តាមការផ្សាយកន្លងមករបស់ «កោះសន្តិភាព»…អារឿងឪពុករំលោភកូនស្រីបង្កើត…អារឿងជីតារំលោភចៅស្រីបង្កើត…អារឿងឪពុកមា ឪពុកធំរំលោភក្មួយស្រីបង្កើត…មានច្រើនណាស់និងរាប់ភ្លេច ។
ទង្វើខាងលើនេះ…ត្រូវបានឱ្យឈ្មោះថា ជាឪពុក ជាតា ជាមាតិរច្ឆាន…ព្រោះបើមនុស្សដូចគេដែរ មិនប្រព្រឹត្តបែបនេះឡើយ ។
រៀបរាប់ខ្លីៗ…កូន ចៅ និងក្មួយដែលរងគ្រោះដោយចាប់រំលោភរួមរ័ក…មានអាយុពី៦ឆ្នាំទៅ១៦ឆ្នាំ…ស្ថិតក្នុងវ័យកុមារភាព…ជាអនីតិជនដែលក្រុមគ្រួសារមនុស្សត្រូវតែមើលថែ ។
រៀបរាប់ខ្លីៗទៀត…ឪពុកតិរច្ឆានខ្លះ…នាំកូនស្រីទៅធ្វើស្រែ…ចាប់រំលោភតាមវាលស្រែ ។ ខ្លះនាំកូនស្រីទៅនេសាទត្រី…ចាប់រំលោភនាងនៅលើទូក…កូនស្រីខ្លះជិតក្រមុំទៅហើយ…ម៉ែទៅធ្វើការស៊ីឈ្មួលគេ…ត្រូវឪពុកបង្កើតចាប់រំលោភនៅលើផ្ទះ…មិនមែនតែម្តងឬពីរដងទេ…គឺញឹកញាប់ថែមទៀត…ព្រមទាំងគំរាមសម្លាប់ ប្រសិនបើធ្វើឱ្យបែកការណ៍…ម្ល៉ោះហើយក្មេងៗភ័យខ្លាចណាស់ រឿងឪពុកគំរាមសម្លាប់…ក៏ចេះតែទ្រាំសម្ងំស្ងៀមទាំងឈឺចាប់ខ្លោចផ្សារ ។
រៀបរាប់ខ្លីៗបន្តទៀត…ជីតាខ្លះជាតិរច្ឆាននៅចាំផ្ទះ…ចៅស្រីៗជួយបំរើបាយទឹក…ត្រូវតាកញ្ចាស់ចាប់ចៅឯងរំលោភ…ម៉េះម៉ោះចៅឯងតាមចិត្ត…ក៏ជាជីតាតិរច្ឆានយ៉ាងពិតប្រាកដដែរ ។ រៀបរាប់បន្តទៀតតាមដឹង…មានគ្រួសារខ្លះ២នាក់ប្តីប្រពន្ធធ្វើចំណាកស្រុក…យកកូនស្រី ខ្លះម្នាក់ខ្លះពីរនាក់មកផ្ញើឪពុកមា ឪពុកធំ…ឱ្យជួយមើលថែដោយផ្ញើប្រាក់មកឱ្យរៀងរាល់ខែ…ព្រោះប្រៀបដូចឪពុកបង្កើតដែរ ទើបទុកចិត្ត…ប៉ុន្តែផ្ទុយទៅវិញដូចយកពងមាន់មកផ្ញើក្អែក ។ តិរច្ឆានក្អែកចង្រៃ…មិនបានប្រណីក្មួយៗទេ…រំលោភនាងតាមចិត្តដែលមានតែពាក្យគំរាមសម្លាប់ បើហ៊ាននិយាយ…ម្ល៉ោះហើយការរស់ជាបញ្ញើក្អែកបែបនេះ…ទទួលរងការឈឺចាប់ប្រចាំជីវិតច្រើននាក់ហើយ ។
