ភាគច្រើនសុទ្ធតែធ្លាប់ដឹងថា ការធ្វើលំហាត់ប្រាណជាប្រចាំសំខាន់ណាស់ដើម្បីរក្សាបាននូវសុខភាពល្អប្រសើរចៀសផុតពីបញ្ហាផ្សេងៗ ។ ប៉ុន្តែថាតើនឹងមានអ្វីកើតឡើងទៅ ប្រសិនបើអ្នកឈប់ធ្វើលំហាត់ប្រាណ? សូមបង្ហាញឱ្យដឹងពីអ្វីដែលនឹងកើតឡើង ប្រសិនបើអ្នកឈប់ធ្វើលំហាត់ប្រាណដែលធ្លាប់តែអនុវត្តជាប្រចាំនោះ ៖
១. សម្ពាធឈាមនឹងឡើងខ្ពស់
ការសិក្សាស្រាវជ្រាវជាច្រើនបានបង្ហាញថា សរសៃឈាមនៃអត្តពលិក និងអ្នកធ្វើលំហាត់ប្រាណដែលបោះបង់ ឬឈប់ហ្វឹកហាត់នឹងប្រែជារឹងដែលធ្វើឱ្យសម្ពាធឈាមឡើងខ្ពស់គួរឱ្យកត់សម្គាល ។ ហើយបញ្ហាសម្ពាធឈាមឡើងខ្ពស់នេះជាកត្តាចម្បងបំផុតមួយនៃជំងឺបេះដូង។ ការធ្វើលំហាត់ប្រាណទៀងទាត់អាចជួយរក្សាសម្ពាធឈាមមិនឱ្យឡើងខ្ពស់ ។ នេះហើយជាមូលហេតុដែលវេជ្ជបណ្ឌិតជាច្រើនណែនាំឱ្យអ្នកជំងឺលើសឈាមព្យាយាមធ្វើលំហាត់ប្រាណ ។
២. រឹងសន្លាក់
ការធ្វើសកម្មភាពរាងកាយគ្រប់គ្រាន់ ឬការធ្វើលំហាត់ប្រាណត្រូវបានណែនាំជាពិសេសសម្រាប់អ្នកដែលមានបញ្ហាសន្លាក់ដើម្បីកាត់បន្ថយការឈឺចាប់, ការរលាក និងឡើងរឹង។ ដូច្នេះវាច្បាស់ណាស់ថា ការឈប់ធ្វើលំហាត់ប្រាណនឹងបណ្ដាលឱ្យអ្នកជួបប្រទះបញ្ហាឈឺសន្លាក់ ក៏ដូចជារលាកគួរឱ្យព្រួយបារម្ភ។ ហើយមិនត្រឹមតែសន្លាក់ប៉ុណ្ណោះទេដែលទទួលបានអត្ថប្រយោជន៍ពីការធ្វើលំហាត់ប្រាណ ប៉ុន្តែឆ្អឹងក៏ដូចគ្នា គឺចៀសផុតពីហានិភ័យនៃជំងឺពុកឆ្អឹង ។
៣. កម្រិតជាតិស្ករក្នុងឈាមនឹងឡើងខ្ពស់
អ្នកជំងឺទឹកនោមផ្អែមតែងទទួលបានការណែនាំឱ្យធ្វើលំហាត់ប្រាណជាប្រចាំ និងប្រយ័ត្នចំពោះអ្វីដែលពួកគេទទួលទាន ដើម្បីរក្សាកម្រិតត្រឹមត្រូវនៃជាតិស្ករក្នុងឈាម ។ ជាពិសេសចំពោះអ្នកធាត់ជ្រុល និងមានបញ្ហាសម្ពាធ ការធ្វើលំហាត់ប្រាណ គឺសំខាន់ណាស់ដោយវាជួយកាត់បន្ថយហានិភ័យនៃជំងឺ ។
៤. កើនទម្ងន់
ការធ្វើលំហាត់ប្រាណជួយឱ្យអ្នកស្រកទម្ងន់ ហើយក៏អាចធ្វើឱ្យអ្នកឡើងទម្ងន់ដូចគ្នា! កង្វះនៃការធ្វើលំហាត់ប្រាណ រួមជាមួយទម្លាប់នៃការទទួលទានមិនត្រឹមត្រូវ និងភាពតានតឹងក្នុងអារម្មណ៍អ្នកនឹងកើនទម្ងន់យ៉ាងឆាប់រហ័ស។ ហើយភាពធាត់ជ្រុល ឬលើសទម្ងន់ក៏អាចបង្កហានិភ័យនៃបញ្ហាសុខភាពធ្ងន់ធ្ងរជាច្រើន ។
៥. ពិបាកក្នុងការគេង
គ្រប់គ្នាសុទ្ធតែដឹងហើយថា ការគេងឱ្យបានពី ៧ទៅ ៩ម៉ោង ក្នុងមួយយប់ គឺចាំបាច់ណាស់សម្រាប់សុខភាព ។ ប្រសិនបើអ្នកឈប់ធ្វើលំហាត់ប្រាណទៀងទាត់ អ្នកនឹងពិបាកគេងបានស្កប់ហើយ ។ លើសពីនេះទៅទៀត ការធ្វើលំហាត់ប្រាណជាប្រចាំជួយបំបាត់ស្ត្រេស ឬភាពតានតឹងក្នុងអារម្មណ៍ដែលជាមូលហេតុចម្បងមួយនៃការគេងមិនលក់ ។
៦. មានអារម្មណ៍បាក់ទឹកចិត្ត
អ្នកឯកទេសខាងសុខភាពផ្លូវចិត្តជាច្រើនបានបញ្ជាក់ថា ការធ្វើលំហាត់ប្រាណទៀងទាត់ជួយធ្វើឱ្យកម្រិតនៃអ័៊រម៉ូនរីករាយក្នុងខួរក្បាលកើនឡើង ។ ជាពិសេសប្រសិនបើអ្នកធ្វើលំហាត់ប្រាណនៅខាងក្រៅក្រោមព្រះអាទិត្យ ដោយរាងកាយនឹងត្រូវទទួលបាននូវវីតាមីន Dគ្រប់គ្រាន់ ។ ហើយវីតាមីន D ជាសារធាតុចិញ្ចឹមដែលជួយលើកកម្ពស់អារម្មណ៍ល្អប្រសើរ ។ នោះហើយជាមូលហេតុដែលធ្វើឱ្យអ្នកអាចនឹងមានអារម្មណ៍បាក់ទឹកចិត្ត ប្រសិនបើអ្នកឈប់ធ្វើលំហាត់ប្រាណ (ស្រង់ពីគេហទំព័រសុខភាព) ៕
ចែករំលែកព័តមាននេះ