រាជធានីភ្នំពេញ៖ រថយន្តកូរ៉ូឡា មួយគ្រឿងពាក់ស្លាកលេខ ភ្នំពេញ 2E-2415 បានរងការខូចខាតផ្នែកខាងមុខ ក្រពឹតខ្ទេច បន្ទាប់ពីបើកទៅបុកនឹងដើមលឿងរាជនៅមុខផ្ទះលេខ៥៥Eo ផ្លូវលេខ១២៦ ខាងជើងផ្សារធំថ្មី ស្ថិតក្នុងសង្កាត់ផ្សារថ្មីទី១ ខណ្ឌដូនពេញ កាលពីវេលាម៉ោង៧និង៣០នាទីយប់ថ្ងៃទី៤ សីហា ។
អ្នករត់ម៉ូតូឌុបម្នាក់បាននិយាយឱ្យដឹងថា មុនពលេកើតហេតុគាត់ឃើញរថយន្តកូរ៉ូឡាមួយគ្រឿងបានបើកតាមផ្លូវលេខ៥៣ខាងកើតផ្សារធំថ្មី ក្នុងល្បឿនលឿន ដោយមានរថយន្តម៉ាកឡិចស៊ីស RX 300 បើកដេញតាមពីក្រោយមិនដឹងមូលហេតុអ្វីនោះទេ ។ លុះមកដល់មុខផ្ទះលេខ៥៥Eo ខាងជើងផ្សារធំថ្មី ស្រាប់តែរថយន្តនោះជ្រុលបុកដើមលឿងរាជចំពីមុខពេញទំហឹង បណ្តាលឱ្យទៅមុខលែងរួច បន្តិចក្រោយមកទើបឃើញបុរសម្នាក់បើកទ្វារចេញមកខាងក្រៅ ត្រូវបានគេស្គាល់ថា ឈ្មោះជា ឡូត អាយុ២៥ឆ្នាំ ស្នាក់នៅក្នុងខណ្ឌសែនសុខ ហើយនិយាយបណ្តើរទូរស័ព្ទបណ្តើរក្នុងសភាពស្រវឹង…ឯរថយន្តឡិចស៊ីសក៏បង្ហួសទៅបាត់ទៅ ។
រថយន្តកូរ៉ូឡានេះត្រូវបានសមត្ថកិច្ចឱ្យដឹងថា បើកទៅប៉ះរថយន្តឡិចស៊ីសរួចហើយបើករត់ ទើបជួបគ្រោះថ្នាក់បែបនេះ ។ ព័ត៌មានលំអិតនឹងផ្សាយជូននៅពេលក្រោយ និងនៅលើទំព័រកាសែតកោះសន្តិភាព ៕
ចែករំលែកព័តមាននេះ