រាជធានីភ្នំពេញ ៖ ថ្នាក់ដឹកនាំឧត្តមក្រុមប្រឹក្សាសេដ្ឋកិច្ចជាតិបានឲ្យដឹងថា បចេ្ចកវិទ្យាឌីជីថល ដើរតួនាទីសំខាន់ក្នុងរួមចំណែកដល់ការរីកលូតលាស់នៃសេដ្ឋកិច្ចជាតិ ព្រោះបច្ចេកវិទ្យាជាផ្នែកមួយនៃបដិវត្តន៍ឧស្សាហកម្មទី៤ និងកំពុងក្លាយជាកាតាលីករថ្មីសម្រាប់ជម្រុញការអភិវឌ្ឍសេដ្ឋកិច្ច តាមរយៈការចូលរួមបង្កើនផលិតភាព និងប្រសិទ្ធភាពការងារ ព្រមទាំងផ្តល់លទ្ធភាពឲ្យសហគ្រាសធុនតូច និងមធ្យមក្នុងស្រុក អាចភ្ជាប់ខ្លួនទៅនឹងខ្សែច្រវាក់ផលិតកម្មតំបន់និងសកល ក៏ដូចជាស្វែងរកភាពច្នៃប្រឌិតក្នុងផលិតកម្មទំនិញ និងសេវាកម្ម ។ សំខាន់ជាងនេះទៅទៀត បច្ចេកវិទ្យាឌីជីថល ផ្តល់លទ្ធភាពឲ្យបណ្តាប្រទេសដែលមានសេដ្ឋកិច្ចកំពុង រីកលូតលាស់អាចចាប់យកបចេ្ចកវិទ្យាថ្មី និងលោតផ្លោះពីឧស្សាហកម្មប្រពៃណីទៅជាឧស្សាហកម្មទំនើប ។
លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានឧត្តមក្រុមប្រឹក្សាសេដ្ឋកិច្ចជាតិ បានថ្លែងនៅក្នុងពិធីបើកសិក្ខាសាលាថ្នាក់ជាតិស្តីពី «គោលនយោបាយ និងទិសដៅនៃសេដ្ឋកិច្ចឌីជីថលកម្ពុជា» កាលពីថ្ងៃទី ១២ ខែមីនា ថាកម្ពុជាសម្រេចបានកំណើនសេដ្ឋកិច្ចខ្ពស់គួរឲ្យកត់សម្គាល់ ដែលជាមធ្យមគឺក្នុងរង្វង់ ៧,៧% ក្នុងមួយឆ្នាំ ហើយបានប្រែក្លាយខ្លួនពីប្រទេសដែលមានចំណូលកម្រិតទាប ទៅជាប្រទេសមានចំណូលមធ្យមកម្រិតទាបកាលពីឆ្នាំ២០១៥ ។ លោកបន្តថាកម្ពុជាមិនត្រឹមតែសម្រេចបានកំណើនសេដ្ឋកិច្ចខ្ពស់ប៉ុណ្ណោះទេ ប៉ុន្តែក៏បានសម្រេចផងដែរនូវការផ្លាស់ប្តូររចនាសម្ព័ន្ធសេដ្ឋកិច្ចគួរឲ្យកត់សម្គាល់ ពោលគឺពីប្រទេសមានសេដ្ឋកិច្ចពឹងផ្អែកយ៉ាងខ្លាំងលើវិស័យកសិកម្ម ទៅជាប្រទេសមានសេដ្ឋកិច្ចពឹងផ្អែកលើវិស័យឧស្សាហកម្មនិងសេវាកម្ម ។
លោកបានបន្តថា « ជាទិសដៅទៅមុខ ដើម្បីធានាបាននូវកំណើនសេដ្ឋកិច្ចខ្ពស់ប្រកបដោយបរិយាប័ន្ន ឈានឆ្ពោះទៅសម្រេចបាននូវចក្ខុវិស័យនៃការប្រែក្លាយកម្ពុជាឲ្យទៅជាប្រទេសមានចំណូលធម្យមកម្រិតខ្ពស់ក្នុងឆ្នាំ ២០៣០ និងជាប្រទេសមានចំណូលខ្ពស់ក្នុងឆ្នាំ ២០៥០ រាជរដ្ឋាភិបាលចាំបាច់ត្រូវបង្កើនកិច្ចខិតខំប្រឹងប្រែងខ្លាំងក្លាបន្ថែមទៀត ក្នុងការជំរុញធ្វើពិពិធកម្ម លើកកម្ពស់ភាពប្រកួតប្រជែងនៃសេដ្ឋកិច្ចជាតិ ក្នុងនោះការអភិវឌ្ឍសេដ្ឋកិច្ចឌីជីថល គឺជាមុខសញ្ញាដ៏សំខាន់ » ។ លោក អូន ព័ន្ធមុនីរ័ត្ន បានបន្ថែមថា ទោះបីជាប្រទេសកម្ពុជាកំពុងស្ថិតនៅក្នុងដំណាក់កាលកំពុងអភិវឌ្ឍក៏ដោយ តែកម្ពុជាជាប្រទសមួយដែលមានសក្តានុពលខ្ពស់ ក្នុងការក្តាប់យកនូវកាលានុវត្តភាពពីបដិវត្តន៍ឧស្សហកម្មទី ៤ និងសេដ្ឋកិច្ចឌីជីថល ដោយឈរលើកត្តា ៤ គឺ៖ ទី១ – ភាពអំណោយផលប្រជាសាស្ត្រ ដោយសារតែវត្តមាននៃចំនួនយុវជនដ៏ច្រើនដែលមានការអប់រំខ្ពស់ និងងាយទទួលយកនូវបច្ចេកវិទ្យាឌីជីថលយ៉ាងឆាប់រហ័ស, ទី ២- ការកើនឡើងយ៉ាងឆាប់រហ័សនៃការប្រើប្រាស់ទូរស័ព្ទដៃនិងឧបករណ៍ឆ្លាត (smart devices), ទី៣- ការរីកចម្រើនយ៉ាងឆាប់រហ័សនៃផ្នែកបច្ចេកវិទ្យា តាមរយៈលំហូរនៃកាវិនិយោគផ្ទាល់ពីបរទេស និងទី ៤- ឥទ្ធិពលដ៏លឿននៃឌីជីថលភាវូបនីយកម្មដែលកំពុងលេចរូបរាងជាបណ្តើរៗ ស្របពេលដែលមានការបង្កើតសកម្មភាពអាជីវកម្មថ្មីៗ ដូចជា ការប្រើប្រាស់ការទូទាត់ឌីជីថល ការកើនឡើងនូវសកម្មភាពកំសាន្តអនឡាញ សកម្មភាពពាណិជ្ជកម្មអេឡិចត្រូនិច ជាដើម។
ដោយសារតែការអភិវឌ្ឍសេដ្ឋកិច្ច ផ្សារភ្ជាប់នឹងការរីកចម្រើននៃបច្ចេកវិទ្យា សម្រាប់ការចូលរួមបង្កើនផលិតភាព និងប្រសិទ្ធភាពការងារ ក៏ដូចជាការភ្ជាប់ខ្លួនទៅនឹងខ្សែច្រវាក់ផលិតកម្មតំបន់និងសកល កម្ពុជាបានត្រៀមខ្លូនរួចជាស្រេចដើម្បីឆ្លើយតបនឹងការវិវត្តផ្នែកបច្ចេកវិទ្យា ដោយបង្កើតបរិយាកាសគាំទ្រ និងប្រព័ន្ធអេកូឡូស៊ី ដើម្បីបណ្តុះបណ្តាលបច្ចេកវិទ្យាឌីជីថល និងបន្តទ្រទ្រង់ការផ្លាស់ប្តូររចនាសម្ព័ន្ធសេដ្ឋកិចជាតិ ។ ថ្លែងចំពោះមុខភ្ញៀវជាតិ អន្តរជាតិដែលមានវត្តមាននៅក្នុងកម្មវិធី សិក្ខាសាលាពិគ្រោះយោបល់ថ្នាក់ជាតិស្តីពី «គោលនយោបាយ និងទិសដៅនៃសេដ្ឋកិច្ចឌីជីថលកម្ពុជា» នោះ លោក អូន ព័ន្ធមុនីរ័ត្ន បានបញ្ជាក់ថាកិច្ចពិភាគ្សានោះនឹងអាចជួយផ្តល់ចម្លើយទៅនឹងសំណួរគោលដៅមួយចំនួនដូចជា តើរាជរដ្ឋាភិបាលកម្ពុជាមានតួនាទីដូចម្តេចក្នុងការជ្រោមជ្រែង និងលើកកម្ពស់ការអភិវឌ្ឍសេដ្ឋកិច្ចឌីជីថលកម្ពុជាក្នុងរយៈពេលវែង ? តើវិសាលភាពនៃការអភិវឌ្ឍវិស័យឌីជីថល ត្រូវកំណត់ត្រឹមកម្រិតណា និងត្រូវចាប់ផ្តើមពីកិច្ចការណាមុនគេ ?
