ខេត្តមណ្ឌលគិរី ៖ ព្រៃឈើដែលលាតសន្ធឹងប្រមាណ៧០%លើទឹកដីខេត្ត មណ្ឌលគិរីគឺជាប្រភពចំណូលសេដ្ឋកិច្ចគ្រួសាររបស់ជនជាតិភាគតិច តាមរយៈការប្រមូលផលអនុផលព្រៃឈើ ។ របរដែលជនជាតិភាគតិចអាចរកកម្រៃមកផ្គត់ផ្គង់មានដូចជា បោចផ្តៅ បោចវល្លិ បរបាញ់សត្វ បេះផ្លែឈើព្រៃ ដងជ័រទឹក និងរើសជ័រនៅក្នុងព្រៃយកទៅលក់ជាដើម ។
បើគ្រួសារណាមានដីច្រើនគេអាចដាំស្រូវ ដាំដំណាំផ្សេងៗ និងចិញ្ចឹមសត្វ សម្រាប់គ្រួសារហូបបានគ្រប់គ្រាន់ពុំសូវខ្វាយខ្វល់ទេ តែចំពោះជនជាតិភាគតិចមួយចំនួនដែលមានកូនច្រើន តែមិនមានដីធ្លីច្រើនដូចគេ តែងតែឆ្លៀតពេលទំនេរពីការងារស្រែចម្ការចូលទៅក្នុងព្រៃដើម្បីរកចំណូលបន្ថែម ។ ជនជាតិដើមភាគតិចលោក រជើម ផ្ចាល ជាប្រធានសហគមន៏ភូមិពូត្រុំបានឲ្យដឹងថា របរដងជ័រទឹកគឺពួកគាត់ធ្វើតៗគ្នាតាំងពីជំនាន់ចាស់បុរាណមកម្ល៉េះ ។ របរនេះជួយឱ្យជីវភាពគ្រួសាររបស់ពួកគាត់បានធូរស្រាលមួយកម្រិត ព្រោះបើពឹងទៅលើរបរធ្វើស្រែចម្ការមួយមុខមិនអាចហូបគ្រប់ទេ មានតែស៊ូទ្រាំចូលព្រៃដែលសម្បូរសត្វទាក ហើយត្រូវវាខាំស្ទើរសុសសាច់ និងពេលខ្លះត្រូវកើតជំងឺគ្រុនចាញ់ដោយសារមូសខាំច្រើនពេក ។ ក្រៅពីរបរនៅក្នុងព្រៃទាំងនេះពួកគាត់ពុំដឹងទៅរកស៊ីអ្វីផ្សេងឡើយ ព្រោះពួកគាត់ខ្វះខាតដើមទុន និងរៀនសូត្រក៏ពុំបានជ្រៅជ្រះ ។ ដូច្នេះរបរដងជ័រទឹកជួយឱ្យពួកគាត់អាចមានលទ្ធភាពចិញ្ចឹមគ្រួសារបានដូចគេឯង ។
ជនជាតិភាគតិចរៀបរាប់ឱ្យអ្នកយកព័ត៌មានដឹងថា មិនថារដូវប្រាំង ឬរដូវវស្សាឡើយ ពួកគាត់តែងតែនាំគ្នាចូលព្រៃ ដើម្បីរកដងជ័រទឹកយកទៅលក់ឱ្យឈ្មួញដើម្បីបានប្រាក់ផ្គត់ផ្គង់គ្រួសារ ។ ការចូលទៅរកដងជ័រទឹកនេះមិនទៀងទាត់ទេ ជួនកាលរយៈពេល១០ថ្ងៃ ឬ១៥ថ្ងៃក៏មាន ។ ក្នុងម្នាក់ប្រើពេលពី២ទៅ៣ថ្ងៃទើបអាចដងជ័រទឹកបានមួយប៊ីដុង ៣០លីត្រ ។ នៅពេលពួកគាត់ប្រមូលជ័រទឹកបានច្រើនហើយ ក៏នាំគ្នាស្ពាយប៊ីដុងជ័រទឹកចេញមកពីក្នុងព្រៃដាក់តម្រៀបគ្នាតាមផ្លូវជាតិរង់ចាំឈ្មួញទៅទិញ ។ ចំពោះតម្លៃរបស់ជ័រទឹកវាអាស្រ័យតាមជ័រល្អ ឬមិនល្អដោយមានចូលទឹកច្រើន គឺតម្លៃចាប់ពី៣០០០រៀលឡើងទៅក្នុង១គីឡូក្រាម ។ ជនជាតិភាគតិចសម្តែងការព្រួយបារម្ភយ៉ាងខ្លាំងចំពោះការហិនហោចរបស់ដើមជ័រទឹកព្រោះសព្វថ្ងៃកំពុងរងការកាប់បំផ្លាញយ៉ាងរង្គាលពីជនខិលខូចមួយចំនួននៅក្នុងតំបន់ផ្សេងៗរហូតដល់ព្រៃការពារសហគមន៍ ។
លោក ចាន់ ឌី អាជីវករទទួលទិញជ័រពីអ្នកភូមិបានប្រាប់ថា ក្នុងមួយថ្ងៃលោកអាចទិញជ័រទឹកពីអ្នកភូមិបានប្រមាណ១០ទៅ២០កាន។តែនៅរដូវវស្សាលោកទិញបានត្រឹម៥កានទៅជិត១០កាន ប៉ុណ្ណោះក្នុងមួយថ្ងៃ។ចំពោះតម្លៃបើគេដឹកឲ្យគាត់ដល់កន្លែងគាត់ ទិញក្នុងមួយកានតម្លៃ១០ម៉ឺនរៀល តែបើគាត់ទិញតាមផ្ទះត្រឹម៨ម៉ឺនរៀល ទៅតាមទីជិតឬឆ្ងាយ។
លោកកែវ សុភគ៌ ប្រធានមន្ទីរបរិស្ថានខេត្តមណ្ឌលគិរី បានឲ្យដឹងថា សព្វថ្ងៃដើមជ័រទឹកបានផ្តល់ផលជាច្រើនសម្រាប់ទ្រទ្រង់ជីវភាពបងប្អូនជនជាតិដើមភាគតិច ដែលតែងអាស្រ័យផលលើធនធានធម្មជាតិ។ម្យ៉ាងវិញទៀតការទទួលផលពីដើមឈើសម្រាប់យកជ័រមិនបានប៉ះពាល់ដល់ការបាត់បង់ព្រៃឈើឡើយ ពោលគឺថែមទាំងបានការពារដោយប្រយោលពីការប្រកបរបរនេះថែមទៀតផង។ លោកប្រធានមន្ទីរបន្តថា បច្ចុប្បន្នលោកបានលើកទឹកចិត្តតាមសហគមន៏ឲ្យខិតខំការពារថែរក្សាដើមឈើទាលឬប្រភេទដើមឈើដែលអាចទទួលផលជ័រ ត្រូវរួមគ្នាសហការជាមួយមន្ត្រីជំនាញដើម្បី អភិរក្សទុកប្រើប្រាស់ឲ្យបានយូរអង្វែង។
បច្ចុប្បន្នជ័រទឹកត្រូវបានគេយកទៅប្រើប្រាស់ក្នុងជីវភាពលើការងារជាច្រើនផ្នែក ក្នុងនោះ ជ័រទឹកគេអាចយកទៅ លាបទូកដើម្បីកុំឲ្យទឹកជ្រាប ធ្វើជាចន្លុះសម្រាប់ដុតបំភ្លឺពេលយប់ ។ល។ ហើយបើតាមប្រភពពីលោកប្រធានមន្ទីរបរិស្ថានខេត្តមណ្ឌលគិរី សព្វថ្ងៃមានអង្គការមួយកំពុងស្រាវជ្រាវយកជ័រទឹកកែច្នៃធ្វើជាមេទឹកអប់ថែមទៀត៕
ចែករំលែកព័តមាននេះ