រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានអះ អាងប្រាប់អនុប្រធានក្រុមប្រឹក្សាផ្លាស់ប្តូរមិត្តភាពអន្តរជាតិជប៉ុនថា ពាក់ព័ន្ធនឹងបញ្ហាសហភាពអឺរ៉ុប ចាប់ផ្ដើមនីតិវិធីដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ»…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានអះ អាងប្រាប់អនុប្រធានក្រុមប្រឹក្សាផ្លាស់ប្តូរមិត្តភាពអន្តរជាតិជប៉ុនថា ពាក់ព័ន្ធនឹងបញ្ហាសហភាពអឺរ៉ុប ចាប់ផ្ដើមនីតិវិធីដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ឬហៅថា (EBA) ពីកម្ពុជានោះ កម្ពុជានឹងមិនយកប្រទេសសមាជិកអ៊ឺរ៉ុបណាមួយជាសត្រូវទេ តែកម្ពុជាត្រូវតែខិតខំពង្រឹងសេដ្ឋកិច្ច តាមរយៈបន្តបើកទីផ្សារនៅក្រៅប្រទេសអោយកាន់តែច្រើន។
សម្តេចតេជោ ហ៊ុន សែន នាឱកាសជួបពិភាក្សាការងារជាមួយ លោក Norio Yamaguchi អនុប្រធានក្រុមប្រឹក្សាផ្លាស់ប្តូរមិត្តភាពអន្តរជាតិជប៉ុន នៅថ្ងៃទី ១២ ខែមីនា ឆ្នាំ ២០១៩ នេះ បានឲ្យដឹងថា ជាការពិតណាស់អទិភាពរបស់កម្ពុជាគឺនៅដដែលទេ ប៉ុន្តែការបណ្ដុះបណ្ដាលធនធានមនុស្សគឺជាអាទិភាពចម្បង អ្វីដែលជាកិច្ចខិតខំប្រឹងប្រែងរបស់រាជរដ្ឋាភិបាលកម្ពុជានៅពេលនេះគឺពង្រឹងសេដ្ឋកិច្ចកម្ពុជា ធ្វើយ៉ាងណាឲ្យកំណើនបន្តកើនឡើងជាង ៧% ។ ទន្ទឹមនឹងនេះ តាមរយៈការខិតខំប្រឹប្រែងរបស់រាជរដ្ឋាភិបាល គឺបានដំឡើងប្រាក់ខែដល់មន្ត្រីរាជការ និងកម្មករ ជាមួយគ្នានេះទៀត រាជរដ្ឋាភិបាល កំពុងតែជំរុញសេដ្ឋកិច្ចកម្ពុជាឲ្យមានការប្រកួតប្រជែង ពិសេសតាមរយៈការធ្វើកំណែទម្រង់និងគោរពតាមបាវចនារបស់រាជរដ្ឋាភិបាលគឺ កែទម្រង់ផ្ទៃក្នុង និងពង្រឹងទំនាក់ទំនងខាងក្រៅ ជាមួយអភិក្រមទាំង៥ ជាមួយនឹងកំណែទម្រង់សេដ្ឋកិច្ច សម្អាតបញ្ហាទាំងឡាយដើម្បី ដែលផ្តល់ភាពអនុគ្រោះច្រើន ដែលជាប្រយោជន៍ម្រាប់អ្នកវិនិយោគនៅកម្ពុជា។
ចំពោះស្ថានភាព EBA គឺ សម្តេចតេជោ បានមានប្រសាសន៍បញ្ជាក់ប្រាប់ភាគីជប៉ុនថា «ទោះបីកម្ពុជាមាន ឬគ្មាន EBA គឺកម្ពុជាត្រូវតែខិតខំពង្រឹងសេដ្ឋកិច្ច តាមរយៈបន្តបើកទីផ្សារនៅក្រៅប្រទេសអោយកាន់តែច្រើន។ ទោះបីយើងនៅមាន EBA ពេលនេះ តែពេលក្រោយក៏គង់តែនឹងបាត់ទៅវិញដែរ ដូច្នេះកម្ពុជាត្រូវតែចេះរស់ដោយដង្ហើមខ្លួនឯងអោយខានតែបាន។ កម្ពុជាមិនយកប្រទេសសមាជិកអ៊ឺរ៉ុបណាមួយជាសត្រូវទេ ប៉ុន្តែនៅតែជាមិត្តល្អ មានកិច្ចសហប្រតិបត្តិការគ្នាល្អ និងចាត់ទុកជាដៃគូសេដ្ឋកិច្ច ពាណិជ្ជកម្មល្អជាមួយគ្នា» ។ សម្តេចបន្តថា នៅឆ្នាំ ២០២០ ខាងមុខនេះ កម្ពុជាមានមោទនៈភាព ក្នុងរៀបចំវេទិកាប្រជុំកំពូលដ៏ធំមួយអាស៊ីអ៊ឺរ៉ុប -The Asia-Europe Meeting (ASEM) ដែលប្រទេសជាសមាជិកអ៊ឺរ៉ុបទាំងអស់នឹងមកកាន់ប្រទេសកម្ពុជាទៀតផង។
សូមបញ្ជាក់ថា កាលពីថ្ងៃទី ១១ កុម្ភៈ កន្លងមក សហភាពអឺរ៉ុបបានចេញសេចក្ដីប្រកាសព័ត៌មានមួយថា ខ្លួនបាននិងកំពុងដំណើរការនីតិវិធីក្នុងការព្យួរជាបណ្ដោះអាសន្ននូវប្រព័ន្ធអនុគ្រោះពន្ធលើទំនិញគ្រប់យ៉ាងលើកលែងអាវុធ(EBA)ពីកម្ពុជា ដែលបានបង្កឲ្យមានការព្រួយបារម្ភនិងសោកស្ដាយមជ្ឈដ្ឋានមួយចំនួន បើទោះបីជាការដកហូតនេះ មិនទាន់ចាប់ផ្ដើមជាផ្លូវការក៏ដោយ ។ បើសិនកម្ពុជាពិតជាត្រូវបាត់បង់ EBA នោះកម្ពុជាត្រូវបង់ពន្ធជាង៥០០លានដុល្លារសម្រាប់ការនាំចេញទៅទីផ្សារអឺរ៉ុប ។ ទីផ្សារសហភាពអឺរ៉ុបមានចំនួនប្រហែល ៤០ ភាគរយនៃការនាំចេញរបស់កម្ពុជា។ ជាក់ស្តែងរវាងឆ្នាំ ២០១៤ និង ២០១៦ ការនាំចេញទៅកាន់សហភាពអឺរ៉ុបបានកើនឡើង ២២៧ភាគរយ, ឈានដល់ $ 5,77 ពាន់លាននៅក្នុងឆ្នាំ 2017 ។
សេដ្ឋវិទូបណ្ឌិតម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ធ្លាប់ថ្លែងប្រាប់កោះសន្តិភាពថា ប្រសិនជាអឺរ៉ុបដកប្រព័ន្ធអនុគ្រោះពន្ធពីកម្ពុជា មែននោះ កម្ពុជាអាចរងផលប៉ះពាល់ ប៉ុន្តែវាក៏ជាពេលដែលកម្ពុជាត្រូវផ្លាស់ប្តូរផ្នត់គំនិត ពីការពឹងផ្អែកលើគេខ្លាំងពេក និងត្រូវខិតខំប្រឹងខ្លួនឯង ។ លោកបណ្ឌិតបានមានប្រសាសន៍ឲ្យដឹងតាមទូរស័ព្ទនាល្ងាចថ្ងៃទី១២ ខែកុម្ភៈ ថា ៖« រឿងEBA មិនមែនជារឿងថ្មីទេ ហើយបញ្ហាសេដ្ឋកិច្ចវាពាក់ព័ន្ធនយោបាយកាទូត ហេតុនេះការដែលគេដកEBAយើង មកពីយើងមានបញ្ហា ហើយតែការដកEBAពិតជាកើតមាន គ្រាន់តែមុននិងក្រោយ ដូច្នេះយើងត្រូវតែពឹងផ្អែកខ្លួនឯង និងធ្វើពិពិធកម្មសេដ្ឋកិច្ចរបស់យើង »។
ប្រភពព័ត៌មានពីសហភាពអឺរ៉ុបប្រចាំកម្ពុជា បានឲ្យដឹងថាមន្ដ្រីជាន់ខ្ពស់សហភាពអឺរ៉ុបទទួលបន្ទុកការងារការទូត និងនយោបាយការបរទេស និងមន្ដ្រីជាន់ខ្ពស់ទទួលបន្ទុកការងារពាណិជ្ជកម្ម គ្រោងនឹងមកដល់កម្ពុជានៅសប្ដាហ៍ក្រោយនេះដើម្បីពិនិត្យតាមដានរឿង EBA ៕
ចែករំលែកព័តមាននេះ