បីពិភាក្សានិងជម្រាបពីបញ្ហាទៅកាន់រដ្ឋាភិបាលជួយដោះស្រាយ ហើយពេលនោះ គឺជាឱកាសរបស់ពួកយើង ដើម្បីអោយលោកជួយដោះស្រាយ ។
លោក ស៊ិន ចន្ធី បន្តថា៖« យើងបានជួបពិភាក្សារួចហើយ ក្នុងការរៀបចំឯកសារ និងបញ្ហាមួយចំនួនត្រៀមជួបជាមួយប្រមុខរាជរដ្ឋាភិបាល ហើយសង្ឃឹមថាប្រមុខរាជរដ្ឋាភិបាលវះកាត់នូវបញ្ហាណាដែលពិបាកចេញ ដើម្បីជំរុញដល់ភាពរីកចម្រើននៃវិស័យដឹកជញ្ជូនក្នុងប្រទេសដែលជាវិស័យដ៏សំខាន់មួយក្នុងចរន្តសេដ្ឋកិច្ច » ។ លោកបានឲ្យដឹងទៀតថា សម្រាប់បញ្ហាមួយចំនួនទៀតដែលពួកយើងចង់បាននោះ គឺការធ្វើយ៉ាងណាអោយតម្លៃដឹកជញ្ជូនធ្លាក់ចុះទាប ហើយបច្ចុប្បន្ននេះរដ្ឋាភិបាលក៏បានកាត់បន្ថយនូវការចំណាយមួយចំនួនដល់វិស័យដឹកជញ្ជូនផងដែរ ជាក់ស្ដែងរដ្ឋាភិបាលបានកាត់បន្ថយនូវស្ថាប័នកាំសាប និង កាំងកុងត្រូលជាដើម នៅតាមព្រំដែន ហើយការលុបបំបាត់ស្ថាប័នទាំងនេះ នឹងធ្វើការចំណាយរបស់ពួកយើងកាន់តែតិច និងប្រើពេលខ្លី ។
បើតាមលោក ពៅ ម៉ាលីរដ្ឋលេខាធិការក្រសួងសាធារណៈការ និងដឹកជញ្ជូន បានអោយដឹងផងដែរថា ពេលនេះ ក្រសួងកំពុងអនុវត្តន៍អោយមានការទូទាត់ប្រាក់មកក្រសួងតាមរយៈប្រព័ន្ធ QR Code ដើម្បីកាត់បន្ថយនូវពេលវេលា ក្នុងការធ្វើដំណើរមកកាន់ក្រសួងផ្ទាល់ ហើយជាពិសេសនោះ គឺកាត់បន្ថយការជួបផ្ទាល់រវាងមន្ត្រី និងអ្នកបង់សេវា ជៀសវាងការចំណាយក្រៅផ្លូវការនានា ។ នៅជំហ៊ានបន្ទាប់ក្រសួងនឹងត្រូវធ្វើកិច្ចការនេះ អោយបានទូលំទូលាយថែមទៀត ដើម្បីដើរអោយស្របទៅតាមផែនការសេដ្ឋកិច្ចឌីជីថលរបស់រាជរដ្ឋាភិបាលកម្ពុជា ។
គួរបញ្ជាក់ថា រហូតមកដល់ពេលនេះ ស្ថាប័នរដ្ឋមួយចំនួនបានបំពាក់នូវការទូទាត់តាមបច្ចេកវិទ្យាស្វ័យប្រវត្តិមួយចំនួន ដើម្បីពន្លឿនការងាររបស់ប្រជាពលរដ្ឋ ក្នុងពេលដែលធនាគារមួយចំនួន ក៏បានពង្រីកនូវបច្ចេកវិទ្យារបស់ខ្លួន អោយកាន់តែមានភាពងាយស្រួលដល់ពលរដ្ឋផងដែរ ។ ក្នុងនោះដែរ គេសង្កេតឃើញថា ការបំពាក់នូវសេវាទូទាត់ប្រាក់តាមបច្ចេកវិទ្យានេះដែរ ក៏ទទួលបានការគាំទ្រខ្លាំងពីមនុស្សសម័យនេះផងដែរ ជាពិសេសយុវវ័យ ដូចជាការទូទាត់តាមQR Code តាមវីសាកាត Master Card , និងកាតអេឡិចត្រូនិកមួយចំនួនទៀតផងដែរ ។ រដ្ឋាភិបាលកម្ពុជាក៏បានកំណត់ផងដែរពីការផ្លាស់ប្តូរប្រើសាច់ប្រាក់សុទ្ធ ងាកមកប្រើការទូទាត់តាមប្រព័ន្ធឌីជីថល ដើម្បីជំរុញដល់ដំណើរការសេដ្ឋកិច្ចឌីជីថល អោយកាន់តែមានភាពរីកលូតលាស់ ដូចបណ្ដាប្រទេសជឿនលឿនលើពិភពលោក ៕
ចែករំលែកព័តមាននេះ