យ៉ាងណាមិញ លោក អូន ព័ន្ធមុនីរ័ត្ន បានគួសបញ្ជាក់យ៉ាងច្បាស់ថា «សេដ្ឋកិច្ចឌីជីថលកម្ពុជាកំពុងស្ថិតនៅដំណាក់កាលចាប់ផ្តើមលូតលាស់។ កម្ពុជាអាចនឹងត្រូវការរយៈពេល ៥ ឆ្នាំទៀត ដើម្បីបង្កើតនូវមូលដ្ឋានត្រឹមត្រូវគ្រប់ជ្រុងជ្រោយមួយ ឬដើម្បីត្រៀមខ្លួនរួចរាល់នូវផ្នែកឌីជីថល ហើយត្រូវការរយៈពេល ៥ ទៅ ១០ ឆ្នាំបន្ទាប់ ឬច្រើនជាងនេះ ដើម្បីបង្កើតសេដ្ឋកិច្ចឌីជីថលពេលលេញមួយ និងប្រែក្លាយសេដ្ឋកិច្ចកម្ពុជាឲ្យទៅជាសេដ្ឋកិច្ចដែលមានកំណើនដឹកមុខដោយបចេ្ចកវិទ្យាព័ត៌មាន» ។
លោក អូន ព័ន្ធមុនីរ័ត្ន មានប្រសាសន៍បន្ថែមថា «ក្នុងន័យនេះ ខ្ញុំចង់គូសបញ្ជាក់ថា កម្ពុជា មិនមានគោលដៅប្រែក្លាយខ្លួនទៅជា ស៊ីលីខន-វែលី (Silicon Valley) ឬ បង្កើតក្រុមហ៊ុន យូនីខន (Unicorn) សម្រាប់ជំរុញកំណើនសេដ្ឋកិច្ចជាតិនោះទេ។ ផ្ទុយទៅវិញ ទិសដៅយុទ្ធសាស្ត្ររបស់កម្ពុជា គឺបង្កើតនូវបរិយាកាសឌីជីថលមួយប្រកបដោយជវភាព និងមានមូលដ្ឋានគ្រឹះរឹងមាំ ដែលផ្តល់លទ្ធភាពឲ្យក្រុមហ៊ុន ទាំងតូច ទាំងធំ នៅក្នុងស្រុក អាចភ្ជាប់ខ្លួនទៅនឹងខ្សែច្រវាក់តម្លៃសាកលនៃសេដ្ឋកិច្ចឌីជីថល នៅក្នុងតំបន់ និងក្នុងពិភពលោក និងអាចឆ្លើយតបប្រកបដោយប្រសិទ្ធភាពទៅនឹងហានិភ័យផ្សេងៗ» ។
ក្នុងន័យនេះសេដ្ឋកិច្ច ក្រុមហ៊ុន យូនីខន (Unicorn) គឺសំដៅដល់ក្រុមហ៊ុនចាប់ផ្តើម ដំបូងដែលមានតម្លៃជាង 1 ពាន់លានដុល្លារ។ ភាគច្រើននៃផលិតផលដែល unicorns ធ្វើគឺជាកម្មវិធីកុំព្យូទ័រ (software) ខណៈដែលជនជាតិភាគតិចគួរតែធ្វើឱ្យផ្នែករឹង ។
យោងតាមសេចក្តីប្រកាសព័ត៌មាន របស់ឧត្តមក្រុមប្រឹក្សាសេដ្ឋកិច្ចជាតិ ដែលទទួលបាននាព្រឹកថ្ងៃទី១២ ខែ មីនា នេះបានឲ្យដឹងថា សិក្ខាសាលានេះរៀបចំឡើងដើម្បីប្រមូលធាតុចូល សម្រាប់រៀបចំឯកសារទស្សនទាន និងជាផែនទីបង្ហាញផ្លូវ សម្រាប់រៀបចំសេចក្តីព្រាងក្របខ័ណ្ឌគោលនយោបាយសេដ្ឋកិច្ចឌីជីថល។ សិក្ខាសាលានេះមានការចូលរួមធ្វើបទបង្ហាញនិងចែករំលែកទស្សនពីក្រុមហ៊ុនអន្តរជាតិធំៗ ដូចជា Microsoft, Alibaba, Ali Pay, ក្រុមហ៊ុន Facebook ជាដើម។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