រឿងពិតខ្លីៗដូចរៀបរាប់មកនេះ…ខ្លះយូរឆ្នាំ យូរខែទើបបែកធ្លាយ…ដោយសារតែទ្រាំនឹងការចាប់រំលោភលែងបាន…កុមាររងគ្រោះទាំងឡាយលួចបង្ហើបប្រាប់សាច់ញាតិ…លួចប្រាប់អ្នកជិតខាងដែលគេអាណិតស្រឡាញ់…ជួនកាលបង្ហើបប្រាប់ម្តាយ…ពេលដែលទ្រាំការឈឺចាប់លែងបាន ។ មានឪពុកតិរច្ឆានមួយនោះ មានកូនស្រី៣នាក់…ដែលកូនបងអាយុត្រឹមតែ១៤-១៥ឆ្នាំប៉ុណ្ណោះ…ក្រោយពេលបែកការណ៍ទើបដឹងថា…រំលោភកូនស្រីទាំង៣យ៉ាងព្រៃផ្សៃបំផុត…ព្រោះហេតុតែម៉ែទៅស៊ីឈ្មួលគេបាត់ៗ ។
និយាយដោយពិតត្រង់ទៅ…ពាក្យបណ្តឹងទាំងឡាយត្រូវបានប៉ូលិសចាប់ឪ ចាប់តា ចាប់មាតិរច្ឆានទាំងឡាយនោះភ្លាមៗ…គ្មានប្រណីទេ ហើយម្នាក់ៗអត់ហ៊ានប្រកែកទេ…គឺបានសារភាពនូវកំហុសរបស់ខ្លួន ដែលជាត្រីឆ្តោរស៊ីកូនឯង…ព្រមទាំងបានបញ្ជូនទៅតុលាការកាត់ទោសតាមច្បាប់ គ្រប់តិរច្ឆានទាំងឡាយនោះ…ប៉ុន្តែខ្លះក៏ប្រកែកដែរ ។
ចំណែកអ្នកកាសែតវិញ…ដែលបានដឹងបានចេញផ្សាយម្តងៗ…សុទ្ធតែមានសីលធម៌ មានវិជ្ជាជីវៈ…មិនហ៊ានចេញផ្សាយឈ្មោះកុមារីរងគ្រោះទេ…បានជួយលាក់បាំងពីអាសយដ្ឋានភូមិ ឃុំ ថែមទៀត…ប៉ុន្តែពាក្យថាមនុស្សតិរច្ឆាននេះ…ជាពាក្យមិនត្រាប្រណី…ប្រៀបដូចបានចូលរួមថ្កោលទោសផងដែរ ។
រឿងរ៉ាវមនុស្សតិរច្ឆាននេះ…កើតមាននៅភូមិណាក៏ដោយ…អ្នកភូមិស្អប់ខ្ពើមគ្រប់គ្នា…អ្នកភូមិម្នាក់ៗបញ្ចេញកំហឹងពុះកញ្ជ្រោល…ស្អប់ដល់ពូជ ។ ប្រសិនបើមានទោសព្យួរក…ឬមានទោសប្រហារជីវិត…
តាមទស្សនៈនានានិយាយថា…មិនចាំបាច់ប៉ូលិសចាប់ខ្លួនទាន់ទេ…ប្រហែលជាមិនអាចដល់តុលាការផង…ប្រហែលជាត្រូវអ្នកភូមិលើកគ្នា «កាត់ទោស»មុនបាប់ជាមិនខាន…ព្រោះវាលែងជាមនុស្សលោកទៅហើយ…ជាតិរច្ឆានទៅហើយ…។
ដូច្នោះ ជីវិតតិរច្ឆានប្រាកដជាផុយស្រួយ…វាផុយស្រួយពេកទៅ…អាចច្រឡំដោយប្រការណាមួយ…នឹងក្លាយជា «អយុត្តិធម៌»…ប្រហារជីវិតក្រៅច្បាប់ដោយច្រឡំ ។ ដូច្នោះទៀត…គួរតែកុំមាន…កុំមានវាល្អ…វាប្រសើរជាងមាន…ហេ ! េហ !
ចែករំលែកព័តមាននេះ