ខេត្តស្វាយរៀង ៖ សមត្ថកិច្ចការពារព្រំដែនច្រកទ្វារតំបន់ព្រំដែនខ្សែដែក បានបើកដៃឱ្យឈ្មួញនាំជ្រូកពីវៀតណាម ចូលមករដ្ឋបាលខេត្តស្វាយរៀងក្នុងមួយថ្ងៃ រាប់សិបក្បាលដោយមិនខ្វល់ពីផលប៉ះពាល់សុខភាពរបស់ប្រជាពលរដ្ឋឡើយ ខណៈក្រសួងកសិកម្មរុក្ខាប្រមាញ់ និងនេសាទ ទើបប្រកាសបិទទាំងស្រុងមិនឱ្យនាំជ្រូកពីប្រទេសវៀតណាមចូលមកកម្ពុជានោះទេ ។ ចំពោះមូលហេតុនោះ ត្រូវបានគេដឹងថា ជ្រូកវៀតណាមបានផ្ទុះនូវជំងឺរយៈពេល១ខែមកហើយ។
ក៏ប៉ុន្តែ ជាក់ស្តែងត្រូវក្រុមចល័តមន្ត្រីការិយាល័យផលិតកម្មបសុព្យាលនៃមន្ទីរកសិកម្មខេត្ត ចុះបង្ក្រាបចាប់បានរហូត១៨ក្បាល កាលពីវេលាម៉ោង០៨ និង១៥នាទីព្រឹកថ្ងៃទី១៣ មីនា ស្ថិតនៅចំណុចច្រកទ្វារតំបន់ព្រំដែនខ្សែដែក ស្ថិតក្នុងភូមិត្រស់ ឃុំត្រស់ ស្រុករមាសហែក ។ បើតាមបុរសជាម្ចាស់រថយន្តដឹកជ្រូក ដែលត្រូវសមត្ថកិច្ចឃាត់ខ្លួនបានឱ្យដឹងថា គាត់បើករថយន្តម៉ាកហ៊ីយ៉ាន់ដាយកូរ៉េ ពាក់ស្លាកលេខភ្នំពេញ2AQ-3884 គាត់ជាអ្នកស៊ីឈ្នួលដឹកឱ្យឈ្មោះរ៉ា និងឈ្មោះសៅ នៅស្រុកមេសាង ខេត្តព្រៃវែង ដោយក្នុងមួយក្បាលតម្លៃ៣ម៉ឺនរៀល ។ ហើយម្ចាស់ជ្រូកបង់ឱ្យសមត្ថកិច្ចនគរបាលច្រកទ្វារតំបន់ព្រំដែនខ្សែដែក គឺបង់ក្បាលថ្លៃរថយន្តក្នុងមួយគ្រឿងចំនួន៣ម៉ឺនរៀល និងទាហានវរៈការពារព្រំដែន២ម៉ឺនរៀល ។
ប្រភពដដែលបន្តទៀតថា រូបគេស៊ីឈ្នួលដឹកគោពីខេត្តព្រៃវែង មកទម្លាក់នៅច្រកទ្វារព្រំដែនខ្សែដែក
តម្លៃ១ក្បាល២ម៉ឺនរៀល ហើយក៏ដឹកជ្រូកត្រឡប់ទៅវិញ ដោយថៅកែជ្រូកយកទៅដាក់តាមកន្លែងកាប់ជ្រូកកាប់សាច់តាមផ្ទះ ក្នងខេត្តព្រៃវែង ។ ហើយមិនមែនមានតែរថយន្តរបស់គាត់ទេ គឺមានរថយន្តជាច្រើនគ្រឿងផ្សេងទៀត ដឹកទាំងយប់ទាំងថ្ងៃ មានកូនជ្រូកសម្រាប់យកទៅខ្វៃដឹករហូតដល់ភ្នំពេញ និងជ្រូកធំរាប់សិបក្បាល ក្នុងមួយថ្ងៃៗមិនដែលឃើញសមត្ថកិច្ចណាចាប់ឃាត់ឡើយ ។
ទាក់ទិនករណីនេះដែរ លោកឆាង វី ប្រធានស្នាក់ការច្រកទ្វារតំបន់ព្រំដែនខ្សែដែកបានប្រាប់កោះសន្តិភាពថា លោកមិនបានដឹងទេ ដោយលោកមិនបានឈរជើងនៅទីនោះ ។ ហើយសមត្ថកិច្ចប្រចាំការនៅប៉ុស្តិ៍មិនបានរាយការណ៍ឱ្យដែរ ទើបតែមានអ្នកសាព័ត៌មានសួរធ្វើឱ្យលោកមានការភ្ញាក់ផ្អើលតែម្តង ។ ចំណែកលោកប្រធានប៉ុស្តិ៍ច្រកទ្វារតំបន់ព្រំដែនខ្សែដែក មិនអាចទំនាក់ទំនងបានទេ ដោយទូរស័ព្ទខលចូល តែគ្មានអ្នកលើក ។
ទាក់ទិនករណីខាងលើនេះដែរ លោកថាច់ រតនា ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានមានប្រសាសន៍ថា ក្រុមមន្ត្រីជំនាញការិយាល័យផលិតកម្មបសុព្យាបាលនៃមន្ទីរកសិកម្មខេត្តស្រុក បានចុះបង្ក្រាប និងចាប់ឃាត់រថយន្តដឹកជ្រូកមកពីប្រទេសវៀតណាមបាន១៨ក្បាល យកមករក្សាទុកនៅមន្ទីរកសិកម្មរុក្ខាប្រមាញ់ និងនេសាទខេត្ត ដើម្បីអនុវត្តតាមបច្ចេកទេស គឺបូមឈាមជ្រូកយកទៅពិនិត្យនៅមន្ទីរពិសោធន៍រាជធានីភ្នំពេញ ហើយបើលទ្ធផលរកឃើញថា មានជំងឺយកទៅកម្ទេចចោលតែម្តង ។ ហើយបើលទ្ធផលគ្មានជំងឺទេ ត្រូវផាកពិន័យតាមច្បាប់ ។
លោកបញ្ជាក់ទៀតថា ក្រសួងកសិកម្មបើកចេញសារាចរណ៍ណែនាំមិនអនុញ្ញាតឲ្យនាំជ្រូកវៀតណាមចូលមកកម្ពុជាទៀតទេ គឺត្រូវបិទទាំងស្រុងតែម្តង ដោយមូលហេតុជ្រូកវៀតណាមផ្ទុះជំងឺ ។ ក៏ប៉ុន្តែឈ្មួញនៅតែលួចឃុបឃិតជាមួយសមត្ថកិច្ចឈរជើងតាមព្រំដែន បានបើកដៃឱ្យនាំជ្រូកពីវៀតណាមមកដដែល ។
ចែករំលែកព័តមាននេះ