រាជធានីភ្នំពេញ ៖ នឹកដល់វិធានការណ៍របស់រដ្ឋបាលរាជធានីភ្នំពេញ ដែលទើបប្រកាសថ្មីៗនេះ ពាក់ព័ន្ធដែលហាមរថយន្តធ្វើចរាចរណ៍នៅពេលថ្ងៃនោះ គឺហាក់ពំុមានប្រសិទ្ធភាពអ្វីទាល់តែសោះ ព្រោះបច្ចុប្បន្ន នៅតែឃើញមានក្រុមរថយន្តដឹកដី និងដឹកទំនិញធុនធំៗ បន្តបើកបរចូលក្នុងរាជធានីភ្នំពេញនៅពេលថ្ងៃ…
រាជធានីភ្នំពេញ ៖ នឹកដល់វិធានការណ៍របស់រដ្ឋបាលរាជធានីភ្នំពេញ ដែលទើបប្រកាសថ្មីៗនេះ ពាក់ព័ន្ធដែលហាមរថយន្តធ្វើចរាចរណ៍នៅពេលថ្ងៃនោះ គឺហាក់ពំុមានប្រសិទ្ធភាពអ្វីទាល់តែសោះ ព្រោះបច្ចុប្បន្ន នៅតែឃើញមានក្រុមរថយន្តដឹកដី និងដឹកទំនិញធុនធំៗ បន្តបើកបរចូលក្នុងរាជធានីភ្នំពេញនៅពេលថ្ងៃ រាល់ថ្ងៃដដែលៗ ហើយមិនត្រឹមតែបង្កការកកស្ទះចរាចរណ៍នោះទេ គឺថែមទាំងបង្កគ្រោះថ្នាក់ចរាចរណ៍ដល់អ្នកដំណើរថែមទៀតផង ។
ជាក់ស្តែង ករណីចរាចរណ៍មួយ កើតឡើងកាលពីវេលាម៉ោង១០ព្រឹកថ្ងៃទី១២ មីនា ស្ថិតនៅចំណុចច្រមុះជ្រូកស្ទឹងមានជ័យ ក្នុងសង្កាត់ស្ទឹងមានជ័យ១ ខណ្ឌមានជ័យ បណ្តាលឱ្យស្ត្រី២នាក់ ម្នាក់រងរបួសស្រាល និងម្នាក់ទៀតបានស្លាប់បាត់បង់ជីវិតភ្លាមៗនៅនឹងកន្លែង ក្រោយរថយន្តដឹកទំនិញធុនធំមួយគ្រឿងបានបុកជាមួយម៉ូតូធូដេមួយគ្រឿងរបស់ស្ត្រីរងគ្រោះទាំង២ ។ ស្ត្រីរងគ្រោះទាំង២នាក់ ម្នាក់ស្លាប់ឈ្មេាះ អ៊ូ សួង អាយុ៥៣ឆ្នាំ ស្នាក់នៅបុរីឡាយគង់ ក្នុងសង្កាត់ដង្កោរ ខណ្ឌដង្កោរ មានស្រុកកំណើតនៅខេត្តស្វាយរៀង ។ ចំណែកម្នាក់ទៀតរងរបួសស្រាល ពំុទាន់ស្គាល់អត្តសញ្ញាណ ។
យោងប្រភពពីកន្លែងកើតហេតុថា គេឃើញស្ត្រីរងគ្រោះ២នាក់ខាងលើជិះម៉ូតូមួយគ្រឿងម៉ាកធូដេ ពណ៌ត្រួយចេក គ្មានស្លាកលេខ ជិះធ្វើដំណើរឌុបគ្នាតាមបណ្តោយផ្លូវលេខ២១៧ ពោលពួកគេទើបតែចេញមកពីផ្សារស្ទឹងមានជ័យថ្មី បំណងជិះឌុបគ្នាត្រឡប់ទៅផ្ទះវិញ នៅបុរីឡាយគង់ ខណ្ឌដង្កោ ។ លុះធ្វើដំណើរដល់ចំណុចច្រមុះជ្រូកស្ទឹងមានជ័យ ស្រាប់តែមានរថយន្តដឹកទំនិញធុនធំមួយគ្រឿង ពណ៌.ស ពាក់ស្លាកលេខភ្នំពេញ 3E-0515 បើកបរដោយបុរសម្នាក់ តាមបណ្តោយផ្លូវខាងលើស្របទិសគ្នា បានបើកបុក
និងកៀរពីក្រោយម៉ូតូ បណ្តាលឱ្យម៉ូតូត្រូវដួលធ្លាក់ស្ត្រីរងគ្រោះ ដែលអង្គុយខាងក្រោយចូលទៅក្រោមកង់រថយន្តកិនធ្លាយខួរស្លាប់នៅហ្នឹងកន្លែងភ្លាមៗតែម្តងទៅ ។ ចំណែកស្ត្រីម្នាក់ទៀតជាអ្នកឌុបត្រូវខ្ទាតចេញពីរថយន្ត រងរបួសស្រាល ។
ភ្លាមៗ តៃកុងរថយន្តបង្កបានបើករថយន្តហួសពីចំណុចកើតហេតុប្រមាណ២០០ម៉ែត្រ ក៏ឈប់រថយន្ត ហើយព្យាយាមរត់គេចខ្លួន តែត្រូវបានកម្លាំងកងរាជអាវុធហត្ថរាជធានីភ្នំពេញ ដែលមានទីបញ្ជារការដ្ឋានក្បែរកន្លែងកើតហេតុនេាះ បាននាំគ្នាដេញតាមចាប់ឃាត់បុរសជាតៃកុងរថយន្តនេាះ បានភ្លាមៗផងដែរ ដើម្បីឃាត់ទុកជូនសមត្ថកិច្ចបន្តនីតិវិធី ។
គួររំលឹកថា កាលពីពេលថ្មីៗនេះ អភិបាលរាជធានីភ្នំពេញ ធ្លាប់បានដាក់បញ្ជារដល់មន្ត្រីអាជ្ញាធរតាមបណ្តាខណ្ឌទាំង១២ ធ្វើយ៉ាងត្រូវមានវិធានការហាមឃាត់មិនអោយមានរថយន្តដឹកទំនិញ រថយន្តដឹកដី ឬរថយន្តសណ្តោងធុនធំគ្រប់ប្រភេទ គឺពំុអនុញ្ញាត្តិអោយមានការចរាចរណ៍បើកធ្វើដំណើរនៅលើដងផ្លូវក្នុងភូមិសាស្ត្ររាជធានីភ្នំពេញ នាពេលថ្ងៃជាដាច់ខាត ពោលគឺអនុញ្ញាត្តិអោយចូលនៅពេលយប់ប៉ុណ្ណេាះ ។ ការហាមឃាត់នេះ គឺដោយសាររដ្ឋបាលរាជធានីភ្នំពេញយល់ឃើញថា កន្លងមកក្រុមរថយន្តដឹកដី ឬដឹកទំនិញធុនធំ តែងបង្កគ្រេាះថ្នាក់ចរាចរណ៍នៅលើដងផ្លូវសាធារណះជាអន្លើយៗ និងបានឆក់យកអាយុជីវិតមនុស្សជាបន្តបន្ទាប់ផងដែរ ។
តើគួរធ្វើបែបណាទៀត ទើបមានប្រសិទ្ធភាពទៅលើរថយន្តធុនធំទាំងនោះ??
ចែករំលែកព័តមាននេះ