រាជធានីភ្នំពេញ ៖ ភោជនីយដ្ឋាន Collin ដែលជាភោជនីយដ្ឋានបែបអឺរ៉ុបបង្កើតឡើងនៅប្រទេសសិង្ហបុរី បានបើកដំណើរការជាផ្លូវការ នៅលើអគារ The Bridge កំពស់១៣ជាន់កណ្ដាលរាជធានីភ្នំពេញ ។ ពិធីបើកសម្ពោធជាផ្លូវការនៃភោជនីយដ្ឋាននេះ ធ្វើឡើងកាលពីរាត្រីថ្ងៃទី ១១ ខែមីនា ២០១៩ ដោយមានការចូលរួមពីឯកអគ្គរដ្ឋទូតប្រទេសសិង្ហបុរីប្រចាំព្រះរាជាណាចក្រកម្ពុជាផងដែរ ។
ការបើកសម្ពោធភោជនីយដ្ឋានដ៏ល្បីមួយនេះត្រូវបានគេរំពឹងថា នឹងកាន់តែជួយទាក់ទាញភ្ញៀវទេសចរបរទេសមកកាន់ប្រទេសកម្ពុជា កាន់តែច្រើនឡើងថែមទៀត ហើយវាជាជម្រើសបន្ថែមទៀតផងដែរសម្រាប់ភ្ញៀវទេសចរបរទេសក្នុងការទទួលសេវាកម្មទេសចរណ៍ ។ ភោជនីយដ្ឋាននេះដែរ ក៏បានបង្ហាញពីការចាប់អារម្មណ៍លើការវិនិយោគក្នុងប្រទេសកម្ពុជា ដែលជាសញ្ញាវិជ្ជមានមួយក្នុងកំនើនសេដ្ឋកិច្ចផងដែរ ។
លោក Chef Collin Ho ស្ថាបនិកភោជនីយដ្ឋាន Collin បានអោយដឹងថា មុននឹងលោកនាំចូលភោជនីយដ្ឋានទំនើបមួយនេះមកកាន់កម្ពុជា វាទទួលបានការគាំទ្រជាច្រើនមកហើយ នៅក្នុងប្រទេសសិង្ហបុរី និងទទួលបានពានរង្វាន់ជាច្រើនផងដែរ ពីប្រទេសសិង្ហបុរី ។ ហើយការមកបើកដំណើរការនៅក្នុងប្រទេសកម្ពុជានេះដែរ វាមិនមែនយករបៀបរបបពីសិង្ហបុរីមកទាំងស្រុងនោះទេ តែយើងនឹងតម្រូវទៅតាមវប្បធម៌នៃប្រទេសកម្ពុជា របៀបរបបនៃការទទួលទានរបស់ប្រជាជនកម្ពុជា ។
លោកបន្តថា អ្វីដែលភោជនីយដ្ឋាននេះ នឹងជួយដល់ប្រទេសកម្ពុជាវិញនោះ នឹងព្យាយាមប្រើប្រាស់វត្ថុធាតុដើមដែលមានក្នុងស្រុកអោយអស់លទ្ធភាព តែបើសិនជាវត្ថុធាតុទាំងនោះ មិនមាននៅក្នុងប្រទេសកម្ពុជា នោះយើងនឹងនាំចូលពីប្រទេសក្រៅមកផ្គត់ផ្គង់វិញ ។
លោកបន្ថែមថានៅជំហានដំបូង ភោជនីយដ្ឋាននេះបានបើកនៅអគារ ដឹ ប្រ៊ីជ ដែលជាអគារខ្ពស់ជាងគេនៅកម្ពុជា ហើយនៅពេលបន្ទាប់ទៀត យើងនឹងព្យាយាមរកទីតាំងដែលល្អ សមស្របដើម្បីបើកដំណើរការទីតាំងទីពីរ ទីបីបន្តបន្ទាប់ ដើម្បីបំពេញតម្រូវការរបស់អតិថិជននៅកម្ពុជា ៕
ចែករំលែកព័តមាននេះ